Read KO E TOH TAPU KATOA TONGA 2 Kal 33 Bible Online

2 Kal 33 - KO E TOH TAPU KATOA TONGA bible

2 Kal 33

¹NA‘E hongofulu mā ua ta‘u ‘a Manase ‘i he‘ene kamata pule, pea na‘e nimangofulu mā nima ta‘u ‘ene hau ‘i Selusalema.

²Pea fai ‘e ia ‘a e me‘a na‘e tau kovi ki he finangalo ‘o Sihova, ‘o hangē ko e fai fakalielia ‘a e hīteni ne kapusi ‘e Sihova mei he ‘ao ‘o ha‘a ‘Isileli.

³He na‘a ne toe langa ‘a e ngaahi ‘esi ne laiki ‘e he‘ene tamai ko Hesekaia, ‘o ne fokotu‘u ‘ani ‘ōlita ki he kau Peali, ‘o ne ngaohi ‘ani ‘āsela, ‘o ne lotu ki he hōsitē kotoa ‘o Langi, ‘o tauhi kinautolu.

⁴Pea ne ngaohi ‘ōlita ‘i he fale ‘o Sihova, ‘a e potu na‘e folofola ai ‘e Sihova, Ko Selusalema ‘e ‘i ai hoku hingoa ‘o ta‘engata.

⁵‘Io, na‘a ne ngaohi ‘ōlita ki he hōsitē kotoa ‘o Langi ‘i he ongo loto‘ā ‘i he fale ‘o Sihova.

⁶‘Io, na‘a ne tuku ‘e ia ‘ene fānau ke ‘asi ‘i he afi ‘i Kihena, pea ne fai ‘a e talotalo kovi, mo e tuki, mo e sausau, pea ne fai mo e kau fakahā‘ele fa‘ahikehe mo e kau fiemana: ne hulu ‘ene fai ‘a e me‘a na‘e tau kovi ki he finangalo ‘o Sihova, ‘o langa‘i ‘ene houhau.

⁷‘Io, na‘a ne ‘ai ‘a e ‘īmisi kuo ne ngaohi, ‘a ia na‘e tā totonu, ‘i he loto fale ‘o ‘Elohimi, ‘a e potu na‘e folofola ai ‘a e ‘Otua kia Tēvita pea ki hono foha ko Solomone, ‘o pehē, Ko e fale ko eni te u ‘ai ki ai hoku hingoa ‘o ta‘engata, mo Selusalema, ‘a ia kuo u fili mei he ngaahi matakali ‘o ‘Isileli:

⁸pea ‘e ‘ikai te u toe ‘ave ‘a e va‘e ‘o ‘Isileli mei he funga kelekele kuo u tu‘utu‘uni mo‘omou tupu‘anga; kae kehe ‘o kapau te nau tokanga ke fai ‘o tatau mātē mo ‘eku ngaahi tu‘utu‘uni kiate kinautolu, ‘a hono kotoa ‘o e lao mo e ngaahi fekau mo e konisitūtone ne u fakafai ‘ia Mōsese.

⁹Pea na‘e takihee‘i ‘e Manase ‘a Siuta mo e nofo Selusalema, ko ia na‘a nau fai kovi, ‘o hulu ‘i he ngaahi kakai ne faka‘auha ‘e Sihova mei he ‘ao ‘o ha‘a ‘Isileli.

¹⁰Pea folofola ‘a Sihova kia Manase, pea ki hono kakai; ka na‘e ‘ikai te nau toka‘i.

¹¹Ko ia, na‘e ‘omi ‘e Sihova ‘a e hou‘eiki ‘o e hōsitē na‘e ‘i he Tu‘i ‘Āsilia, ke tau‘i kinautolu; pea nau taki ‘a Manase ‘aki ‘ani māta‘u, ‘o kii‘i ‘aki ‘a e ukamea, ‘o taki ki Pāpilone.

¹²Pea ‘i he tō ‘a e mamahi kiate ia na‘a ne ngāue ke fakamokomoko ‘a e finangalo ‘o Sihova ko hono ‘Otua, pea ne mātu‘aki fakavaivai‘i ia ‘i he ‘ao ‘o e ‘Otua ‘o hono tupu‘anga.

