Read KO E TOH TAPU KATOA TONGA KO NEHEMAIA 12 Bible Online

KO NEHEMAIA 12 - KO E TOH TAPU KATOA TONGA bible

KO NEHEMAIA 12

¹PEA ko eni ‘a e kau taula‘eiki mo e kau Līvai na‘e ‘alu hake mo Seluipepeli foha ‘o Saletili, pea mo Sisua: ko Selaia, Selemaia, ‘Ēsela,

²‘Amalaia, Māluki, Hātusi,

³Sekonaia, Lēhumi, Melemoti,

⁴‘Ito, Kinetoi, ‘Apaia,

⁵Misiamini, Ma‘ataia, Pīleka,

⁶Sēmaia, mo Sioialipi, ‘Ītaia,

⁷Salu, ‘Āmoki, Hilikaia, ‘Ītaia. Ko e hou‘eiki ia ‘o e kau taula‘eiki mo honau kāinga ‘i he kuonga ‘o Sisua.

⁸Ko e kau Līvai foki: ko Sisua, Pinui, Katemieli, Selepaia, Siuta, mo Matanaia, ‘a ia na‘e pule ki he ngaahi kau hiva, ‘a ia mo hono kāinga.

⁹Pea ko Pakapukaia, mo ‘Uno, mo honau kāinga na‘e fehangahangai mo kinautolu ke fetāliaki.[17]

¹⁰Pea ko e hako ‘o Sisua ‘a Sioiakimi, pea ko e hako ‘o Sioiakimi ‘a ‘Eliasipi, pea ko e hako ‘o ‘Eliasipi ‘a Sioiata,

¹¹pea ko e hako ‘o Sioiata ‘a Sionatane, pea ko e hako ‘o Sionatane, ‘a ‘Iatua.

¹²Pea ‘i he kuonga ‘o Sioiakimi na‘e ‘i ai ‘ani taula‘eiki, ko e kau ‘ulumotu‘a: ‘o ha‘a Selaia, ko Melaia; ‘o ha‘a Selemaia, ko ‘Ananaia;

¹³‘o ha‘a ‘Ēsela, ko Mēsuilame; ‘o ha‘a ‘Amalaia, ko Sihohanani;

¹⁴‘o ha‘a Māluki, ko Sionatane; ‘o ha‘a Sepanaia, ko Siosifa;

¹⁵‘o ha‘a Hālimi, ko ‘Ātena; ‘o ha‘a Melaioti, ko Helekai;

¹⁶‘o ha‘a ‘Ito, ko Sākalaia; ‘o ha‘a Kinetoni, ko Mēsuilame;

¹⁷‘o ha‘a ‘Apaia, ko Sikeli; ‘o ha‘a Miniamini; ‘o ha‘a Moataia, ko Pilitai;

¹⁸‘o ha‘a Pīleka, ko Samua; ‘o ha‘a Sēmaia, ko Sihonatane;

¹⁹pea ‘o ha‘a Sioalipi ko Matenai; ‘o ha‘a ‘Ietaia, ko ‘Osi;

²⁰‘o ha‘a Salai, ko Kālai; ‘o ha‘a ‘Āmoki, ko Hepelū;

²¹‘o ha‘a Hilikaia, ko Hasapaia: ‘o ha‘a ‘Ītaia, ko Nātaniela.

²²Ko e kau Līvai ‘i he kuonga ‘o ‘Eliasipi, Sioiata, mo Siohanani, pea mo ‘Iatua na‘e tohi faka‘ulumotu‘a; pea pehē ‘a e kau taula‘eiki, ‘o fai hifo ki he pule ‘a Talaiasi Pēsia.

²³Ko ha‘a Līvai na‘e tohi faka‘ulumotu‘a ‘i he Tohi Kalonikali, ‘o a‘u ki he taimi ‘o Siohanani foha ‘o ‘Eliasipi.

