Read KO E TOH TAPU KATOA TONGA KO ‘ĒSELA 3 Bible Online

KO ‘ĒSELA 3 - KO E TOH TAPU KATOA TONGA bible

KO ‘ĒSELA 3

¹PEA ‘i he hoko mai ‘a hono fitu ‘o e māhina, pea kuo nofo ‘a ha‘a ‘Isileli ‘i he kolo kehekehe, na‘e toki fakatefua mai ‘a e kakai ki Selusalema.

²Pea tu‘u hake ‘a Sisua foha ‘o Siosateki mo hono kāinga taula‘eiki, pea mo Seluipepeli foha ‘o Saletili, mo hono kāinga ‘o‘ona, pea nau ngaohi ‘a e ‘ōlita ‘a e ‘Otua ‘o ‘Isileli, ke feia ai ‘a e ngaahi feilaulau-mōifua, ‘o hangē ko ia kuo tohi ‘i he Lao ‘a Mōsese ko e tangata ‘o ‘Elohimi.

³Pea nau fokotu‘u ‘a e ‘ōlita ‘i he tu‘unga ko ē; he[5] kuo nau līfusia telia ‘a e kakai ‘o e ngaahi feitu‘u: pea nau feia ai kia Sihova ‘ani feilaulau-mōifua, ‘io, ‘ani feilaulau pongipongi mo e efiafi.

⁴Pea nau fai ‘a e Kātoanga Fale-lou‘akau, ‘o hangē ko e tohi, mo e ngaahi feilaulau-mōifua ‘i he ‘aho hokohoko, ‘o fai ki he tokolahi ‘o e mano na‘e tu‘u ‘i he konisitūtone, ‘a e tu‘utu‘uni ki hono ‘aho takitaha.

⁵Pea hili ia na‘a nau fai ‘a e feilaulau-mōifua tu‘u ma‘u, mo e feilaulau ‘o e fakamāhina fo‘ou, mo e ngaahi kātoanga tu‘utu‘uni ‘a Sihova na‘e toputapu, pea mo e feilaulau ‘a ia fuli pē na‘e fie ‘atu ‘ene me‘a ki he ‘Eiki ko ‘ene fa‘iteliha.

⁶Ko e ‘uluaki ‘o hono fitu ‘o e māhina na‘a nau kamata ai ‘a e ‘atu ‘a e feilaulau-mōifua kia Sihova: ka kuo te‘eki tanupou ‘a e Temipale ‘o Sihova.

⁷Pea na‘a nau ‘ange pa‘anga ki he kau tā maka, mo e kau tufunga; mo e me‘akai mo e me‘a inu mo e lolo ki he kau Saitoni mo e kau Taia, ke nau ‘omi ha ‘akau sita mei Lepanoni ki he tahi ‘o Siopa. ‘o hangē ko e faka‘atā mai ‘e Kōlesi ko e Tu‘i Pēsia.

⁸Pea ‘i he ta‘u ua ‘o ‘enau omi ki he fale ‘o ‘Elohimi ‘i Selusalema, ‘i hono ua ‘o e māhina, na‘e hanga ‘a Seluipepeli foha ‘o Saletili, mo Sisua foha ‘o Siosateki, pea mo e toe ‘o honau kāinga, ‘a e kau taula‘eiki mo e kau Līvai, mo kinautolu kotoa kuo omi mei he nofo pōpula ki Selusalema, pea nau vahe ‘a e kau Līvai, ‘o kamata meiate ia na‘e uofulu ta‘u ‘o fai hake, ke pule ki he ngāue ‘i he fale ‘o Sihova.

⁹Toki tutu‘u ‘a Sisua mo ‘ene fānau mo hono kāinga, mo Katemieli mo ‘ene fānau ‘a‘ana, ko e ha‘a Hotavaia,[6] ‘o nau kautaha ke pule ki he kakai na‘e fai ‘a e ngāue ‘i he fale ‘o ‘Elohimi — ko ha‘a Henatati mo ‘enau fānau mo honau kāinga Līvai.

¹⁰Pea ‘i he fai ‘e he kau langa fale ‘enau fakatoka ‘a e tu‘unga ‘o e Temipale ‘o Sihova, na‘a nau fokotu‘u ‘a e kau taula‘eiki kuo ‘ai honau teunga, pea ‘oku nau fakatalupite; ko e kau Līvai foki ko e ha‘a ‘Ēsafe ‘oku nau fakasimipale ke fai ‘a e Halelu‘ia kia Sihova, ‘o hangē ko e tu‘utu‘uni ‘a Tēvita ko e Tu‘i ‘Isileli.

¹¹Pea nau hiva fetāliaki ‘enau fai ‘a e fakamālō mo e fakafeta‘i kia Sihova, ‘o pehē, He ‘oku ne lelei. He ‘oku tolonga ‘o ta‘engata ‘ene ‘alo‘ofa ki ‘Isileli, Pea ‘ai ‘e he kakai ‘enau fu‘u tuē ‘i he fai ‘o e Halelu‘ia kia Sihova, koe‘uhi kuo fokotu‘u ‘a e tu‘unga ‘o e fale ‘o Sihova.

¹²Ka ko e tokolahi ‘o ha‘a taula‘eiki mo ha‘a Līvai mo e kau ‘ulumotu‘a, ko si‘i kau mātutu‘a kuo nau mamata ki he ‘uluaki fale, ‘i he fai ‘a e fokotu‘u tu‘unga ‘o e fale ko eni, ‘o nau mamata ai, na‘a nau ‘ai ‘enau fu‘u fākafoa; pea ko e tokolahi ē na‘e kalakalanga ko ‘enau fiefia:

¹³ko ia, na‘e ‘ikai ‘ilonga ki he kakai ‘a e longoa‘a ‘o e kaila fiefia, mo e longoa‘a ‘o e tangi ‘a e kakai; he ko e kaila ‘a e kakai ko e me‘a fakamanavahē, pea na‘e ongo mama‘o hono longoa‘a.