Read KO E TOH TAPU KATOA TONGA 2 Kal 36 Bible Online

2 Kal 36 - KO E TOH TAPU KATOA TONGA bible

2 Kal 36

¹PEA to‘o ‘e he kakai ‘o tuku‘uta ‘a Sihoa‘asi foha ‘o Siosaia, ‘o nau fakanofo ia ke tu‘i, ke fetongi ‘ene tamai ‘i Selusalema.

²Na‘e uofulu mā tolu ta‘u ‘a Sihoa‘asi ‘i he‘ene kamata pule, pea na‘e tolu māhina ‘ene hau ‘i Selusalema.

³Pea hifo ia ‘e he Tu‘i ‘Isipite ‘i Selusalema, ‘o ne hilifaki ha mo‘ua ki he fonua ko e taleniti siliva ‘e teau mo e taleniti koula ‘e taha.

⁴Pea na‘e fakanofo ‘e he Tu‘i ‘Isipite hono tokoua ko ‘Īlaiakimi ke pule ki Siuta mo Selusalema, ‘o ne liliu hono hingoa ke Sihoiakimi. Pea puke ‘e Neko hono tokoua ko Sihoa‘asi, ‘o ‘ave ki ‘Isipite.

⁵Na‘e uofulu mā nima ta‘u ‘a Sihoiakimi ‘i he‘ene kamata pule, pea na‘e hongofulu mā taha ta‘u ‘ene hau ‘i Selusalema; pea ne fai ‘a e me‘a na‘e tau kovi ki he finangalo ‘o Sihova ko hono ‘Otua.

⁶Pea ‘alu hake ke tau‘i ia ‘e Nepukanesa, ko e Tu‘i Pāpilone, ‘o ne kii‘i ia ke ‘ave ki Pāpilone.

⁷Na‘e ‘ave foki ‘e Nepukanesa ki Pāpilone ‘a e nāunau ni‘ihi mei he fale ‘o Sihova, ‘o ne tuku ‘i hono temipale ‘i Pāpilone.

⁸Pea ko hono toe ‘o e ngāue ‘a Sihoiakimi, mo e ngaahi fakalielia na‘a ne ngaohi, mo e ngaahi me‘a fakalielia na‘e ‘ilo ‘iate ia, kuo tohi kotoa ‘i he Puka ‘o e Ngaahi Tu‘i ‘Isileli mo Siuta: pea na‘e fetongi ia ‘i he pule ‘e hono foha ko Sihoiakini.

⁹Na‘e valu ta‘u[54] ‘a Sihoiakini ‘i he‘ene kamata pule; pea ko e māhina ‘e tolu mo e ‘aho ‘e hongofulu na‘a ne hau ‘i Selusalema: pea na‘a ne fai ‘a e me‘a na‘e tau kovi ki he finangalo ‘o Sihova.

¹⁰Pea ‘i he toe māfana mai ‘a e ta‘u na‘e ‘alu ‘a e fekau ‘a Kingi Nepukanesa, ‘o ‘omi ia ki Pāpilone; pea na‘e ‘omi mo ia ‘a e nāunau mahu‘inga ‘o e fale ‘o Sihova; pea ne fakanofo ‘a Setekaia na‘a ne tokoua ‘aki[55] ke pule ki Siuta mo Selusalema.

¹¹Na‘e uofulu mā taha ta‘u ‘a Setekaia ‘i he‘ene kamata pule pea na‘e hongofulu mā taha ta‘u ‘ene hau ‘i Selusalema.

¹²Pea fai ‘e ia ‘a e me‘a na‘e tau kovi ki he finangalo ‘o Sihova ko hono ‘Otua. Na‘e ‘ikai te ne fakavaivai ia ‘i he ‘ao ‘o Selemaia, ‘a e palōfita na‘e lea tonu mei he fofonga ‘o Sihova.

¹³Na‘a ne angatu‘u foki kia Kingi Nepukanesa, ‘a ia kuo ne fakafuakava ia ‘i he ‘Otua: pea ne fakakekeva hono kia, mo fakafefeka hono loto, ke ‘oua te ne foki kia Sihova ko e ‘Otua ‘o ‘Isileli.

