Read KO E TOH TAPU KATOA TONGA KO NEHEMAIA 1 Bible Online

KO NEHEMAIA 1 - KO E TOH TAPU KATOA TONGA bible

KO NEHEMAIA 1

¹KOE fakamatala ‘a Nehemaia foha ‘o Hakalaia. Pea ko eni, ‘i he māhina ko Kislieu, ‘i he ta‘u ko hono uofulu, ‘oku ou nofo ‘i Sūsani Loto kolo,

²mo e ha‘u ‘a Hānani, ko e taha ‘i hoku kāinga, ‘a ia mo ha tu‘unga me‘a mei Siuta: pea u huhū kiate kinautolu pe kuo fēfē ‘a e kau Siu na‘e hao atu, ‘a ia ko e toe ‘o e fakapōpula,[1] pea fēfē mo Selusalema.

³Pea nau tali, Ko e toenga ‘oku toe mei he kau fakapōpula ‘i he vahefonua na[2] ‘oku nau tu‘utāmaki lahi, pea ko e koto ta‘etoka‘i: ko e ‘ā foki ‘o Selusalema ko e koto maumau, pea ko e ngaahi matanikolo kuo tūngia.

⁴Pea ‘i he‘eku fanongo leva ki he ngaahi lea ko ia, na‘a ku nofo hifo, ‘o tangi, pea na‘e ‘aho lahi ‘eku fakamamahi; pea u ‘aukai mo hū ‘i he ‘ao ‘o e ‘Otua ‘o Langi.

⁵Pea u pehē, ‘Ēī Sihova koe ‘Otua ‘o Langi, ko e ‘Otua Lahi mo Fakailifia, ‘a e ‘Afiona ‘oku tauhi ‘a e Kovinānite mo e ‘ofa ma‘anautolu ‘oku ‘ofa kiate koe mo tauhi ho‘o ngaahi tu‘utu‘uni: ke ke fakaongo hifo mu‘a,

⁶pea ke ‘ā ho fofonga, ke ke ongo‘i ‘a e lotu ‘a ho‘o tamaio‘eiki ko au, ‘a ia kuo u fai ni ‘i ho ‘ao he ‘aho mo e pō, koe‘uhi ko ho‘o kau tamaio‘eiki ko ha‘a ‘Isileli, he‘eku vete ‘a e hia ‘a ha‘a ‘Isileli, ‘a ia kuo mau fai ki he ‘Afiona: ‘io, ko au mo hoku tupu‘anga kuo mau hia.

⁷Kuo mau mātu‘aki fai fakakākā ki he ‘Afiona, pea kuo ‘ikai te mau tauhi ‘a e ‘ū tu‘utu‘uni mo fekau mo e konisitūtone, ‘a ia na‘a ke tu‘utu‘uni ki ho‘o sevāniti ko Mōsese.

⁸‘Ē, ke ke manatua ‘a e folofola na‘a ke fai ki ho‘o sevāniti ko Mōsese, ‘o pehē, Kapau te mou fai angahala, te u veteki kimoutolu ki he ngaahi kakai:

⁹ka ‘o kapau te mou foki kiate au, ‘o tauhi ‘eku ngaahi tu‘utu‘uni, mo fai ki ai; neongo ‘oku ai ha ni‘ihi ‘i ho‘o kau fakahē ‘oku ‘i he taupotu ‘o langi, ka te u tānaki kinautolu mei ai, pea te u ‘omi kinautolu ki he potu kuo u fili ke ‘afio ai hoku hingoa.

¹⁰Pea ko eni ia ho‘o kau tamaio‘eiki mo ho‘o kakai, ‘a ia kuo ke huhu‘i ‘aki ho ivi lahi, mo ho nima mālohi.

¹¹‘Ātonai ē, ke ke fakaongo hifo mu‘a ki he hū ‘a ho‘o tamaio‘eiki ko au, mo e hū ‘a ho‘o kau tamaio‘eiki, ‘a kinautolu ‘oku fai manako ‘enau ‘apasia ki ho huafa, pea ke fakamonū‘ia mu‘a ho‘o tamaio‘eiki ko au he ‘aho ni, ‘o tuku ke hōifua mai ‘a e tangata ni kiate au. (He ko ha tauhi kava au ‘a e tu‘i.)