Read KO E TOH TAPU KATOA TONGA KO ‘ĒSELA 8 Bible Online

KO ‘ĒSELA 8 - KO E TOH TAPU KATOA TONGA bible

KO ‘ĒSELA 8

¹PEA ko ‘eni ia ‘a e hou‘eiki ‘ulumotu‘a, mo e hohoko ‘o e kakai na‘e ‘alu hake mo au mei Pāpilone ‘i he taimi na‘e pule ‘a Kingi ‘Atasease.

²‘I ha‘a Finiasi, ko Kēsome: ‘i ha‘a ‘Ītama, ko Tāniela: ‘i ha‘a Tēvita, ko Hātusi.

³‘I he fāmili ‘o Sekonaia, ‘i ha‘a Pālosi, ko Sākalaia: pea na‘e tu‘u mo ia ‘i he tohi hohoko ‘o e kau tangata ‘a e toko teau mā nimangofulu.

⁴‘I ha‘a Pāhati-Moape, ko ‘Elihoinai foha ‘o Selaia; pea na‘e ō mo ia ha tu‘unga tangata ‘e toko uangeau.

⁵‘I ha‘a ko Sekonaia foha ‘o ‘Iakasili;[18] pea na‘e ō mo ia ha tu‘unga tangata ‘e toko tolungeau.

⁶Pea ‘i ha‘a ‘Ātini, ko ‘Ēpeti foha ‘o Sionatane; pea na‘e ō mo ia ha tu‘unga tangata ‘e toko nimangofulu.

⁷Pea ‘i ha‘a ‘Īlami, ko ‘Aisea foha ‘o ‘Atalaia; pea na‘e ō mo ia ha tu‘unga tangata ‘e toko fitungofulu.

⁸Pea ‘i ha‘a Sefataia, ko Sepataia foha ‘o Maikeli; pea na‘e ō mo ia ha tu‘unga tangata ‘e toko valungofulu.

⁹‘I ha‘a Sioape, ko ‘Opataia foha ‘o Sīheli; pea na‘e ō mo ia ha tu‘unga tangata ‘e toko uangeau mā hongofulu mā valu.

¹⁰Pea ‘i ha‘a … ko Selomiti foha ‘o Siosifaia;[19] pea na‘e ō mo ia ha tu‘unga tangata ‘e toko teau mā onongofulu.

¹¹Pea ‘i ha‘a Pēpai, ko Sākalaia foha ‘o Pēpai; pea na‘e ō mo ia ha tu‘unga tangata ‘e toko uofulu mā valu.

¹²Pea ‘i ha‘a ‘Asakati, ko Siohanani foha ‘o Hakatani; pea na‘e ō mo ia ha tu‘unga tangata ‘e toko teau mā hongofulu.

¹³Pea ‘i he ha‘a ‘Atonaikamu Kimui — pea ko honau hingoa ‘eni, ko ‘Elifeleti, ko Sieli, mo Sēmaia; pea na‘e ō mo kinautolu ha tu‘unga tangata ‘e toko onongofulu.

¹⁴Pea ‘i ha‘a Pikivai, ko ‘Ūtai, mo Sāputi; pea na‘e ō mo kinaua ha tu‘unga tangata ‘e toko fitungofulu.

¹⁵Pea u fakataha ‘a kinautolu ki he vaitafe ‘oku tafe ki ‘Āhava; pea mau ‘apitanga ai ‘o ‘aho tolu: pea na‘a ku sivi ‘a e kakai mo e kau taula‘eiki, pea na‘e ‘ikai te u ‘ilo ai ha ni‘ihi ‘i ha‘a Līvai.

¹⁶Pea u ui mai ‘a ‘Eliesa, ‘a ‘Alieli, ‘a Sēmaia, pea mo ‘Elinetane, mo Sialipi, mo ‘Elinetane mo Nētane, mo Sākalaia, mo Mēsuilame ko e hou‘eiki; ko Sioialipi foki, mo ‘Elinetane na‘e fai ako

¹⁷Pea u fekau kinautolu kia ‘Ito ko e tu‘ukimu‘a ‘i he potu ko Kasifia: pea u ‘a‘au kiate kinautolu ‘a e ngaahi lea te nau fai kia ‘Ito mo honau kāinga ko e kau Netinimi ‘i he potu ko Kasifia, ke ‘omi kiate kimautolu ha ni‘ihi ke tauhi ‘a e fale ‘o homau ‘Otua.

¹⁸Pea ‘i he kau lelei mai ‘a homau ‘Otua na‘a nau ‘omi ma‘amautolu ‘a ‘Isisekeli ‘i ha‘a Māhali, foha ‘o Līvai, foha ‘o ‘Isileli; mo Selepaia mo ‘ene fānau mo hono kāinga, ko e toko hongofulu mā valu;

¹⁹mo Hasapaia, pea ha‘u mo ia ‘a Siesaia ‘i ha‘a Mēlali, mo hono kāinga mo ‘enau fānau, ko e toko uofulu.

²⁰Pea ‘i he kau Netinimi, ‘a ia ne foaki ‘e Tēvita mo e hou‘eiki ke ngāue ki he kau Līvai, na‘e toko uangeau mā uofulu ‘a e kau Netinimi: na‘e tu‘u honau hingoa kotoa ‘i he tohi.

