Read KO E TOH TAPU KATOA TONGA KO NEHEMAIA 3 Bible Online

KO NEHEMAIA 3 - KO E TOH TAPU KATOA TONGA bible

KO NEHEMAIA 3

¹TOKI tutu‘u ‘a e taula‘eiki lahi ko ‘Eliasipi, mo hono kāinga taula‘eiki, ‘o nau ngaohi ‘a e Matapā Sipi; ‘io, na‘a nau fai hono huufi, ‘o nau tau hono ngaahi lau matapā; na‘a nau fai hono huufi ‘o a‘u ki he Taua ‘o Hamea, pea nau ngata mei he Taua ‘o Hananeli.[4]

²Pea hoko ai ‘a e langa ‘a e tu‘unga me‘a Sielikō. Pea hoko ai ‘a e langa ‘a Sākuli foha ‘o ‘Imilai.

³Pea ko e Matapā Ika na‘e ngaohi ‘e ha‘a Hāsena‘a; na‘e fokotu‘u ‘e kinautolu hono ngaahi toka, ‘o tau hono ngaahi lau matapā, mo hono ngaahi fakama‘u, mo hono ngaahi ‘akau fakalava.

⁴Pea hoko ai ‘a e monomono ‘o Melemoti foha ‘o ‘Ūlaia foha ‘o Hākosi. Pea hoko ai ‘a e monomono ‘a Mēsuilame foha ‘o Pelekaia foha ‘o Mesesapeli. Pea hoko ai ‘a e monomono ‘a Sātoki foha ‘o Pā‘ana.

⁵Pea hoko ai ‘a e monomono ‘a e kau Tekoa; ka ko honau hou‘eiki na‘e ‘ikai te nau ‘ai honau kia ke toho ‘a e ngāue ‘a honau ‘Eiki.

⁶Pea ko e Matapā ‘o Kolomotu‘a[5] na‘e monomono ‘e Sioiata foha ‘o Pāsea mo Mēsuilame foha ‘o Pesoteia: na‘a nau ‘ai hono ngaahi toka, ‘o tau hono ngaahi lau matapā, ‘o ‘ai hono ngaahi loka mo hono ‘akau fakalava.

⁷Pea hoko ai ‘a e monomono ‘a e Kipione ko Melataia, mo Siatoni ko e Melonoti, ‘a e kau tangata ‘o Kipione mo Mīsipa, ‘o a‘u ki he ‘afio‘anga ‘o e kōvana ‘o Tu‘a-vaitafe.[6]

⁸Hoko ai ‘a e monomono ‘a ‘Osieli foha ‘o Halahaia, ‘a e kau tufunga koula. Pea hoko ai ‘a e monomono ‘a ‘Ananaia ha‘a failolo, pea nau ‘ai ke malu ‘a Selusalema, ‘o a‘u ki he ‘Ā Lau Lahi.[7]

⁹Pea hoko ai ‘a e monomono ‘a Lefaia foha ‘o Hua, ko e pule ‘o e vaeua ‘o e tuku‘uta ‘o Selusalema.

¹⁰Pea hoko ai ‘a e monomono ‘a ‘Ītaia foha ‘o Halumafi, ‘io, ‘a e feitu‘u fe‘unga mo hono fale. Pea hoko ai ‘a e monomono ‘a Hātusi foha ‘a Hasapaneia.

¹¹Pea fai ha ngafa monomono ‘e Malakaia foha ‘o Hālimi, mo Hāsupi foha ‘o Pāhati-Moape; ‘io, ‘a e Taua ‘o e Feitu‘u Ngoto‘umu: ko hono ua ia ‘o hono ngafa monomono.

¹²Pea hoko ai ‘a e monomono ‘a Sālumi foha ‘o Halohesi ko e pule ‘o e vaeua ‘o e tuku‘uta ‘o Selusalema, ‘e ia mo ‘ene fānau fefine.

¹³Ko e Matapā ‘o e Tele‘a na‘e monomono ‘e Hānuni mo e nofo Sānoa; na‘a nau ngaohi ia, mo tau hono ngaahi lau matapā, mo hono ngaahi fakama‘u mo ‘akau fakalava; pea nau monomono mo e kiupite ‘e afe ‘o e ‘ā, ‘o ngata mei he Matapā Veve.

¹⁴Pea ko e Matapā Veve na‘e monomono ‘e Malakaia foha ‘o Lēkapi, ko e pule ‘o e tuku‘uta ‘o Petehakelemi: ko ia ia na‘a ne ngaohi ia, mo tau hono ngaahi lau matapā, mo hono ngaahi fakama‘u mo ‘akau fakalava.

¹⁵Pea ko e Matapā Fauniteni na‘e monomono ‘e Sāluni foha ‘o Koli-hose, ko e pule ‘o e tuku‘uta ‘o Mīsipa; na‘a ne ngaohi ia mo ‘ato, mo tau hono ngaahi lau matapā, mo hono ngaahi fakama‘u mo ‘akau fakakava; mo e ‘ā ‘o e lepa ko Sela ‘o ofi ki he Ngouetapu ‘a e Tu‘i, ‘o ne ngata mei he tu‘unga ‘oku ‘alu hifo mei Kolo-‘o-Tēvita.

