Read KO E TOH TAPU KATOA TONGA KO NEHEMAIA 8 Bible Online

KO NEHEMAIA 8 - KO E TOH TAPU KATOA TONGA bible

KO NEHEMAIA 8

¹PEA fakatefua mai ‘a e kakai kotoa pē ki he mala‘e ‘o e Matapā Vai; pea nau pehē kia ‘Ēsela sikalaipe ke ‘omi ‘a e Puka ‘o e Lao ‘a Mōsese, ‘a ia na‘e tu‘utu‘uni ‘e Sihova ma‘a ‘Isileli.

²Pea omi ‘e he taula‘eiki ko ‘Ēsela ‘a e Lao ki he ‘ao ‘o e fakataha, ‘a ia na‘e ‘i ai ‘a tangata mo fafine, mo ia fua pe ‘e fanongo ki ai ‘o ‘uhinga, ‘i he ‘uluaki ‘aho ‘o hono fitu ‘o e māhina.

³Pea na‘a ne lau ai ‘i he mala‘e ‘o e Matapā Vai, mei he hengihengi ki he ho‘atā, ‘i he ‘ao ‘o e kau tangata mo e kau fefine, mo kinautolu ‘e ‘uhinga ki ai; pea fokotu‘u telinga ki he tohi lao ‘e he kakai kotoa.

⁴Pea na‘e tu‘u ‘a ‘Ēsela sikalaipe ‘i ha tu‘unga ‘akau kuo nau ngaohi ki he me‘a ko ia; pea na‘e tutu‘u ‘i hono tafa‘aki ‘a Matitaia, mo Sema, mo ‘Anaia, mo ‘Ūlaia, mo Hilikaia, mo Ma‘aseia: ko e to‘omata‘u ia, pea ‘i hono to‘ohema na‘e ‘i ai ‘a Petaia, mo Misaeli, mo Malakai, mo Hāsumi, mo Hasapatana, ko Sākalaia mo Mēsuilame.

⁵Pea to‘o ‘e ‘Ēsela ‘a e tohi kae māta‘i ‘e he kakai kotoa; (he na‘a ne mā‘olunga ‘i he kakai kotoa) pea ‘i he‘ene to‘o na‘e tutu‘u ki ‘olunga ‘a e kakai kotoa.

⁶Pea fai ‘e ‘Ēsela ‘a e fakamālō ‘o Sihova ko e ‘Otua Lahi. Pea na‘e tali ‘e he kakai kotoa, ‘Ēmeni, ‘Ēmeni, ‘o hiki honau nima: pea nau toki punou ‘o hū kia Sihova he fo‘ohifo ki he kelekele.

⁷Ko Sisua foki, mo Pani, mo Selepaia, Siamini, ‘Ākupi, Sapetai, Hōtaia, Ma‘aseia, Kēlita, ‘Asalaia, Siosapate, Hānani, Pelaia, mo e kau Līvai, na‘a nau ‘ai ke ‘uhinga ki he kakai ‘a e Lao: pea mo‘utu‘ua ai pē ‘a e kakai.

⁸Pea nau lau mei he puka ‘o e Lao ‘o ‘Elohimi ‘o tōtōlelei mai; ‘o nau faka‘uhinga foki; ko ia na‘e matala ai ‘a e me‘a na‘e lau.

⁹Pea lea ki he fu‘u kakai ‘a Nehemaia (ko e kōvana ia) mo ‘Ēsela Taula‘eiki ko e sikalaipe, mo e kau Līvai na‘e hīnoi‘i ‘a e kakai, ‘o pehē, Ko e ‘aho ko eni ko e ‘aho tapu ‘o Sihova ko homou ‘Otua; ‘oua te mou fakamamahi, pea ‘oua te mou tangi. He na‘e mo‘u tangi pē ‘a e kakai kotoa ‘i he‘enau fanongo ki he ngaahi lea ‘o e Lao.

¹⁰Pea me‘a ‘e ia kiate kinautolu, Mou ‘alu; kai me‘a ngako, mo inu me‘a hu‘amelie, pea ‘ave ‘inasi ki he kakai ‘oku ‘ikai ha‘anau kano ‘umu; he ko e ‘aho tapu eni ‘o hotau ‘Eiki: pea ‘oua te mou loto lavea; he ko e fiefia ‘i he ‘Eiki ko homou mālohinga ia.

¹¹Ko ia na‘e fakanonga ‘e he kau Līvai ‘a e fu‘u kakai he‘enau pehē, ‘Oua, he ko e ‘aho tapu; pea ‘oua te mou loto lavea.

¹²Pea tutuku ‘a e kakai kotoa ke kai, pea ke inu kava, pea ke tufa ‘umu, pea ke fakafiefia lahi, koe‘uhi na‘e ‘uhinga kiate kinautolu ‘a e ngaahi me‘a na‘e fakamatala mai.

¹³Pea ‘i he ‘aho ko hono ua na‘e fakatefua mai ‘a e hou‘eiki ‘ulumotu‘a ‘o e kakai kotoa, ‘a e kau taula‘eiki mo e kau Līvai, kia ‘Ēsela ko e sikalaipe, ke toe taha atu ‘enau ‘ilo ki he ngaahi me‘a ‘o e Lao.

¹⁴Pea nau ‘ilo tā kuo tohi ‘i he Lao, tokua na‘e fekau ‘e Sihova ‘ia Mōsese ke nofo fale lou‘akau ‘a ha‘a ‘Isileli ‘i he kātoanga ‘o hono māhina fitu.

¹⁵Pea ke nau tala[15] mo fanongonongo atu ‘i honau ngaahi tukui kolo, pea ‘i Selusalema ‘o pehē, ‘Alu ki he mo‘unga, ‘o ‘omi va‘ava‘a ‘ōlive, mo e va‘ava‘a ‘ōlive vao, mo e va‘ava‘a maile, mo e va‘ava‘a paame, mo e ‘akau lau tafu‘ufu‘u, ke ngaohi fale lou‘akau ‘aki, hangē ko ia kuo tu‘u ‘i he tohi.

¹⁶Ko ia na‘e hū kitua‘ā ‘a e kakai, ‘o ‘omi ia, ‘o nau ngaohi fale lou‘akau ‘aki mo‘onautolu, takitaha ‘i hono funga fale, pea ‘i hono loto‘ā, pea ‘i he ngaahi loto‘ā ‘i he fale ‘o ‘Elohimi, pea ‘i he mala‘e ‘o e Matapā Vai, pea ‘i he mala‘e ‘o Matapā ‘Ifalemi.

¹⁷‘Io, ko e fakataha kotoa kuo foki mei he pōpula na‘a nau ngaohi fale lou‘akau, ‘o nau nofo ai. Seuke, talu e taimi ‘o Sisua foha ‘o Nuni mo e ‘ikai pehē hono fai ‘e ha‘a ‘Isileli. Pea na‘e ‘i ai ha fu‘u fiefia na‘e kehe ange.

¹⁸Na‘a ne lau foki ‘a e Puka ‘o e Lao ‘a ‘Elohimi ‘i he ‘aho hokohoko, mei he ‘uluaki ‘aho ‘o a‘u ki hono faka‘osi; pea ‘i hono ‘aho valu na‘e fai ‘a e Faka‘osi, ‘o hangē ko e konisitūtone.