²¹Pea u fanongonongo ha ‘aukai ki he potu ko ia ‘i he ve‘e vaitafe ‘o ‘Āhava, ke mau fakavaivai‘i kimautolu ‘i he ‘ao ‘o homau ‘Otua, ke kole meiate ia ‘a e hala totonu ma‘amautolu, pea ma‘a homau ngaahi fāmili, pea ma‘a ‘emau koloa kotoa.

²²He na‘a ku mā ke kole ki he tu‘i ha kau tau, mo ha kau heka hoosi ke tokoni kiate kimautolu ke fai mo e fili ‘i he hala: he kuo mau lea ki he tu‘i, ‘o pehē, ‘Oku kau lelei homau ‘Otua mo kinautolu kotoa ‘oku feinga kiate ia; ka ko hono māfimafi mo hono houhau ‘oku tau‘i ‘a kinautolu ‘oku li‘aki ia.

²³Pea na‘a mau ‘aukai, mo hū tōtōaki ki homau ‘Otua ki he me‘a ko ia: pea na‘e ongo atu ‘emau hū.

²⁴Pea u vahe‘i mei he hou‘eiki taula‘eiki ha toko hongofulu mā ua, pea mo Selepaia, Hasapaia mo hona kāinga ‘e toko hongofulu, pea u fua tautau kiate kinautolu ‘a e siliva,

²⁵mo e koula, mo e nāunau, ‘io, ‘a e me‘a‘ofa ki he fale ‘o homau ‘Otua, ‘a ia he hapai ‘e he tu‘i mo ‘ene kau minisitā, mo hono hou‘eiki, mo e kau ‘Isileli kātoa na‘e ‘iloa mai:

²⁶‘io, na‘a ku fua ki honau nima ‘a e taleniti siliva ‘e onongeau mā nimangofulu; mo e nāunau siliva fe‘unga mo e taleniti ‘e teau; ko e koula fe‘unga mo e taleniti ‘e teau,

²⁷mo e ipu koula ‘e uofulu fe‘unga mo e afe‘i talaiki; mo e ongo ipu palasa lanu koula, faka‘ofo‘ofa, mahu‘inga tatau mo e koula.

²⁸Pea u pehē kiate kinautolu; Ko kimoutolu ko e fa‘ahinga kuo tapu kia Sihova, pea ‘oku tapu mo e nāunau ni, pea ko e siliva mo e koula ko e feilaulau-‘ofa kia Sihova ko e ‘Otua ‘o homou tupu‘anga.

²⁹Mou lamasi, pea tauhi, kae‘oua ke mou fua ‘i he ‘ao ‘o e hou‘eiki taula‘eiki mo Līvai, mo e hou‘eiki ‘ulumotu‘a ‘o ‘Isileli, ‘i Selusalema, ‘i he ngaahi loki ‘o e fale ‘o Sihova.

³⁰Ko ia, na‘e tali ‘e he kau taula‘eiki mo e kau Līvai ‘a e mamafa ‘o e siliva, mo e koula, mo e nāunau, ke ‘ave ki Selusalema, ki he fale ‘o homau ‘Otua.

³¹Pea na‘a mau hiki fononga mei he vaitafe ‘o ‘Āhava ‘i he ‘aho hongofulu mā ua ‘o e ‘uluaki māhina, ke ‘alu ki Selusalema; pea na‘e kau mai homau ‘Otua, ‘o ne hamusi kimautolu mei he nima ‘o e fili mo e tokamalumu ‘i he hala.

³²Pea mau a‘u ki Selusalema, ‘o mau nofo ai ‘o ‘aho tolu.

³³Pea ‘i hono fā ‘o e ‘aho na‘e fua ‘a e siliva, mo e koula, mo e nāunau, ‘i he fale ‘o homau ‘Otua, ki he nima ‘o Melemoti foha ‘o ‘Ūlaia ko e taula‘eiki; pea na‘e tu‘u mo ia ‘a ‘Eliesa foha ‘o Fineasi; pea na‘e tu‘u mo kinaua ‘a Siosapati foha ‘o Sisua, mo Noataia foha ‘o Pinui ko e ongo Līvai.

³⁴Na‘e fai ki he lau mo e mamafa ‘o e me‘a kotoa; pea na‘e tohi ‘a e mamafa kotoa ‘i he taimi ko ia.

³⁵Ko e kau fakapōpula, ‘a ia kuo ha‘u mei he nofo ko ē, na‘a nau ‘atu feilaulau-mōifua ki he ‘Otua ‘o ‘Isileli, ko e pulu ‘e hongofulu mā ua ma‘a ‘Isileli kātoa, ko e sipi tangata ‘e hivangofulu mā ono, ko e lami ‘e fitungofulu mā fitu, mo e kosi tangata ‘e hongofulu mā ua mo‘o feilaulau-angahala: na‘e mōifua ‘a e me‘a ko ia kotoa kia Sihova.

³⁶Pea na‘a nau ‘ange ‘a e tohi fekau ‘a e tu‘i ki he ngaahi tu‘i fakale‘o, pea ki he hou‘eiki kōvana ‘i Tu‘a-vaitafe: ‘a ia na‘a nau tokoni ki he kakai mo e fale ‘o ‘Elohimi.