¹⁶Hili ia na‘e fai ha monomono ‘e Nehemaia foha ‘o ‘Asipuki, ko e pule ‘o e vaeua ‘o e tuku‘uta ‘o Petesua, ‘o ne fai atu ki he potu na‘e fe‘unga mo e ngaahi fa‘itoka ‘o Tēvita, pea ki he lepa na‘e ngaohi, pea ki he fale ‘o e kau Helo.

¹⁷Pea hoko mo ia ‘a e monomono ‘a e kau Līvai, ‘a Lēhumi foha ‘o Pani. Hoko ai ‘a e monomono ‘a Hasapaia, ko e pule ‘o e vaeua ‘o e tuku‘uta ‘o Kī‘ila: ko e ngafa ia ‘o hono vahefonua.

¹⁸Hoko mo ia na‘e fai monomono ‘e honau kāinga ko Pāvai foha ‘o Henatati, ko e pule ‘o e vaeua ‘e taha ‘o e tuku‘uta ‘o Kī‘ila.

¹⁹Pea feholoi mo ia ‘a e monomono ‘a ‘Ēseli foha ‘o Sisua, ko e pule ‘o Mīsipa, ko e feitu‘u na‘e fehangahangai mo e hakenga ki he fale mahafu ‘i he maka: ko hono ua ia ‘o hono ngafa monomono.

²⁰Hoko mo ia na‘e fai monomono ‘e Paluki foha ‘o Sapai mei he maka ki he hū‘anga ‘o e fale ‘o e taula‘eiki lahi ko ‘Eliasipi: na‘e fai māfana ‘e ia, pea ko hono ua eni ‘ene ngafa monomono.

²¹Hoko mo ia na‘e fai monomono ‘e Melemoti foha ‘o ‘Ūlaia foha ‘o Hākosi, mei he hū‘anga ‘o e fale ‘o ‘Eliasipi ‘o a‘u ki he taupotu ‘o e fale ko ia: ko hono ua ia ‘o ‘ene ngafa monomono.

²²Pea hoko mo ia ‘a e monomono ‘a e kau taula‘eiki, ‘a e tu‘unga me‘a mei he Seakale.

²³Hoko mo ia ‘a e monomono ‘a Penisimani mo Hāsupi, ko e potu na‘e fehangahangai mo hono fale. Hoko mo ia ‘a e monomono ‘a ‘Asalaia foha ‘o Ma‘aseia foha ‘o ‘Ānania, ‘o ofi ki hono fale ‘o‘ona.

²⁴Hoko mo ia ‘a e monomono ‘a Pinui foha ‘o Henatati mei he fale ‘o ‘Asalaia ki he maka mo e tuliki: ko hono ua ia ‘o ‘ene ngafa ‘a‘ana.

²⁵Ko Pālali foha ‘o ‘Ūsai na‘e ‘a‘ana ‘a e feitu‘u na‘e fehangahangai mo e maka, mo e taua mā‘olunga ‘oku tomo atu mei he fale ‘o e tu‘i, ‘a ia ‘oku lave ki he loto‘ā ‘a e kau le‘o. Ko Petaia foha ‘o Pālosi na‘e feholoi mo ia.

²⁶(Pea ko eni na‘e nofo ‘a e kau Netinimi ‘i ‘Ōfeli, ‘o a‘u ki he feitu‘u ‘oku fehangahangai mo e Matapā Vai ki hahake, pea mo e taua ‘oku tomo atu.)

²⁷Hoko mo ia ‘a e monomono ‘a e kau Tekoa mei he potu ‘oku fehangahangai mo e taua lahi ‘oku tomo atu, ‘o a‘u ki he ‘ā ‘o ‘Ōfeli: ko hono ua ia ‘o ‘enau ngafa.

²⁸Na‘e fai monomono ‘e he kau taula‘eiki ‘i he feitu‘u mei ‘olunga ‘i he Matapā Hoosi, ‘o ngaohi takitaha ‘a e me‘a na‘e fehangahangai mo hono fale.

²⁹Hoko ai ‘a e monomono ‘a Sātoki foha ‘o ‘Īmeli, ‘a e potu na‘e fehangahangai mo hono fale. Pea hoko mo ia ‘a e monomono ‘a Sēmaia foha ‘o Sekonaia, ‘a e tauhi ‘o e Matapā Hahake.

³⁰Hoko mo ia ‘a e monomono ‘a ‘Ananaia foha ‘o Silimia, mo Hānuni ko hono ono ‘o e foha ‘o Sialafi: ko hono ua eni ‘o ‘ene ngafa. Hoko mo ia ‘a e monomono ‘a Mēsuilame foha ‘o Pelekaia, ko e potu na‘e fehangahangai mo hono loki.

³¹Hoko mo ia ‘a e monomono ‘a Malakaia ko e ha‘a tufunga koula, ‘o a‘u ki he fale ‘o e kau Netinimi, mo e kau mesianiti, ‘a e feitu‘u na‘e fehangahangai mo Matapā Mifikati,[8] ‘o fai atu ki he hakenga ‘o e tuliki.

³²Pea ko e vaha‘a ‘o e hakenga ‘o e tuliki mo e Matapā Sipi na‘e monomono ‘e ha‘a tufunga koula mo e kau mesianiti.