Read KO E TOH TAPU KATOA TONGA KO ‘ĒSELA 6 Bible Online

KO ‘ĒSELA 6 - KO E TOH TAPU KATOA TONGA bible

KO ‘ĒSELA 6

¹TOKI tu‘utu‘uni ‘e Kingi Talaiasi, pea na‘e kumi ‘i he fale tohi, ‘a ia na‘e tuku tauhi ai ‘a e ngaahi me‘a mahu‘inga ‘i Pāpilone.

²Pea na‘e ‘ilo ‘i ‘Akameta, ‘i he talitau‘anga, ‘i he vahefonua ‘o Mītia, ha takainga tohi, ‘a ia na‘e tohi hiki ai, ‘o pehē,

³“‘I he ‘uluaki ta‘u ‘o Kingi Kōlesi na‘e fai ‘e Kingi Kōlesi ha tu‘utu‘uni: “‘Ko e me‘a ki he fale ‘o e ‘Otua ‘i Selusalema, ke fai hono langa ‘o e fale ko ia, ‘a e potu ‘oku fai feilaulau ai, pea ke ‘ai ke kaukaua ‘a e fakatoka ‘o hono tu‘unga; ke kiupite ‘e onongofulu hono mā‘olunga, pea ke kiupite ‘e onongofulu hono māukupu;

⁴ke ‘otu ‘e tolu maka lalahi, pea ‘akau ‘a e ‘otu ‘e taha,[13] ‘e ‘atu ‘a e totongi mei he fale ‘o e tu‘i.

⁵Kae‘uma‘ā ko e nāunau koula mo siliva ‘o e fale ‘o e ‘Otua, ‘a ia na‘e to‘o ‘e Nepukanesa mei he temipale ‘i Selusalema, ‘o ‘omi ki Pāpilone, ‘e fakafoki ia ‘o toe ‘ave ki he temipale ‘i Selusalema takitaha ki hono feitu‘u: ‘io, te ke fakahū ki he fale ‘o e ‘Otua.

⁶“Pea ko eni, ‘e Tatenai, kōvana ‘o Tu‘a-vaitafe, mo Sētali-Posenai, mo ho‘omo fa‘ahi ko e kau ‘Afa‘asaka ‘oku nofo ‘i Tu‘a-vaitafe, mou tu‘u ke ‘atā.

⁷‘Oua ‘e ala ki he ngāue ‘o e fale ‘o e ‘Otua ko ē; tuku pē ‘a e kōvana ‘o e kau Siu mo e mātu‘a Siu ke fai ‘a e langa ‘o e fale ‘o e ‘Otua ko ē ‘i hono tu‘unga.

⁸“Kae‘uma‘ā ‘oku ou fai tu‘utu‘uni ‘e au ki he me‘a te mou fai ke tokoni ki he mātu‘a Siu ko ena ‘i he langa ‘o e fale ‘o e ‘Otua ko ē. ‘Io, ‘e mātu‘aki ‘atu mei he koloa ‘a e tu‘i, ‘io mei he tukuhau ‘o Tu‘a-vaitafe na, ha pa‘anga tokoni ki he tu‘unga tangata na, ke ‘oua na‘a ta‘ofi ‘enau ngāue.

⁹Pea ‘ilonga ha me‘a ‘oku nau masiva ai — ‘a e fanga pulu mui, mo e sipi tangata, mo e fanga lami, ke feia ‘aki ‘a e feilaulau-mōifua ki he ‘Otua ‘o Langi, ‘a e uite, ‘a e māsima, ‘a e uaine mo e lolo, ha me‘a pē ‘e tala ‘e he kau taula‘eiki ‘i Selusalema — ke ‘ange pē ia kiate kinautolu ‘i he ‘aho kotoa pē ke ‘oua na‘a hala.

¹⁰Koe‘uhi ke nau ‘atu feilaulau namu kakala ma‘u pē ki he ‘Otua ‘o langi, mo hūfia ‘a e mo‘ui ‘a e tu‘i mo ‘ene fānau.

¹¹“Kae‘uma‘ā kuo u fai tu‘utu‘uni ‘e au, Ka ai ha tangata te ne liliu ‘a e fekau ni, ke to‘o lango mei hono fale, pea hiki ia ‘o fakatūfana‘i;[14] ai pea ‘e ngaohi hono fale ko e tu‘unga ‘oto‘ota ko e tautea ‘o e me‘a ko ia.

