Read KO E TOH TAPU KATOA TONGA 2 Kal 5 Bible Online

2 Kal 5 - KO E TOH TAPU KATOA TONGA bible

2 Kal 5

¹PEA kuo ‘osi‘osingamālie ‘a e tu‘utu‘uni ‘o e ngāue na‘e fai ‘e Solomone ki he fale ‘o Sihova. Pea na‘e fakahū mai ‘e Solomone ‘a e ngaahi me‘a na‘e fakatāpui ‘e he‘ene ‘eiki ko Tēvita; pea ko e siliva mo e koula mo e nāunau kehekehe na‘a ne tuku ki he ngaahi fale koloa ‘i he fale ‘o ‘Elohimi.

²Toki fakataha ‘e Solomone ‘a e mātu‘a ‘Isileli, mo e tāimu‘a ‘o e ngaahi matakali, ko e hou‘eiki ‘ulumotu‘a ‘o ha‘a ‘Isileli, ki Selusalema, ke fakahā‘ele ‘a e ‘A‘ake ‘o e Kovinānite ‘o Sihova mei Kolo-‘o-Tēvita,[9] ‘a ia ko Saione.

³Ko ia na‘e fakataha ki he tu‘i ‘a e kau tangata ‘Isileli kotoa pē ‘i he Kātoanga (ko e Fitu māhina).

⁴Pea ōmai ‘a e mātu‘a ‘Isileli kotoa pē, pea kauala ‘a e ‘A‘ake ‘e he kau Līvai.

⁵Pea nau fakahā‘ele ‘a e ‘A‘ake mo e Tēniti Fe‘iloaki‘anga mo e nāunau tapu kotoa pē na‘e ‘i he tēniti; na‘e ‘ohake ia ‘e he kau Līvai taula‘eiki.

⁶Pea na‘e ‘i he ‘ao ‘o e ‘A‘ake ‘a Kingi Solomone mo e fu‘u kau ‘Isileli kuo fakataha kiate ia, ‘oku nau feia sipi mo pulu, ‘a ia na‘e ‘ikai lava hano fakamatala pe lau ko ‘ene lahi.

⁷Pea na‘e fakahū ‘e he kau taula‘eiki ‘a e ‘A‘ake ‘o e Kovinānite ‘o Sihova ki hono feitu‘u, ki he Folofola‘anga ‘o e fale, ki he Potu Toputapu, ki he lalo kapakau ‘o e selupimi.

⁸He na‘e tu‘u mafola ‘a e kapakau ‘o e selupimi ‘i he potu ‘o e ‘A‘ake, pea fakamalumalu ‘e he ongo selupimi mei ‘olunga ‘a e ‘A‘ake mo hono ‘akau ha‘amo.

⁹Pea na‘a nau toloaki mai ‘a e ongo ‘akau ha‘amo, ko ia na‘e ala sio ki he mui ‘akau ha‘amo mei he ‘A‘ake ‘i he mata Folofola‘anga, ka na‘e ‘ikai hā kitu‘a; pea ‘oku ‘i ai pē ‘o a‘u ki he taimi ni.

¹⁰Na‘e ‘ikai ha me‘a ‘i he ‘A‘ake, ngata pē ‘i he ongo maka ‘a ia na‘e tuku ai ‘e Mōsese ‘i Hōlepi, ‘a ia na‘e kovinānite ai ‘a Sihova mo ha‘a ‘Isileli ‘i he‘enau omi mei ‘Isipite.

¹¹Pea ‘i he ‘iloange, ‘i he hū mai ‘a e kau taula‘eiki mei he Potu Tapu (he ko e kau taula‘eiki kotoa pē na‘e ‘iloa kuo nau fakatāpui kinautolu, na‘e ‘ikai lau lakanga;

¹²mo e kau Līvai foki na‘e hiva honau kotoa, ko ‘Ēsafe, ko Hēmani, ko Situtuni, mo ‘enau fānau mo honau kāinga, kuo nau kofu tupenu hinehina, kuo nau fakasimipale mo fakahelefilo mo fakaha‘ape, ‘o nau tutu‘u ‘i he potu hahake ‘o e ‘ōlita, pea fakataha mo kinautolu ha taula‘eiki ‘e toko teau mā uofulu ‘oku nau ifi talupite). —

¹³Pea ‘i he ‘iloange na‘e fā‘ūtaha ‘a e kau ifi mo e hiva ‘i he fakaongo atu ha le‘o pe taha, pea nau fakahīkihiki‘i mo fakafeta‘ia ‘a Sihova; ‘io, ‘i he‘enau ha‘aki mai honau le‘o fakataha mo e talupite, mo e simipale, mo e nāunau ‘o e hiva, mo e nāunau fakamālō kia Sihova, ‘o pehē, “He ‘oku lelei ia ‘Oku tolonga ‘o ta‘engata ‘ene ‘alo‘ofa:” Pea na‘e toki fonu ‘i he ‘ao ‘a e fale ‘o Sihova:

¹⁴ko ia na‘e ‘ikai lava ‘e he kau taula‘eiki ke tu‘u he fai honau fatongia, kuo pehē fau ‘a e ‘ao: he na‘e fonu ‘a e fale ‘o ‘Elohimi ‘i he kolōlia ‘o Sihova.