Read KO E TOH TAPU KATOA TONGA 2 Kal 6 Bible Online

2 Kal 6 - KO E TOH TAPU KATOA TONGA bible

2 Kal 6

¹TOKI me‘a ‘a Solomone, ‘o pehē, Ne folofola ‘a Sihova ke nofo ‘i he po‘uli matolu.

²Ka ko au kuo u langa ha fale nofo‘anga mo‘ou, ‘io, ha potu ke ke ‘afio ai ‘o ta‘engata.

³Pea tafoki ‘a e tu‘i, ‘o ne tāpuaki‘i ‘a e fakataha kotoa ‘o ‘Isileli: ko e fu‘u fakataha ‘a ‘Isileli na‘e tu‘u pē.

⁴Pea folofola mai ia, Mālō mo Sihova ko e ‘Otua ‘o ‘Isileli, ‘a ia na‘e folofola hono fofonga ki he‘eku ‘eiki ko Tēvita (‘io kuo fakaai ‘e hono nima) ‘o pehē,

⁵Talu ‘a e ‘aho na‘a ku ‘omi ai hoku kakai mei ‘Isipite, kuo te‘eki ke u fili ha kolo ‘i he ngaahi matakali ‘o ‘Isileli ke langa ai ha fale ke ‘i ai hoku hingoa; pea te‘eki ke u fili ha tangata ke ‘eiki ki hoku kakai ‘Isileli:

⁶pea kuo u fili ‘a Selusalema ke ‘i ai hoku hingoa, pea kuo u fili ‘a Tēvita ke pule ki hoku kakai ‘Isileli.

⁷Pea ko eni, na‘e ‘i he loto ‘o ‘eku ‘eiki ko Tēvita ke langa ha fale mo‘o e huafa ‘o Sihova ko e ‘Otua ‘o ‘Isileli.

⁸Ka na‘e folofola ‘a Sihova kia Tēvita ko ‘eku ‘eiki, Ko e me‘a ‘i he‘ene ‘i ho loto ke langa ha fale ki hoku hingoa, mālō ‘ene ‘i ho loto:

⁹ka ‘e ‘ikai te ke langa ‘a e fale ‘e koe, ka ko ho foha pē, ‘a ia te ne tupu mei ho manava; ko ia ia te ne langa ha fale mōku hingoa.

¹⁰Pea kuo fakaai ‘e Sihova ‘a e folofola na‘a ne fai, he kuo u tu‘u au ko e fetongi ‘o ‘eku tamai ko Tēvita, pea ‘oku ou nofo ‘i he taloni ‘o ‘Isileli, ‘o hangē ko e folofola ‘a e ‘Eiki; pea kuo u langa ‘a e fale mo‘o e huafa ‘o Sihova ko e ‘Otua ‘o ‘Isileli.

¹¹Pea kuo u tuku ai ‘a e ‘A‘ake, ‘a ia ‘oku ‘i ai ‘a e kovinānite ‘o Sihova na‘a ne fai mo ha‘a ‘Isileli.

¹²Pea ne tu‘u ‘i he mata ‘ōlita ‘o Sihova, ‘i he ‘ao ‘o e fakataha kotoa ‘o ‘Isileli, ‘o ne folahi atu hono nima:

¹³(he kuo ngaohi ‘e Solomone ha tu‘unga palasa, ‘o ne tuku ‘i he Loto‘ā Lahi, ko e kiupite ‘e nima hono lōloa, pea ko e kiupite ‘e nima hono māukupu, pea tolu hono mā‘olunga; pea ne tu‘u ai, ‘o ne tū‘ulutui ‘i he ‘ao ‘o e fu‘u fakataha ‘o ‘Isileli, ‘o ne folahi hono nima ki langi),

¹⁴pea ne pehē, ‘E Sihova, ‘Otua ‘o ‘Isileli; ‘oku ‘ikai ha ‘Otua hangē ko koe ‘i langi pe ‘i māmani, he fakaai fuakava mo meesi ki ho‘o kau tamaio‘eiki ‘oku taka ‘i ho ‘ao mo e loto kotoa;

¹⁵‘a e ‘Afiona kuo ke fakahoko ki ho‘o tamaio‘eiki ko Tēvita ko ‘eku tamai ‘a e me‘a na‘a ke tala‘ofa ki ai: ‘io na‘e folofola ‘e ho fofonga, pea kuo fakaai ‘e ho nima, hangē ko ia he ‘aho ni.

