Read KO E TOH TAPU KATOA TONGA KO ‘ĒSELA 9 Bible Online

KO ‘ĒSELA 9 - KO E TOH TAPU KATOA TONGA bible

KO ‘ĒSELA 9

¹PEA kuo ‘osi ‘a e ngaahi me‘a ko ia na‘e ‘unu‘unu mai kiate au ‘a e hou‘eiki, ‘o nau pehē, Tā ko e kakai ‘Isileli, mo e kau taula‘eiki, mo e kau Līvai, ‘oku ‘ikai te nau nofo mavahe mei he ngaahi kakai ‘o e ngaahi fonua ‘i honau tō‘onga fakalielia — ‘a e Kēnani, ‘a e Heti, ‘a e Pēlisi, ‘a e Siepusi, ‘a e ‘Āmoni, ‘a e Moape, ‘a e ‘Isipite, pea mo e ‘Āmoli.

²He kuo nau to‘o honau ngaahi ‘ōfefine mo‘onau ‘unoho, pea ke ‘unoho mo ‘enau fānau; pea kuo fefiofi ‘a e hako tapu pea mo e ngaahi kakai ‘o e ngaahi fonua: pea ‘oku takimu‘a ‘a e hou‘eiki mo e kau pule ‘i he angahala ko ē.

³Pea ‘i he‘eku fanongo ki he ngaahi lea ko ia, ne u hae hifo hoku kofu, mo hoku pulupulu, pea u ta‘aki ‘ani fulufulu ‘o hoku ‘ulu mo hoku fakapau, pea u nofo hifo kuo u mo‘utāfu‘ua.

⁴Pea na‘e fakataha mai kiate au ‘a kinautolu fua pē na‘e tailiili ‘i he ngaahi folofola ‘a e ‘Otua ‘o ‘Isileli, koe‘uhi ko e angahala ‘a e kau fakapōpula: ka ko au na‘a ku nofo mo‘o tāfu‘ua, ‘o a‘u ki he feitu‘ula‘ā feilaulau efiafi.

⁵Pea ‘i he fai ‘o e feilaulau efiafi na‘a ku tu‘u hake mei he‘eku fakavaivai, pea kuo mahae hoku kofu mo hoku pulupulu; pea u tū‘ulutui, ‘o fola hoku nima kia Sihova ko hoku ‘Otua.

⁶Pea u pehē, ‘E hoku ‘Otua, ‘oku ou mā: ‘io, ‘oku ou laea ke hanga hake ki he ‘Afiona ko hoku ‘Otua: he kuo fokotu‘u ‘emau kovi, ‘o fakafale mai, pea kuo hakehake ‘emau hia ‘o a‘u ki langi.

⁷Talutalu ‘emau ngaahi kui ko e koto hia pē kimautolu, ‘o a‘u ki he ‘aho ni: pea ko e me‘a ‘i he‘emau ngaahi kovi ne tuku kimautolu, ‘a homau ngaahi tu‘i mo homau kau taula‘eiki ki he nima ‘o e ngaahi tu‘i ‘o e fonua kehekehe, ki he heletā, ki he taki pōpula, pea ki he vete mo e laea, ‘o hangē ko ia ‘oku lolotonga ni.

⁸Pea ko eni, ‘i he momo‘i taimi ni, kuo ai ha ‘ofa meia Sihova ko homau ‘Otua, he tuku homau toenga ke hao, mo e tuku ha‘amau fa‘o ‘i hono Potu Tapu, ke fai ‘e homau ‘Otua ha fakamaama ‘o homau mata, mo tuku ke mau ki‘i mānava hake ‘i he‘emau pōpula.

⁹He ko e kau pōpula kimautolu, ka ‘i he‘emau pōpula kuo ‘ikai li‘aki kimautolu ‘e homau ‘Otua, ka kuo ne le‘ei mai ha ‘ofa ‘a e ngaahi Tu‘i Pēsia kiate kimautolu, ke ‘omai hamau fakamānava hake, ke langa hake ‘a e fale ‘o homau ‘Otua, pea ke fokotu‘u hono ngaahi potu maumau, pea ke ‘omi hamau ‘ā ‘i Siuta mo Selusalema.

¹⁰Pea ka kuo pehē, pea ko e hā ai ‘emau lea ‘e fai, ‘e homau ‘Otua? he kuo mau li‘aki ho‘o ngaahi tu‘utu‘uni,

¹¹‘a ia na‘a ke fakafai ‘i ho‘o kau tamaio‘eiki ko e kau palōfita, ho‘o folofola mai, ‘o pehē, Ko e fonua ‘oku mou ‘alu ke ma‘u ko e fonua ‘uli ia, ko e me‘a ‘i he ‘uli ‘a e kakai ‘o e ngaahi feitu‘u, ‘a ‘enau ngaahi fakalielia, ‘a ia kuo fonu ai ‘a e fonua mei potu ki potu ‘i he‘enau tō‘onga mousa‘a.

¹²Pea ko ia, ‘oua na‘a ‘ange ho‘omou fānau fefine ki he‘enau fānau tangata, pea ko ‘enau fānau fefine ‘oua te mou ‘omi ke ‘unoho mo ho‘omou fānau tangata; pea ‘oua te mou feinga‘i ha‘anau tu‘umālie pe ko ha‘anau lelei, ‘o ta‘engata: koe‘uhiā ke mou mālohi, pea ke mou kai ‘a e lelei ‘o e fonua, ‘o tuku ia ko e tofi‘a ki ho‘omau fānau, ‘o ta‘engata.

¹³Pea hili ‘a e fu‘u me‘a kuo hoko kiate kimautolu, koe‘uhi ko ‘emau ngaahi ngāue kovi, pea koe‘uhi ko ‘emau hia lahi — ‘osi, kuo faka‘ange‘ange ho‘o tautea ‘emau kovi, ‘e homau ‘Otua, pea kuo ke tuku hamau fu‘u toenga pehē —

¹⁴pea te mau toe paetaku‘i koā ho‘o tu‘utu‘uni, ‘o fakakāinga mo e kakai ‘oku fai ‘a e ngaahi fakalielia ko ē? ‘Ikai koā te ke houhau mai, kae‘oua ke mau ‘osi; ‘o ‘oua ‘e ai hamau toenga, pe ha hao?

¹⁵‘E Sihova, ko e ‘Otua ‘o ‘Isileli, ‘oku tonuhia ‘a e ‘Afiona; he ‘oku ke me‘a mai ko e toenga kimautolu kuo hao: pea vakai ‘oku mau ‘i ho ‘ao ko e koto hia; he ‘oku ‘ikai matu‘u ha taha ‘i ho ‘ao koe‘uhi ko e me‘a ko ia.