Read KO E TOH TAPU KATOA TONGA 2 Kal 4 Bible Online

2 Kal 4 - KO E TOH TAPU KATOA TONGA bible

2 Kal 4

¹NA‘A ne ngaohi foki ha ‘ōlita palasa, ko e kiupite ‘e uofulu hono lōloa, pea ko e kiupite ‘e uofulu hono māukupu, pea hongofulu hono mā‘olunga.

²Na‘a ne ngaohi foki ‘a e Tahi Ukamea ko e kiupite ‘e hongofulu mei hono ngutu ko ē ‘o a‘u ki hono ngutu ko ē; na‘e fuopotopoto, pea na‘e kiupite ‘e nima hono loloto; pea ‘i hono fua takai ‘aki ha kafa na‘e tolungofulu‘i kiupite.

³Pea ‘i lalo na‘e ai ‘a e ngaahi fakatātā ‘o e pulumokau, ‘o ‘alu takai ‘aupito, ko e hongofulu ki he kiupite. Na‘e ‘otu ua ‘a e ngaahi pulumokau, ‘o takai ki he Tahi,[5] pea na‘e haka fakataha mo ia.

⁴Na‘e hilifaki ki he pulumokau ‘e hongofulu mā ua, ‘a ia na‘e hanga ‘a e tolu ki he tokelau mo e tolu ki lulunga mo e tolu ki he tonga mo e tolu ki hahake: pea na‘e ‘ai ‘a e Tahi ki ‘olunga kiate kinautolu, pea na‘e hu‘u ki loto honau tu‘ungaiku kotoa.

⁵Pea ko hono matolu ko e kau‘inima fā; pea ko hono ngutu na‘e tā hangē ko e ngutu‘i ipu, hangē ko e fisi‘i lile; na‘e hao ai ‘o fe‘unga mo e pate ‘e tolu afe.

⁶Pea ne ngaohi ha kumete ‘e hongofulu, ‘o ne tuku ‘a e nima mei he to‘omata‘u mo e nima mei to‘ohema ke fufulu me‘a ai; ‘ilonga ‘a e ngāue ‘o e feilaulau-mōifua na‘e ngaohi ai: ka ko e Tahi na‘e ma‘a e kaukau ‘a e taula‘eiki.

⁷Pea ne ngaohi ha hongofulu‘i tu‘unga maama koula, ‘o fakatatau ki hono konisitūtone ‘o‘ona; ‘o ne tuku ki he Temipale, ko e nima mei to‘omata‘u mo e nima mei to‘ohema.

⁸Pea ne ngaohi ha tēpile ‘e hongofulu; ‘o ne fokotu‘u ma‘u ‘i he Temipale, ko e nima mei to‘omata‘u mo e nima mei to‘ohema. Pea ne ngaohi ha teau‘i pēsoni koula.

⁹Na‘a ne ngaohi foki mo e Loto‘ā ‘o e Kau Taula‘eiki, mo e Loto‘ā Lahi, mo e ngaahi matapā ki he loto‘ā ko ia; ‘o ne ‘ufi‘ufi palasa ‘a e ngaahi matapā.

¹⁰Pea na‘a ne tuku ‘a e Tahi ki he tafa‘aki to‘omata‘u ‘o e fale ‘i hahake mo tonga.

¹¹Pea ngaohi ‘e Hūlame ‘a e ngaahi kane, mo e ngaahi huo lafalafa, mo e ngaahi pēsoni. Pea faka‘osi ‘e Hūlame hono nafa ngāue, ‘a ia na‘a ne fai ma‘a Kingi Solomone ‘i he fale ‘o ‘Elohimi:

¹²‘a e ongo pou, mo e ongo fakanikoniko, mo e ongo teunga ‘o e ongo ‘ulu‘i pou, mo e ongo kupenga ke fungani ‘aki, ‘a e ongo fakanikoniko ‘o e teunga ‘o e ‘ulu‘i pou;

¹³mo e fāngeau‘i pomikānite ki he ongo kupenga, ‘o taki ua ‘a e ‘otu pomikānite ‘a e kupenga, ke fungani ‘aki ‘a e ongo fakanikoniko ‘o e teunga na‘e ‘i he tu‘a pou.

¹⁴Na‘a ne ngaohi foki ‘a e ngaahi tu‘unga fakasāliote[6] pea ne ngaohi mo e ngaahi kumete na‘e hilifaki ki he ngaahi tu‘unga;

¹⁵‘a e taha‘i Tahi, mo e Hongofulumāua‘i pulumokau ‘i he lalo Tahi.

¹⁶Ko e ngaahi kane foki, mo e ngaahi huo lafalafa, mo e ngaahi huhu, mo e nāunau kehekehe na‘e kau ai,[7] na‘e ngaohi ‘aki ‘a e palasa ngingila ma‘a Solomone ‘e Hūlame ko ‘ene ‘eiki tufunga ki he fale ‘o Sihova.

¹⁷Na‘e haka ia ‘e he tu‘i ‘i he Seakale ‘o Soatani, ‘i he kelekele kuo malaki, ‘i he vaha‘a ‘o Sīkote mo Sāleta.[8]

¹⁸Pea ngaohi ‘e Solomone ‘a e nāunau kehekehe ko eni ke lahi ‘aupito; he na‘e ‘ikai ‘eke ‘a e mamafa ‘o e palasa.

¹⁹‘Io, na‘e ngaohi ‘e Solomone ‘a e nāunau kehekehe na‘e ‘i he fale ‘o ‘Elohimi, mo e ‘ōlita koula, mo e ngaahi tēpile na‘e ‘i ai ‘a e mā fono;

²⁰mo e ngaahi tu‘unga maama, mo honau ngaahi nge‘esi maama ke ulo ‘i he ‘ao ‘o e Folofola‘anga, ‘o hangē ko hono tu‘utu‘uni, ko e koula ma‘opo‘opo ia;

²¹mo e ngaahi fisi‘i ‘akau, mo e ngaahi nge‘esi maama, mo e ngaahi helekosi, ko e koula ia, ‘io, ko e koula haohaoa;

²²pea ko e ngaahi hikofi, mo e ngaahi pēsoni mo e ngaahi sēpuni, mo e ngaahi ‘ainga malala, ko e koula ma‘opo‘opo ia: pea ko e me‘a ki he hū‘anga ki fale, ko e ngaahi matapā loto ki he Potu Toputapu, mo e ngaahi matapā ‘o e fale, ‘a ia ko e Temipale, na‘e koula ia.