Read KO E TOH TAPU KATOA TONGA KO NEHEMAIA 11 Bible Online

KO NEHEMAIA 11 - KO E TOH TAPU KATOA TONGA bible

KO NEHEMAIA 11

¹PEA na‘e nofo ‘a e hou‘eiki ‘o e kakai ‘i Selusalema: pea ko e kakai na‘e toe na‘a nau pāloti ke ‘omi ha vahehongofulu ‘e taha ke nofo‘ia ‘a Selusalema ko e Kolo Tapu, kae nofo ‘i he ngaahi kolo ‘a e vahe ‘e hiva.

²Pea fakamālō ‘e he kakai ki he tu‘unga tangata kotoa pē na‘e tomomate ke nofo‘ia ‘a Selusalema.

³Pea ko eni ‘a e hou‘eiki ‘o e vahe fonua na‘e nofo ‘i Selusalema: (ka ‘i he ngaahi kolo ‘o Siuta na‘e nofo takitaha ki hono tofi‘a mo hono kolo, ‘io, ‘a ‘Isileli, ‘a e kau taula‘eiki, mo e kau Līvai, mo e kau Netinimi, mo e hako ‘o e kau Tamaio‘eiki ‘a Solomone.

⁴Pea ‘i Selusalema na‘e nofo ha ni‘ihi ‘o ha‘a Siuta mo ha‘a Penisimani): ‘i ha‘a Siuta: ko ‘Āsaia foha ‘o ‘Ūsaia, foha ‘o Sākalaia, foha ‘o ‘Amalaia, foha ‘o Sefataia, foha ‘o Mahalaleli, ‘i he hako ‘o Felesi;

⁵mo Ma‘aseia foha ‘o Paluki, foha ‘o Koli-hose, foha ‘o Hāsaia, foha ‘o ‘Āsaia, foha ‘o Sioialipi, foha ‘o Sākalaia, hako ‘o ha‘a Sailo.

⁶Ko e tokolahi ‘o ha‘a Fēlesi na‘e nofo ‘i Selusalema ko e toko fāngeau mā onongofulu mā valu, ko e kau to‘a.

⁷Pea ko eni ‘a e ha‘a Penisimani: Ko Salu foha ‘o Mēsuilame, foha ‘o Sioeti, foha ‘o Petaia, foha ‘o Kolaia, foha ‘o Ma‘aseia, foha ‘o ‘Itieli, foha ‘o ‘Aisea.

⁸Pea hoko mo ia ‘a Kāpai, Salai, ko e toko hivangeau mā uofulu mā valu.

⁹Pea ko Sioeli foha ‘o Sikeli ko honau matāpule ia: pea ko Siuta foha ‘o Hasenua ko e tokoni-pule ia ‘o e kolo.

¹⁰Pea ‘i ha‘a taula‘eiki: ko ‘Ītaia foha ‘o Sioialipi, ko Siakini,

¹¹ko Selaia foha ‘o Hilikaia, foha ‘o Mēsuilame, foha ‘o Sātoki, foha ‘o Melaioti, foha ‘o ‘Ahitupi,

¹²ko e pule ‘o e fale ‘o ‘Elohimi, pea ko honau kāinga na‘e fai ‘a e ngāue ki he fale na‘e toko valungeau mā uofulu mā ua: mo ‘Āsaia foha ‘o ‘Ilohame, foha ‘o Pelalaia, foha ‘o ‘Āmesi, foha ‘o Sākalaia,

¹³foha ‘o Pāsua, foha ‘o Malakai, mo hono kāinga ko e hou‘eiki ‘ulumotu‘a ko e toko uangeau mā fāngofulu mā ua; mo ‘Amasesai foha ‘o ‘Asaleli, foha ‘o ‘Ahasai,

¹⁴foha ‘o Mesilemoti, foha ‘o ‘Īmeli, mo honau kāinga ko e kakai fita ko e toko teau mā uofulu mā valu: pea ko honau matāpule ‘a Sapitieli foha ‘o Haketolimi.[16]

¹⁵Pea ‘i he ha‘a Līvai: ko Sēmaia foha ‘o Hāsupi, foha ‘o ‘Āselikami, foha ‘o Hasapaia, foha ‘o Puni; mo Sapitai,