¹⁴Kae‘uma‘ā ko e hou‘eiki kotoa ‘o e kau taula‘eiki mo e kakai, na‘e fakautuutu ‘enau ngāue kovi ‘i he‘enau fai ‘a e ngaahi fakalielia kotoa ‘o e hīteni; pea nau fakalielia‘i ‘a e fale ‘o Sihova kuo ne fakatāpui ‘i Selusalema.

¹⁵Pea ko Sihova ko e ‘Otua ‘o honau tupu‘anga na‘a ne fakafai ‘i he‘ene kau talafekau ‘ene tala kiate kinautolu, ‘o ne tu‘u hengihengi hono fekau atu; he na‘a ne ma‘ema‘ekina hono kakai, mo hono ‘afio‘anga:

¹⁶ka na‘a nau luma‘i ai pē ‘a e kau talafekau ‘a ‘Elohimi, ‘o nau fakasīkaka‘i ‘ene ngaahi lea, ‘o nau manuki‘i ai pē ‘ene kau palōfita; kae faifai pea hake ‘a e houhau ‘a Sihova ki hono kakai, ‘o ‘ikai toe felave ha me‘a ki ai.

¹⁷Ko ia, na‘a ne ‘omi kiate kinautolu ‘a e tu‘i ‘o e Kau Kalitia, ‘a ia na‘a ne tāmate‘i ‘aki ‘a e heletā honau kau talavou ‘i honau fale tapu, ‘o ‘ikai te ne ma‘ema‘ekina ha talavou pe finemui, ha fatutangata pe ha a‘ua‘u: na‘a ne tuku kotoa pē ki hono nima.

¹⁸Pea ko e nāunau kotoa ‘o e fale ‘o ‘Elohimi, ‘a e lalahi mo e iiki, mo e koloa na‘e tuku ‘i he fale ‘o Sihova, mo e koloa na‘e tuku ‘i he fale ‘o e tu‘i mo hono hou‘eiki; na‘a ne ‘omi kotoa ki Pāpilone.

¹⁹Pea na‘a nau tutu ‘a e fale ‘o ‘Elohimi, pea nau laiki ‘a e ‘ā ‘o Selusalema, ‘o nau fakamomofi hono ngaahi palasi, ‘o maumau hono ngaahi nāunau mahu‘inga.

²⁰Pea ko kinautolu kuo hao mei he heletā na‘a ne taki pōpula ki Pāpilone, pea nau nofo hopoate kiate ia mo ‘ene fānau, kae‘oua ke hau ‘a Pēsia.

²¹Ke fakamo‘oni ‘a e folofola ‘a Sihova na‘e lea‘aki ‘e Selemaia, ke ‘oua ke ma‘u lelei ‘e he fonua hono ngaahi Sāpate;[56] he lolotonga ‘ene lala na‘a ne ma‘u Sāpate: kae‘oua ke kakato ha ta‘u ‘e fitungofulu.

²²Pea ‘i he ‘uluaki ta‘u ‘o Kōlesi ko e Tu‘i Pēsia,[57] pea koe‘uhi ke fakamo‘oni ki he folofola ‘a Sihova na‘e lea‘aki ‘e Selemaia, ko ia na‘e ue‘i ‘e Sihova ‘a e laumālie ‘o Kōlesi ko e Tu‘i Pēsia, ‘o ne fanongonongo ‘i hono pule‘anga kotoa, ‘o ne tohi foki, ‘o pehē.

²³Ko e folofola eni ‘o Kōlesi Tu‘i Pēsia, Ko Sihova ko e ‘Otua ‘o Langi kuo ne foaki kiate au ‘a e ngaahi pule‘anga kotoa pē ‘o māmani; pea kuo ne na‘ina‘i kiate au ke langa ha fale mo‘ona ‘i Selusalema, ‘a ia ‘oku ‘i Siuta. ‘Ilonga kimoutolu ‘i hono kakai kotoa ‘oku ne ‘atā ke ‘alu ki ai, pea ‘ofa ke kau mo ia ‘a Sihova ko hono ‘Otua.