¹²“Pea ko e ‘Otua, ‘a ia ‘oku ne tuku ke ‘afio hono huafa ‘i he potu ko ia, ‘ofa ke ne tulaki ‘a e tu‘i fuli pē mo e kakai te nau ala‘aki ke liliu, ke maumau ‘a e fale ko ‘ena ‘o e ‘Otua ‘oku ‘i Selusalema. “Ko au Talaiasi kuo u tu‘utu‘uni: ke nima mo e va‘e ‘a e fai ki ai.”

¹³Pea ko Tatenai, ‘a e kōvana ‘o Tu‘a-vaitafe, mo Sētali-posenai, mo honau fa‘ahi, ‘i he ‘omi ‘a e fekau pehē ‘a Talaiasi, na‘a nau tōtōivi ‘i he fai ki ai.

¹⁴Ko ia ko e mātu‘a Siu na‘a nau fai ‘a e langa, ‘o nau tu‘umālie, ko e me‘a ‘i he lea fakapalofisai ‘a e palōfita ko Hākeai, mo Sākalaia ko e foha ‘o ‘Ito. Pea nau langa ia mo faka‘osi, ‘o taau mo e tu‘utu‘uni ‘a e ‘Otua ‘o ‘Isileli, mo e tu‘utu‘uni ‘a Kōlesi, mo Talaiasi, mo ‘Atasease Tu‘i Pēsia.

¹⁵Pea na‘e faka‘osi ‘a e fale ko ia ‘i hono ‘aho tolu ‘o e māhina ko ‘Ātali, ‘i hono ono ‘o e ta‘u ‘o e pule ‘a Kingi Talaiasi.

¹⁶Pea ko ha‘a ‘Isileli, mo e kau taula‘eiki, mo e kau Līvai, mo e ha‘a fakapōpula kātoa, na‘a nau fai fiefia ‘a e huufi ‘o e fale ko ia ‘o e ‘Otua.

¹⁷Pea na‘a nau ‘atu ‘i he huufi ‘o e fale ko ia ‘o e ‘Otua ha pulu ‘e teau, mo e sipi tangata ‘e uangeau, mo e lami ‘e fāngeau; pea ko e kosi tangata ‘e hongofulu mā ua ke lau tatau mo e ngaahi matakali ‘Isileli: ko e feilaulau-angahala ia ma‘a ‘Isileli kātoa.

¹⁸Pea nau fokotu‘u ‘a e kau taula‘eiki ‘i honau ngaahi lakanga, mo e kau Līvai ‘i honau ngaahi kalasi, ke fai ‘a e tauhi ‘o e ‘Otua ‘oku ‘i Selusalema; ‘o hangē ko ia ‘oku tu‘u ‘i he Tohi ‘a Mōsese.”

¹⁹Pea fai ‘e he kau fakapōpula ‘a e Pāsova ‘i he ‘aho hongofulu mā fā ‘o e ‘uluaki māhina.

²⁰He ko e kau taula‘eiki mo e kau Līvai kuo nau fakama‘a kinautolu kotoa pē; kuo nau ma‘a kotoa pē: pea nau tāmate‘i ‘a e Pāsova ma‘a e kau fakapōpula kātoa, pea ma‘a honau kāinga taula‘eiki, pea ma‘anautolu.

²¹Pea ko e kau ‘Isileli kuo foki mei he pōpula, mo kinautolu kuo fakamavahe mei he fakalielia ‘o e kakai ‘o e fonua, pea kuo hiki kiate kinautolu ke feinga kia Sihova ko e ‘Otua ‘o ‘Isileli, na‘a nau hanga ‘o kai.

²²Pea nau fai fiefia ‘a e Kātoanga Tapu Lēvani, ‘o ‘aho fitu; he kuo fakafiefia‘i kinautolu ‘e Sihova; he kuo ne fakafinangalo lelei kiate kinautolu ‘a e Tu‘i ‘Āsilia,[15] ke poupou ki honau nima ‘i he ngāue ki he fale ‘o ‘Elohimi ko e ‘Otua ‘o ‘Isileli,