¹³‘Io, na‘a ne punou ‘o hū ki He‘ene ‘Afio, pea ne āfeitaulalo mai ‘o ongo‘i ‘ene hū tōtōaki, ‘o ne fakafoki ia ki Selusalema ki hono pule‘anga. Toki ‘ilo ‘e Manase ko Sihova pē ‘a e ‘Otua.

¹⁴Pea hili ia na‘a ne langa ha ‘ā tu‘a ki Kolo-‘o-Tēvita, ki he potu hihifo ki Kihoni, ‘i he tele‘a, pea ki he hū‘anga ‘o Matapā Ika,[49] ‘o takai ki ‘Ōfeli, pea ne ‘ai ke mā‘olunga ‘aupito; pea ne tuku ‘ani ‘eikitau ke nofo ‘i he ngaahi kolo ‘aa‘i ‘o Siuta.

¹⁵Pea ne ‘ave ‘a e ngaahi ‘otua muli mo e ‘īmisi mei he fale ‘o Sihova, mo e ngaahi ‘ōlita kotoa kuo ne fokotu‘u ‘i he mo‘unga ‘o e fale ‘o Sihova, pea ‘i Selusalema, ‘o ne laku kitua‘ā kolo.

¹⁶Pea ne fokotu‘u ‘a e ‘ōlita ‘o Sihova, ‘o ne feia ha feilaulau ai, ko e ngaahi feilaulau-‘ofa mo fakafeta‘i, ‘o ne fekau ki Siuta ke tauhi kia Sihova ko e ‘Otua ‘o ‘Isileli.

¹⁷Ka na‘e kei fai feilaulau ‘e he kakai ‘i he ngaahi ‘esi, ka kia Sihova pē ko honau ‘Otua.

¹⁸Pea ko hono toe ‘o e ngāue ‘a Manase, mo e lotu na‘a ne fai ki hono ‘Otua, mo e ngaahi lea ‘a e kau tongafisi na‘a nau fai kiate ia ‘i he huafa ‘o Sihova ko e ‘Otua ‘o ‘Isileli, vakai ‘oku nau ‘i he Hisitōlia ‘o e Ngaahi Tu‘i ‘Isileli.

¹⁹‘Io, ‘a ‘ene lotu, mo e āfeitaulalo mai ki ai, mo ‘ene hia kotoa mo maumau lao, mo e ngaahi potu na‘a ne ngaohi ‘esi ai, mo fokotu‘u ‘a e ngaahi ‘āsela mo e ngaahi ‘īmisi, ‘i he te‘eki ke ne fakavaivai‘i ia — vakai ‘oku tohi ia ‘i he Hisitōlia ‘a e Kau Tongafisi.[50]

²⁰Pea toka ‘a Manase mo ‘ene ngaahi kui, pea nau telio ia ‘i hono fale ‘o‘ona: pea na‘e fetongi ia ‘i he tu‘i ‘e hono foha ko ‘Āmoni.

²¹Na‘e uofulu mā ua ta‘u ‘a ‘Āmoni ‘i he‘ene kamata pule, pea na‘e ua ta‘u ‘ene hau ‘i Selusalema.

²²Pea fai ‘e ia ‘a e me‘a na‘e tau kovi ki he finangalo ‘o Sihova, ‘o hangē ko e fai ‘e he‘ene tamai ko Manase: ‘io na‘e fai feilaulau ‘e ‘Āmoni ki he ngaahi ‘īmisi ne ngaohi ‘e he‘ene tamai ko Manase, ‘o ne tauhi kiate kinautolu.

²³Pea na‘e ‘ikai te ne fakavaivai‘i ia ‘i he ‘ao ‘o Sihova, ‘o hangē ko ia na‘e fai ‘e Manase ko ‘ene tamai; kae kehe ko ‘Āmoni ia na‘e fakautuutu ai pē ‘ene faihala.

²⁴Pea puleaki‘i ia ‘e he‘ene kau tamaio‘eiki ‘a‘ana, ‘o nau tāmate‘i ia ‘i hono fale ‘o‘ona.

²⁵Ka ka tāmate‘i ‘e he kakai ‘o ‘uta ‘a kinautolu ne puleaki‘i ‘a Kingi ‘Āmoni; pea fakanofo ‘e he kakai ‘o ‘uta hono foha ko Siosaia ke fetongi ia.