Read KO E TOH TAPU KATOA TONGA KO ‘ĒSELA 7 Bible Online

KO ‘ĒSELA 7 - KO E TOH TAPU KATOA TONGA bible

KO ‘ĒSELA 7

¹PEA hili ‘a e ngaahi me‘a ko ia, ‘i he taimi na‘e pule ai ‘a e Tu‘i Pēsia ko ‘Atasease, ko ‘Ēsela foha ‘o Selaia, foha ‘o ‘Asalaia, foha ‘o Hilikaia,

²foha ‘o Sālumi, foha ‘o Sātoki,

³foha ‘o ‘Ahitupi, foha ‘o ‘Āmalia, foha ‘o ‘Asalaia, foha ‘o Melaioti,

⁴foha ‘o Selaia, foha ‘o ‘Osi, foha ‘o Puki, foha ‘o ‘Apisua,

⁵foha ‘o Finiasi, foha ‘o ‘Eliesa, foha ‘o ‘Ēlone ko e taula‘eiki lahi —

⁶ko e ‘Ēsela ko ia na‘a ne ‘alu hake mei Pāpilone; pea ko e sikalaipe poto ia ‘i he Lao ‘a Mōsese, ‘a e lao na‘e ‘omi ‘e Sihova ko e ‘Otua ‘o ‘Isileli: pea ko e me‘a ‘i he kau mo ia ‘a Sihova ko hono ‘Otua, ko ia na‘e ‘ange ki ai ‘e he tu‘i ‘a e me‘a kotoa na‘a ne kole ki ai.

⁷Na‘e ‘alu hake foki ki Selusalema ha ni‘ihi ‘o ha‘a ‘Isileli, mo e ni‘ihi ‘o ha‘a taula‘eiki, mo ha‘a Līvai, mo e kau hiva, mo e kau le‘o matapā, mo e kau Netinimi, ‘i he fitu ta‘u ‘o Kingi ‘Atasease.

⁸Pea ne a‘u ki Selusalema ‘i hono māhina nima; ko e fitu ta‘u ai pē ia ‘o e tu‘i.

⁹He ‘i he ‘uluaki ‘o e ‘uluaki māhina na‘e kamata ‘ene ‘alu hake mei Pāpilone, pea ‘i he ‘uluaki ‘i hono māhina nima na‘a ne a‘u ki Selusalema: na‘e pehē ‘a e kau lelei mo ia ‘a hono ‘Otua.

¹⁰He kuo tuku ‘e ‘Ēsela ‘a hono loto ke feinga‘i ‘a e lao ‘a Sihova, pea ke fai ki ai, pea ke ako ki ‘Isileli hono tu‘utu‘uni mo e konisitūtone.

¹¹Pea ko eni ‘a e hiki ‘o e tohi na‘e ‘ange ‘e Kingi ‘Atasease kia ‘Ēsela ko e taula‘eiki, ‘a ia ko e sikalaipe foki, ko e sikalaipe ‘o e lea ‘o e ngaahi tu‘utu‘uni ‘a Sihova, mo ‘ene ngaahi fekau ki ‘Isileli,

¹²“Ko au ‘Atasease[16] ko e tu‘i ‘o e ngaahi tu‘i, “Kia ‘Ēsela ko e taula‘eiki, ko e sikalaipe ‘o e lao ‘o e ‘Otua ‘o Langi, ko e punake, ‘esetelā.[17]

¹³‘Oku ou tu‘utu‘uni ke ‘ilonga ha kakai ‘Isileli ‘i hoku pule‘anga, mo honau taula‘eiki mo kau Līvai, ‘oku loto ke ‘alu ki Selusalema, ke nau ō mo koe.

¹⁴Ko eni ‘oku fekau atu koe ‘e he tu‘i mo hono Fitu‘i Minisitā ke ‘eke ki Siuta mo Selusalema ‘o taau mo e lao ‘a ho ‘Otua ‘oku ke to‘o;

¹⁵pea ke ‘ave ‘a e siliva mo e koula kuo foaki ‘e he tu‘i mo ‘ene kau minisitā ki he ‘Otua ‘o ‘Isileli, ‘a ia ‘oku ‘i Selusalema hono ‘afio‘anga, mo e siliva mo e koula kotoa.

¹⁶Te ke ma‘u ‘i he vahefonua ‘o Pāpilone, fakataha mo e me‘a‘ofa ‘a e kakai, mo e kau taula‘eiki ‘oku nau foaki ma‘a e fale ‘o honau ‘Otua ‘oku ‘i Selusalema.