²⁴Pea ko e hou‘eiki Līvai eni: ko Hasapaia, Selepaia, mo Sisua ko e foha ‘o;[18] pea na‘e fehangahangai mo kinautolu honau kāinga ke fai ‘a e fakamālō mo e fakafeta‘i, ‘o hangē ko e tu‘utu‘uni ‘a Tēvita ko e tangata ‘o ‘Elohimi, ‘o fehangahangai ‘a e lakanga mo e lakanga.

²⁵Ko Matanaia, mo Pakangukaia, ‘a ‘Opataia, Mēsuilame, Talemoni, ‘Ākupi, ko e kau le‘o matapā kinautolu na‘e le‘o ‘i he ngaahi fale koloa ‘o e ngaahi matapā.

²⁶Na‘e kau kinautolu ki he taimi ‘o Sioiakimi foha ‘o Sisua, foha ‘o Siosataki, pea ki he taimi ‘o Nehemaia na‘e kōvana, mo ‘Ēsela Taula‘eiki na‘e sikalaipe.

²⁷Pea ‘i he huufi ‘o e ‘ā ‘o Selusalema na‘a nau kumi ‘a e kau Līvai mei honau tukui feitu‘u, ke ‘omi kinautolu ki Selusalema, ke fai ‘a e huufi mo e fakafiefia, ‘io, ‘aki ‘a e ngaahi fakafeta‘i, mo e hiva, he fakasimipale, he fakahelefilo, mo fakaha‘ape.

²⁸Ko ia na‘e fakataha mai ‘a e ha‘a hiva……… Pea mei he Siakale, ‘a e ngaahi feitu‘u takatakai ki Selusalema, pea mei he ngaahi vilisi ‘o e ha‘a Nētofa.

²⁹Pea mei Pete-Kilikali, pea mei he ngaahi vao ‘o Kepa mo ‘Asimaueta; he kuo langa vilisi ‘e he kau hiva, ‘o takatakai ki Selusalema.

³⁰Pea na‘e fakatāpui kinautolu ‘e he kau taula‘eiki mo e kau Līvai; pea nau toki fakatāpui ‘a e kakai, mo e ngaahi matanikolo, mo e ‘ā.

³¹Pea u toki ‘ohake ‘a e hou‘eiki Siuta ki he funga ‘ā, pea na‘a ku fokotu‘u ha ongo fu‘u fononga ke fai fakafeta‘i, ‘a ia na‘e afe ha taha ki he to‘omata‘u ‘i he funga ‘ā, ‘o taumu‘a ki he Matapā Veve.[19]

³²Pea muimui ki ai ‘a Hosaia mo e vaeua ‘o e hou‘eiki Siuta,

³³mo ‘Asalaia, ‘Ēsela, mo Mēsuilame,

³⁴mo Siuta, mo Penisimani, mo Sēmaia, mo Selemaia,

³⁵mo e ni‘ihi ‘o ha‘a taula‘eiki na‘e fakatalupite: ko Sākalaia foha ‘o Sionatane, foha ‘o Sēmaia, foha ‘o Matanaia, foha ‘o Maikaia, foha ‘o Sākuli, foha ‘o ‘Ēsafe;

³⁶pea mo hono kāinga ko Sēmaia mo ‘Asaleli, ko Milalai, Kilalai, Ma‘ai, Nātaniela, mo Siuta, mo Hānani, ‘oku nau to‘o ‘a e nāunau hiva ‘a Tēvita, ko e tangata ‘o ‘Elohimi; pea ko ‘Ēsela sikalaipe na‘e taki.

³⁷Pea nau ‘alu ‘i he Matapā Fauniteni, pea na‘e fakahangatonu ai pē ‘enau ‘alu ‘i he kaka‘anga ‘o Kolo-‘o-Tēvita, ‘i he hakenga ki he ‘ā, mei he feitu‘u ki ‘olunga ‘i he fale ‘o Tēvita, ‘o a‘u ki he Matapā Vai ki hahake.