¹⁶mo Siosapati, ‘a ia na‘e ‘anaua ‘a e tokanga‘i ‘o e me‘a ‘o tu‘a ‘o e fale ‘o ‘Elohimi; na‘e kau kinaua ki he hou‘eiki Līvai;

¹⁷pea mo Matanaia foha ‘o Maika, foha ‘o Sāpiti, foha ‘o ‘Ēsafe, ‘a ia na‘e takimu‘a ‘i he hua ‘a e fakafeta‘i ‘i he lotu, mo Pakipukaia ko hono ua ia ‘i honau fa‘ahinga; mo ‘Āpeta foha ‘o Samua, foha ‘o Kālali, foha ‘o Situtuni.

¹⁸Ko e tokolahi ‘o e kau Līvai ‘i he Kolo Tapu ko e toko uangeau mā valungofulu mā fā.

¹⁹Pea ko e kau le‘o matapā, ‘a ‘Ākupi, Talemoni, mo honau kāinga na‘e le‘o ‘i he ngaahi matapā, na‘e toko teau mā fitungofulu mā ua.

²⁰Pea ko hono toe ‘o ‘Isileli, ‘o e kau taula‘eiki, ‘o e kau Līvai, na‘a nau ‘i he kolo kehekehe ‘o Siuta, takitaha ‘i hono tofi‘a.

²¹Ka ko e kau Netinimi na‘a nau nofo ‘i ‘Ōfeli: pea ko Siha mo Kīsefa na‘e pule ki he kau Netinimi.

²²Pea ko e matāpule ‘o e kau Līvai ‘i Selusalema ko ‘Osi foha ‘o Pani, foha ‘o Hasapaia, foha ‘o Matanaia, foha ‘o Maika ‘i ha‘a ‘Ēsafe, ko e kau hiva ke pule ki he ngāue ‘o e fale ‘o ‘Elohimi.

²³He na‘e ‘i ai ha tu‘utu‘uni mei he tu‘i koe‘uhi ko kinautolu, ko e me‘a pau ma‘a e kau hiva, ko e me‘a ‘o e ‘aho ke fai ‘i hono ‘aho.

²⁴Ko Petahaia foha ‘o Mesesapeli, ko e taha ‘i he ha‘a Sala foha ‘o Siuta, na‘e tokoni ki he tu‘i ‘i he me‘a kehekehe na‘e kau ki he kakai.

²⁵Pea ko e me‘a ki he ngaahi vilisi, mo honau ngaahi ‘api vao, ko e ni‘ihi ‘o ha‘a Siuta na‘e nofo ‘i Kiliatia‘apa mo hono ngaahi kolo fakaongo, pea ‘i Tīponi mo hono ngaahi kolo fakaongo, mo ‘Iakapesili mo hono ngaahi vilisi;

²⁶pea ‘i Sisua, mo Mōlata, mo Pete-pāleti;

²⁷pea ‘i Hasa-suali, pea ‘i Peasipa mo hono ngaahi kolo fakaongo;

²⁸pea ‘i Sikilaki, pea ‘i Mēkona mo hono ngaahi kolo fakaongo,

²⁹pea ‘i ‘Eni-līmoni, pea ‘i Sola, pea ‘i Siamuti; ‘i Sānoa, ‘i ‘Atulami, mo hona ngaahi vilisi,

³⁰‘i Lākisi mo hono ngaahi vao, ‘i ‘Āseka mo hono ngaahi kolo fakaongo. Ko ia na‘a nau ‘apitanga mei Peasipa ‘o a‘u ki he Tele‘a ‘o Hīnomi.

³¹Ko ha‘a Penisimani foki mei Kepa ‘o fai atu ki Mikimasi, mo ‘Ai, mo Pēteli, mo hono ngaahi kolo fakaongo;

³²‘i ‘Anatoti, Nopi, ‘Ananaia;

³³Hasoa, Lama, Kitaimi,

³⁴Hātiti, Sipoimi, Nepalati;

³⁵‘i Loti, mo ‘Ono, ‘i Tele‘a Tufunga.

³⁶Pea ‘i he ha‘a Līvai na‘e ‘i ai ‘a e ngaahi kalasi ‘i Siuta na‘e kau mo Penisimani.