Read KO E TOH TAPU KATOA TONGA 2 Kal 8 Bible Online

2 Kal 8 - KO E TOH TAPU KATOA TONGA bible

2 Kal 8

¹PEA ‘i he ‘osi ‘a e uofulu‘i ta‘u ‘a ia na‘e langa ai ‘e Solomone ‘a e fale ‘o Sihova, mo e fale ‘o‘ona,

²pea ko e ngaahi kolo na‘e ‘ange ‘e Hailame kia Solomone, na‘e langa kinautolu ‘e Solomone, ‘o ne fakakakai ‘aki ha ha‘a ‘Isileli.

³Pea ‘alu ‘a Solomone ki Hēmati-Sopa, ‘o ne puke ia.

⁴Pea ne ngaohi ‘a Tatimoa ‘i he Toafa, mo e ngaahi kolo feleoko, ‘a ia na‘a ne langa ‘i Hēmati.

⁵Na‘a ne ngaohi foki ‘a Pete-holoni-‘olunga, mo Pete-holoni-lalo, ko e ongo kolotau kuo ‘aa‘i, pea songo ‘aki ‘a e ngaahi lau matapā,

⁶mo e ngaahi fakama‘u: pea mo Pealati, pea mo e ngaahi kolo feleoko na‘e ma‘u ‘e Solomone, mo e ngaahi kolo sāliote, mo e ngaahi kolotau-heka-hoosi, kae‘uma‘ā ‘a e mamana kehekehe ‘a Solomone, ‘a ia na‘a ne langa ko ‘ene manako pē ‘i Selusalema, mo Lepanoni, mo e potu kehekehe ‘o hono pule‘anga.

⁷Ko e me‘a ki he toenga kakai Heti, mo ‘Āmoli, mo Pēlisi, mo Hevi, pea mo e Siepusi (‘a ia na‘e ‘ikai te nau kau ki ‘Isileli);

⁸ko ‘enau fānau na‘e toe ‘i he fonua, ‘a kinautolu na‘e ‘ikai faka‘osi ‘e ha‘a ‘Isileli, na‘e fai ‘e Solomone ha tu‘utu‘uni ngāue kiate kinautolu, ‘a ia ‘oku kei fai ni.

⁹Ka na‘e ‘ikai ngaohi ‘e Solomone ha ni‘ihi ‘o ha‘a ‘Isileli ke hopoate ke fai ‘ene ngāue; ka ko kinautolu ko e kau pāte‘i tau, mo ‘ene hou‘eiki kapiteni, mo e angi ‘o ‘ene tau sāliote mo tau heka hoosi.

¹⁰Pea ko eni ‘a e kau ‘ōfisa lalahi na‘e ma‘u ‘e Kingi Solomone, ko e toko uangeau mā nimangofulu, ‘a ia na‘a nau pule ki he kakai.

¹¹Ka na‘e fakahā‘ele ‘e Kingi Solomone ‘a e ‘ōfefine ‘o Felo mei Kolo-‘o-Tēvita ki he fale kuo ne langa mo‘ona: he na‘a ne pehē, ‘E ‘ikai nofo hoku uaifi ‘i he fale ‘o Tēvita ko e Tu‘i ‘Isileli, he ‘oku tapu ‘a e ngaahi potu ‘oku a‘u ki ai ‘a e ‘A‘ake ‘o Sihova.

¹²Na‘e toki feia ‘e Solomone ‘a e ngaahi feilaulau-mōifua kia Sihova ‘i he ‘ōlita ‘o e ‘Eiki, ‘a ia kuo ne ngaohi ‘i he mata hū‘anga,

¹³‘a e me‘a ‘o e ‘aho ‘i hono ‘aho, ‘o ne fai feilaulau-mōifua ‘o hangē ko e tu‘utu‘uni ‘a Mōsese, ‘i he ngaahi Sāpate, mo e fakamāhina fo‘ou, mo e ngaahi kātoanga tu‘utu‘uni tu‘o tolu ‘i he ta‘u, ko e Kātoanga Tapu lēvani, mo e Kātoanga Lau Uike, mo e Kātoanga Fale-lou‘akau.

¹⁴Pea ne vahevahe ‘a e ngaahi lakanga taula‘eiki ki he‘enau ngāue, ‘o fakatatau ki he konisitūtone ‘a Tēvita ko ‘ene tamai; mo e kau Līvai foki ki honau nafa, ke fai ‘a e fakamālō, pea ke fai ‘a e ngāue ‘i he ‘ao ‘o e kau taula‘eiki, ‘a e me‘a ‘o e ‘aho ‘i hono ‘aho: mo e kau le‘o matapā ke fai fakalakanga ‘i he matapā mo e matapā: he na‘e pehē ‘a e tu‘utu‘uni ‘a Tēvita ko e tangata ‘o ‘Elohimi.

¹⁵Pea na‘e ‘ikai te nau afe mei he tu‘utu‘uni ‘a e tu‘i ki he kau taula‘eiki mo e kau Līvai ‘i ha momo‘i me‘a, ‘uma‘ā ha me‘a na‘e kau ki he ngaahi fokotu‘unga koloa.

¹⁶Pea na‘e toka teuteu ‘a e ngāue kotoa ‘a Solomone ki he tanupou ‘o e fale, ‘o a‘u ki hono faka‘osi. Na‘e haohaoa ‘a e fale ‘o Sihova.

¹⁷Toki ‘alu ‘a Solomone ki ‘Esioni-kepa, pea ki ‘Ēlati, ‘i he matātahi ‘o e fonua ‘o ‘Ītomi.

¹⁸Pea tuku ‘e Hailami ‘ene kau tamaio‘eiki ke ‘ave ‘a e ngaahi vaka kiate ia, mo e kau ngāue na‘e poto ‘i tahi, pea na‘a nau ‘alu mo e kau tamaio‘eiki ‘a Solomone ki ‘Ōfela, ‘o nau ‘omi koula mei ai, ko e taleniti ‘e fāngeau mā nimangofulu, ‘o nau uta mai kia Kingi Solomone.