¹⁷Ko ia, ke ke mātu‘aki fakatau ‘aki ‘a e pa‘anga ni ‘a e fanga pulu, ‘a e fanga sipi tangata, ‘a e fanga lami, mo e mahoa‘a ke kiki ‘aki, mo honau kava, ‘o feia ‘aki ‘i he ‘ōlita ‘o e fale ‘o homou ‘Otua ‘oku ‘i Selusalema.

¹⁸Pea ka ai ha me‘a ‘e hā lelei kiate koe mo ho kāinga ke fai‘aki hono toe ‘o e siliva mo e koula, pea mou fai ia ‘o taau mo e finangalo ‘o homou ‘Otua.

¹⁹Pea ko e nāunau ‘oku tuku kiate koe ki he ngāue ‘o e fale ‘o ho ‘Otua, fokotu‘u ia ‘i he ‘ao ‘o e ‘Otua ‘o Selusalema.

²⁰Pea ka ai mo ha me‘a ‘e ‘aonga ki he fale ‘o ho ‘Otua, ‘a ia ‘oku hā kiate koe ‘oku totonu ke ‘ange, pea ‘ange mei he fale koloa ‘o e tu‘i.

²¹Pea ko au, ‘a au Kingi ‘Atasease, ‘oku ou fai tu‘utu‘uni ki he kau tauhi koloa ‘o Tu‘a-vaitafe na, ke ‘ilonga ha me‘a ‘e tangi ki ai ‘e ‘Ēsela taula‘eiki, ko e sikalaipe ‘o e lao ‘o e ‘Otua ‘o Langi, mou mātu‘aki fai, ‘o a‘u ki he teau‘i taleniti siliva, mo e teau‘i efa ‘o e uite,

²²pea ki he teau‘i pate ‘o e uaine, pea ki he teau‘i pate ‘o e lolo, pea ko e māsima ‘e ‘ikai ha fakangatangata.

²³‘Ilonga ha me‘a ‘oku tu‘utu‘uni ‘e he ‘Otua ‘o Langi, ke fai pau ki ai ma‘a e fale ‘o e ‘Otua ‘o Langi; he ko e ‘uma‘ā ke tō ha houhau ki he pule‘anga ‘o e tu‘i mo ‘ene fānau?

²⁴“Kae‘uma‘ā ‘oku mau fakahā kiate kimoutolu, ka ‘ilonga ha taula‘eiki, pe Līvai, ha tama hiva, ha le‘o matapā, ha Netinimi, mo hai fua ‘oku ngāue ‘i he fale ‘o e ‘Otua ni, ‘oku tapu ke ‘eke kiate kinautolu ha tukuhau, pe ha tute, pe ha totongi hala.

²⁵“Pea ko koe, ‘Ēsela, ke ke fakanofo ha kau ‘ōfisa, mo ha kau fakamaau, ‘o taau mo e poto ‘a ho ‘Otua ‘oku kau mo koe; ke nau fakamaau ‘a e kakai kotoa ‘i Tu‘a-vaitafe na, ‘a kinautolu ‘oku ‘ilo ‘a e lao ‘a ho ‘Otua; pea ke ke hīnoi‘i ‘a kinautolu ‘oku ‘ikai.

²⁶Pea ‘ilonga kinautolu ‘oku ‘ikai ke fai ki he lao ‘a ho ‘Otua, mo e lao ‘a e tu‘i, pea ke mātu‘aki fai hono fakamāu‘i, pe ke mate, pe ke fakahee‘i, pe ke to‘o ‘ene koloa, pe ke lī ki he pilīsone.”

²⁷Mālō mo Sihova, ko e ‘Otua ‘o hotau tupu‘anga, ‘a ia kuo ne ‘ai ha me‘a pehē ki he finangalo ‘o e tu‘i; ke ‘ai ke matamatalelei ‘a e fale ‘o Sihova ‘oku ‘i Selusalema;

²⁸pea kuo ne fakahōifua ‘a e tu‘i kiate au, mo ‘ene kau minisitā, mo e hou‘eiki lalahi ‘o e tu‘i. Ko ia ne u mālohi ‘i he kau pehē mai ‘a Sihova ko hoku ‘Otua; pea u tānaki mai mei ‘Isileli ha hou‘eiki ke ‘alu hake mo au.