³⁸Pea ko hono ua ‘o e fononga fakafeta‘i na‘a nau ‘alu ke fakafetaulaki kiate kinautolu; pea na‘a ku muimui ai au mo e vaeua ‘o e kakai, ‘i he funga ‘ā, ‘o fai ki he funga ‘o e Taua Ngoto‘umu, ‘o a‘u ki he ‘Ā Lau Lahi,

³⁹pea ‘i he funga ‘o Matapā ‘Ifalemi, pea ‘i he funga ‘o Matapā Motu‘a,[20] pea ‘i he Matapā Ika, mo e Taua ‘o Hananeli, mo e Taua ‘o Hamea, ‘o a‘u ki he Matapā Sipi: pea nau tu‘u ‘i he matapā ‘o e Kā‘ate.

⁴⁰Ko ia, na‘e tutu‘u ‘a e ongo fononga fakafeta‘i ‘i he fale ‘o ‘Elohimi, mo au foki, pea na‘e ‘iate au foki ‘a e vaeua ‘o e kau pule:

⁴¹ko e kau taula‘eiki foki, ‘a ‘Īlaiakimi, Ma‘aseia, Miniamini, Maikaia, ‘Elioenai, Sākalaia, mo ‘Ananaia, na‘a nau fakatalupite;

⁴²ko Ma‘aseia foki, mo Sēmaia, mo ‘Eliesa, mo ‘Osi, mo Sihohanani, mo Malakai, mo ‘Īlami, mo ‘Ēseli. Pea na‘e ha‘aki mai ‘a e kau hiva, mo ‘enau tama taki ko ‘Isilaia.

⁴³Pea na‘a nau feia ‘i he ‘aho ko ia ‘a e ngaahi fu‘u feilaulau ‘o nau fefiefia‘i; he kuo ‘ange kiate kinautolu ‘e ‘Elohimi ha fu‘u fiefia: na‘e fefiefia‘i foki ‘a e kau finemātu‘a mo e fānau: ‘io, na‘e ongo mama‘o ‘a e fiefia ‘a Selusalema.

⁴⁴Pea ‘i he ‘aho ko ia na‘e fokotu‘u ‘a e tu‘unga me‘a ke pule ki he ngaahi loki na‘e fa‘o ai ‘a e koloa: ki he ngaahi me‘a na‘e hapai ki he polopolo ta‘u, pea ki he tukuhau-hongofulu, ke tānaki ki ai, ‘o fakatatau ki he ngaahi vao ‘o e ngaahi kolo, ‘a e ngaahi ‘inasi kuo tu‘utu‘uni ‘e he lao ma‘a e kau taula‘eiki mo Līvai. He na‘e māfana ‘a e loto ‘o Siuta ‘i he kau taula‘eiki, mo e kau Līvai — si‘enau tu‘u na!

⁴⁵Pea nau tauhi ‘a e fatongia ‘o honau ‘Otua, mo e fatongia ‘o e fakatapu, pea pehē mo e kau hiva, mo e kau le‘o matapā, ‘o hangē ko e tu‘utu‘uni ‘a Tēvita mo hono foha ko Solomone.

⁴⁶He ‘i he kuonga ‘o Tēvita mo ‘Ēsafe ‘i mu‘a, na‘e ‘i ai ha pule ‘o e kau hiva, mo e ngaahi hiva fakamālō mo fakafeta‘i ki he ‘Otua.

⁴⁷Pea ‘i he kuonga ‘o Seluipepeli mo e kuonga ‘o Nehemaia na‘e ‘ange ‘inasi ‘e ‘Isileli kotoa ki he kau hiva mo e kau le‘o matapā, ‘a e me‘a ‘o e ‘aho ki hono ‘aho; ‘o nau vahe ‘inasi ai pē ki he kau Līvai, pea vahe ‘inasi ‘e he kau Līvai ma‘a ha‘a ‘Ēlone.