Read KO E TOH TAPU KATOA TONGA KO NEHEMAIA 5 Bible Online

KO NEHEMAIA 5 - KO E TOH TAPU KATOA TONGA bible

KO NEHEMAIA 5

¹PEA na‘e tupu ha tangi lahi ‘a e kakai mo honau finemātu‘a, koe‘uhi ko honau kāinga ko e kau Siu.

²He na‘e ‘i ‘ai hā, ni‘ihi na‘e lau, ‘o pehē, ‘Oku tau tokolahi ‘a kitautolu mo ‘etau fānau tangata mo fānau fefine; ko ia tau to‘o uite, ka tau kai ‘o mo‘ui.

³Pea na‘e ‘i ai ha ni‘ihi na‘e lau ‘o pehē, Ko eni ‘oku tau nō talifaki ‘aki hotau ngaahi konga vao, mo ‘etau ngaahi ngoue vaine, mo hotau ngaahi fale: ‘ē, tau to‘o uite telia ‘a e honge.

⁴Na‘e ‘i ai mo e ni‘ihi na‘e lau ‘o pehē, Kuo tau fakamo‘ua hotau ngaahi konga vao, mo ‘etau ngaahi ngoue vaine ke ma‘u pa‘anga ki he tukuhau ‘a e tu‘i.

⁵Ka ko eni, ko hotau kakano ‘oku tatau mo e kakano ‘o hotau kāinga ko ē: ‘oku tatau ‘etau fānau mo ‘enau fānau: kae vakai, ko kitautolu ‘oku tau fakamo‘ulaloa ‘etau fānau tangata mo fānau fefine ke hopoate, pea ‘oku ‘i ai ha‘atau fānau fefine ni‘ihi kuo pehē; pea ‘oku ‘ikai te tau lava ha me‘a, he ko hotau ngaahi konga vao mo ‘etau ngaahi ngoue, ‘oku ma‘u kehe.

⁶Pea u ‘ita ‘aupito ‘i he‘eku fanongo ki he‘enau tangi, mo e ngaahi lea ko ia.

⁷Pea u fakalaulauloto ki ai, pea u talatalaaki‘i ‘a e hou‘eiki mo e kau pule, ‘o u pehē kiate kinautolu, Tā ‘oku mou ‘eke toloi, ‘o fai ki homou kāinga foki. Pea u fai ha fono lahi ke ngaohi kinautolu.

⁸Pea u pehē kiate kinautolu, Ko kimautolu eni kuo mau huhu‘i homau kāinga Siu na‘e fakatau ki he hīteni ‘aki ‘a e ngātanga ‘o ‘emau mafai; pea ‘oku mou pehē koā ke fakatau homou kāinga ‘e kimoutolu, pea ‘e fakatau koā ‘a kinautolu ‘e kitautolu? Pea nau longa mate, ‘o ‘ikai ma‘u ha lea ke tali ‘aki.

⁹Na‘a ku pehē foki, Ko e me‘a ‘oku mou fai ‘oku ‘ikai lelei; lau ‘e au te mou fou ‘i he ‘apasia ki hotau ‘Otua, telia ‘a e manuki ‘a e hīteni ko hotau ngaahi fili.

¹⁰Pea ko au foki mo hoku kāinga mo hoku kau tama ‘oku mau ‘eke toloi ki he pa‘anga mo e uite ‘oku nau nō. Tau tuku mu‘a ‘a e ‘eke toloi ni.

¹¹Fakafoki mu‘a kiate kinautolu ‘anai ni honau ngaahi konga vao, ‘enau ngaahi ngoue vaine, ‘enau ngaahi ngoue ‘ōlive, mo honau ngaahi fale, mo e vaheteau ‘o e pa‘anga, ‘o e uite mo e uaine, mo e lolo, ‘a ia kuo mou hilifaki kiate kinautolu.[11]

¹²Pea na‘a nau tali, Te mau fakafoki pē, ‘o ‘ikai ‘eke ha me‘a kiate kinautolu; te mau fai pē ‘o hangē ko ho‘o me‘a. Pea u ui mai ‘a e kau taula‘eiki, pea u fakafuakava ai kinautolu ke fai hangē ko e lea ko ia.

¹³Na‘a ku tupe‘i foki hoku kofu,[12] pea u pehē, Ke pehē ‘a e tupe‘i ‘e ‘Elohimi mei hono fale, pea mei he fua ‘o ‘ene ngāue, ‘a e tangata fua pē ‘oku ‘ikai te ne fakaai ‘a e lea ko ia; ‘io, ke pehē hono tupe‘i ‘o fakama‘a. Pea tali ‘a e fakataha kotoa, ‘Ēmeni, ‘o nau fai ‘a e Halelu‘ia ki he ‘Eiki. Pea na‘e fai ‘a e kakai ‘o hangē ko e lea ko ia.

¹⁴Kae‘uma‘ā foki, talu e ‘aho na‘e tu‘utu‘uni au ke u kōvana ‘i he fonua ko Siutea, ‘io, mei hono uofulu ta‘u ‘o Kingi ‘Atasease, ‘o a‘u ki hono tolungofulu mā ua ta‘u, ‘a ia ko e fo‘i ta‘u ‘e hongofulu mā ua, ko au mo hoku kāinga na‘e ‘ikai te mau mama ‘a e ‘inasi fakakōvana.

¹⁵Ka ko e ngaahi ‘uluaki kōvana na‘e mu‘omu‘a ‘iate au, na‘a nau hilifaki kavenga ki he kakai, ‘o nau to‘o meiate kinautolu ‘a e me‘akai mo e kava, fe‘unga mo e fāngofulu‘i sikeli ki he ‘aho.[13] Na‘a mo ‘enau kau tama na‘a nau fakaehaua ‘a e kakai; ka na‘e ‘ikai te u fai pehē ‘e au, ko ‘eku manavahē ki he ‘Otua.

¹⁶Kae‘uma‘ā foki, na‘a ku puke ma‘u ‘a e ngāue ni ki he ‘ā, pea na‘e ‘ikai te mau momo‘i fakatau ha konga vao; he na‘e fakatefua mai ki ai ‘e he‘eku kau tama ki he ngāue.

¹⁷Pea na‘e keinanga foki mo au ha toko teau mā nimangofulu ‘i he kau Siu mo e kau pule; tukukehe ‘a kinautolu na‘e hili mai mei he hīteni takatakai.

¹⁸Pea ko e me‘a na‘e teu ki he ‘aho takitaha ko e pulu ‘e taha, mo e sipi fili ‘e ono; na‘e ngaohi mai mo e fanga moa, pea fakahili ‘aho hongofulu na‘e tokonaki ‘a e fa‘ahinga uaine kehekehe ke lahi. Ka neongo ia, ka na‘e ‘ikai te u tangi ki he ‘inasi fakakōvana, koe‘uhi na‘e mamafa ‘a e fatongia ‘o si‘i kakai ni.

¹⁹‘E hoku ‘Otua, manatu‘i ‘a e me‘a kotoa kuo u fai ma‘a si‘i kakai ni, ‘o ke ‘ofa ai kiate au.