¹⁶Pea ko eni, ‘e Sihova, ‘Otua ‘o ‘Isileli, fai ki ho‘o tamaio‘eiki ko Tēvita ko ‘eku tamai ‘a e me‘a na‘a ke folofola‘aki kiate ia, ‘o pehē, ‘E ‘ikai hala hao tangata ke fakafeangai kiate au he nofo ‘i he taloni ‘o ‘Isileli: ko hono me‘a pē, ‘o kapau ‘e ta‘ofi ‘e ho‘o fānau ki honau ngaahi founga, ke fou ‘i he‘eku lao hangē ko e fou ‘a‘au.

¹⁷Pea ko eni, ‘e Sihova ‘Otua ‘o ‘Isileli, ke fakamo‘oni ‘a e folofola na‘a ke fai ki ho‘o tamaio‘eiki ko Tēvita.

¹⁸Ka ‘e nonofo mo‘oni koā ‘a e ‘Otua mo e tangata ‘i māmani! Vakai, na‘a mo e langi, ‘io, mo e langi ‘o e ngaahi langi, ka ‘oku ‘ikai hao ai ‘a e ‘Afiona, kae huanoa ‘a e fale ni kuo u langa!

¹⁹Ka neongo ia ka ke hāngai fofonga mai ki he lotu ‘a ho‘o tamaio‘eiki ko au, pea ki he‘eku hū, ‘e Sihova ko hoku ‘Otua, mo ke fakaongo ki he fakafeta‘i mo e lotu ‘oku feia ‘e ho‘o tamaio‘eiki ‘i ho ‘ao:

²⁰kae ‘ā ho fofonga ki he fale ni ‘aho mo e pō; ‘io, ki he potu na‘a ke folofola ai te ke ‘ai ki ai ho huafa; kae fakaongo ki he lotu ‘e fai ‘e ho‘o tamaio‘eiki ko au ‘i he potu ni.

²¹‘Io, ke ke tali ‘a e ngaahi hū ‘a ho‘o tamaio‘eiki mo ho kakai ‘Isileli, ‘a ia te nau fai ‘i he potu ni: ‘io, ke fanongo mai ‘a e ‘Afiona mei he potu ‘oku ke ‘afio ai, ‘io, mei langi na, pea ‘i ho‘o fanongo pea ke fakamolemole.

²²Kapau ‘e hia ha taha ki hono kaungā‘api, pea kuo hilifaki kiate ia ha fuakava ke fai, pea ne ha‘u ‘o fuakava ‘i he ‘ao ‘o e ‘ōlita ‘i he fale ni:

²³pea ke fanongo ‘a e ‘Afiona mei langi ‘o fakaai, ‘o ke fakamāu‘i ho‘o kau tamaio‘eiki, ke fakafoki ki he halaia mo fakatō ki hono tumu‘aki hono hala; ka ke fakatonuhia ‘a e kau faitotonu, mo ke ‘ange kiate ia ‘o taau mo ‘ene faitotonu.

²⁴Pea kapau ‘e te‘ia ho kakai ‘Isileli ‘i he ‘ao ‘o e fili, koe‘uhi ko ‘enau hia ki he ‘Afiona; pea nau tafoki ‘o hu‘ekina ho huafa, mo fai ‘enau lotu mo ‘enau hū ‘i ho ‘ao ‘i he fale ni;

²⁵pea ke fanongo ‘a e ‘Afiona mei langi, ‘o fakamolemole ‘a e hia ‘a ho kakai ‘Isileli, ke fakafoki kinautolu ki he kelekele na‘a ke foaki kiate kinautolu mo ‘enau ngaahi kui.

²⁶Ka tāpuni ‘a e langi ‘o ‘ikai ha ‘uha, koe‘uhi kuo nau angahala kiate koe; ka nau ka lotu ki he potu ni, mo hu‘ekina ho huafa, mo tafoki mei he‘enau angahala, he kuo ke fakavaivai‘i kinautolu:

²⁷pea ke fanongo ‘a e ‘Afiona mei langi, mo ke fakamolemole ‘a e hia ‘a ho‘o kau tamaio‘eiki, ‘io, ‘a ho kakai ‘Isileli, he ‘oku ke ako kinautolu ha hala lelei ke nau fou ai; pea ke hifo mai ‘e he ‘Afiona ha ‘uha ki ho kelekele, ‘a ia kuo ke foaki ki ho kakai ko honau tofi‘a.

²⁸Kapau ‘e hoko ki he fonua ‘a e honge, kapau ‘e hoko ‘a e mahaki faka‘auha, kapau ‘e ‘i ai ‘a e mahunu pe kekena, ‘a e he‘e pe ‘unufe, kapau ‘e ‘ākolo‘i kinautolu ‘e honau fili, ‘o a‘u ki he kelekele ‘o honau matanikolo; pe ko e hā ha tā pe mahaki ‘e fai;

²⁹‘ilonga ha hū ‘e fai ‘e ha tangata pe ko ho kakai ‘Isileli kotoa, ‘enau ongo‘i takitaha hono tā mo hono mamahi; ‘io, ka ne ka folahi hono nima ki he fale ni:

³⁰pea ke fanongo ‘a e ‘Afiona mei langi ko ho ‘afio‘anga, pea ke fakamolemole, mo ‘ange ki he tangata takitaha ‘a e tuha ‘o hono ngaahi ‘alunga ‘i ho‘o ‘afio‘i hono loto; (he ko koe toko taha tofu pē ‘oku ke mea‘i ‘a e loto fua pē ‘o e hako‘i tangata);

³¹koe‘uhiā ke nau ‘apasia kiate koe, ke fou ‘i ho ngaahi hala ‘i he ‘aho kotoa pē te nau nofo ai ‘i he funga kelekele na‘a ke foaki ki he‘emau ngaahi kui.

³²Pea koe‘uhi ko e muli foki ‘a ia ‘oku ‘ikai ke kau ki ho kakai ‘Isileli; ka ha‘u ia mei ha fonua mama‘o koe‘uhi ko ho fu‘u huafa, mo ho nima mālohi, mo ho nima kuo hiki tā: ‘io, ka ha‘u ia ‘o lotu ki he fale ni;

³³pea ke fanongo ‘a e ‘Afiona mei langi, mei ho ‘afio‘anga na, pea ke fakaai ‘a e ngaahi me‘a ‘oku tautapa ai kiate ko e ‘a si‘i muli; koe‘uhiā ke ‘ilo ho huafa ‘e he ngaahi kakai ‘o māmani, pea ke nau ‘apasia ki he ‘Afiona ‘o hangē ko ho kakai ‘Isileli, pea ke nau ‘ilo ko ho huafa ‘oku ui‘aki ‘a e fale ko eni kuo u langa.

³⁴Ka hū kitu‘a ho kakai ke fai tau mo honau ngaahi fili, pe ko e hā ‘a e fononga te ke fekau ai kinautolu, pea nau lotu ki he ‘Afiona he hanga ki he kolo ko eni kuo ke fili ki ai, pea ki he fale kuo u langa ki ho huafa:

³⁵pea ke fanongo mei langi ki he‘enau lotu mo ‘enau hū, ‘o taukapo‘i ‘enau me‘a.

³⁶Kapau te nau hia ki he ‘Afiona (he ‘oku ‘ikai ha tangata ‘oku ta‘ehia), pea ke tuputāmaki kiate kinautolu ‘o tuku kinautolu ki he fili, pea nau taki pōpula kinautolu ki ha fonua mama‘o pe ofi;

³⁷ka ‘oka fifili ki ai honau loto ‘i he fonua ‘oku ‘ave kinautolu ki ai, pea nau tafoki ‘o hū ki he ‘Afiona ‘i he fonua ‘o e kakai ‘oku nau pōpula ki ai, ‘o nau pehē, Kuo mau hia, kuo mau fai kovi, pea kuo mau talangata‘a:

³⁸ka nau ka foki ki he ‘Afiona ‘aki honau loto kotoa, mo honau laumālie kotoa ‘i he fonua ‘o honau pōpula, ‘a ia kuo ‘ave pōpula kinautolu ki ai; pea nau lotu ‘o hanga ki honau fonua, ‘a ia na‘a ke foaki ki he‘enau ngaahi kui, pea ki he kolo na‘a ke fili, mo e fale ni kuo u langa ki ho huafa:

³⁹pea ke fanongo mei langi mei ho ‘afio‘anga ki he‘enau lotu mo ‘enau hū, pea ke taukapo‘i ‘enau me‘a, mo ke fakamolemole ho kakai kuo hia kiate koe.

⁴⁰Pea ko eni, ‘e hoku ‘Otua, ke ‘ā mu‘a ho fofonga, pea ke fakaongo hifo ki ha lotu ‘oku fai ‘i he potu ni.

⁴¹Pea ko eni, ma‘ama‘a hake, ‘e Sihova ‘Elohimi, ki ho tōfā‘anga, ‘a e ‘Afiona mo e ‘A‘ake ko ho fa‘onga mālohi. Ke kofu ‘aki ‘a e fakamo‘ui ‘e ho‘o kau taula‘eiki, ‘e Sihova ‘Elohimi, pea ke fefiefia‘i ‘i he lelei ‘a ho‘o kau mā‘oni‘oni.

⁴²Sihova ‘Elohimi ē, ‘oua te ke tekaki ‘a e mata ‘o ho‘o Pani: manatu ki ho‘o tamaio‘eiki ko Tēvita, ‘ene ‘ofa ki he lotu.[10]