Read KO E TOH TAPU KATOA TONGA KO NEHEMAIA 9 Bible Online

KO NEHEMAIA 9 - KO E TOH TAPU KATOA TONGA bible

KO NEHEMAIA 9

¹PEA ‘i hono ‘aho uofulu mā fā ‘o e māhina ko ia na‘e fakatefua mai ‘a ha‘a ‘Isileli, ‘Oku nau ‘aukai, mo ‘ai tauanga‘a, mo paniefua.

²Pea na‘e fakamavahe ‘e he hako totonu ‘o ‘Isileli mei he hako‘i muli fua pē, pea nau tutu‘u ‘o vete ‘enau ngaahi angahala, mo e ngaahi kovi ‘a ‘enau ngaahi kui.

³Pea nau tu‘u ‘i honau tu‘unga; pea ko e vahefā ‘o e ‘aho na‘a nau lau ‘i he Puka ‘o e Lao ‘a Sihova ko honau ‘Otua; pea ko e vahefā na‘a nau vete hia ai, mo fai ‘enau hū kia Sihova ko honau ‘Otua.

⁴Pea tu‘u ‘i he tu‘unga ‘o e kau Līvai ‘a Sisua, mo Pani, ‘a Katemieli, Sepanaia, Puni, Selepaia, Pani, mo Kēnani, pea nau tautapa le‘o lahi kia Sihova ko honau ‘Otua.

⁵Pea toki pehē ‘e he kau Līvai — ‘a Sisua, mo Katemieli, ‘a Pani, Hasapenaia, Selepaia, Hōtaia, Sepanaia, mo Petahaia — Mou tu‘u: mou fakamālō‘ia ‘a Sihova ko homou ‘Otua mei ‘ītāniti ki ‘ītāniti: ‘io, ke mālō‘ia ho huafa lāngilangi‘ia, ‘oku hopo hake ‘i ho fakamālō mo e fakahīkihiki‘i fua pē.

⁶Ko koe ‘a Sihova, ‘io, ko koe toko taha; ko koe na‘a ke ngaohi ‘a e ngaahi langi, ‘io, ‘a Langi taupotu, mo honau ngaahi hōsitē, ‘a māmani mo e me‘a kotoa pē ‘oku ‘i ai, ‘a e ngaahi tahi mo ‘enau me‘a kotoa, pea ‘oku ke ‘ange mo‘ui kiate kinautolu kotoa; pea na‘a mo e hōsitē ‘o langi ‘oku nau hū ai pē ki he ‘Afiona.

⁷Ko koe ‘a Sihova ‘Elohimi, ‘a e ‘Afiona na‘a ke fili ‘a ‘Epalame, ‘o fakahū ki tu‘a mei ‘Ua ‘o e Kau Kalitia, ‘o ke fakahingoa ko ‘Epalahame.

⁸Pea na‘a ke ‘afio‘i hono loto ‘oku fai takataka tui ‘ene fakafeangai ki he ‘Afiona, pea ke fai kovinānite mo ia ke ‘ange ‘a e fonua ‘o ha‘a Kēnani, ha‘a Heti, ha‘a ‘Āmoli, mo ha‘a Pēlisi, mo ha‘a Siepusi, mo ha‘a Keakesa, ‘io, ke ‘ange ki hono hako; pea kuo ke fakaai ho‘o folofola, he ko e faitotonu ‘a e ‘Afiona.

⁹Pea na‘a ke ‘afioa ‘a e mo‘ulaloa ‘a ‘emau ngaahi kui ‘i ‘Isipite, pea na‘a ke ongo‘i ‘enau tautapa ‘i he ve‘e Tahi Kulokula;

¹⁰pea na‘a ke ‘ai ‘a e ngaahi faka‘ilonga mo me‘a fakaofo kia Felo mo ‘ene kau tamaio‘eiki kotoa pē, mo e kakai kotoa ‘o hono fonua; he na‘a ke mea‘i ‘oku nau fai fakamofutofuta kiate kinautolu; pea na‘a ke fakaai ho ongoongo, ‘o hangē ko ia ‘oku kei fai ni.

¹¹Pea na‘a ke tu‘usi ‘a e tahi ‘i honau ‘ao, pea na‘a nau laka atu ‘i he mōmoa ‘i he loto tahi; pea ko e kau tuli na‘a ke lī ki he kilisitahi, ‘o nau, hangē ha maka ‘i he tahi hou.

¹²Pea na‘a ke taki kinautolu, ‘aho ‘aki ha pou ‘ao, pea ‘aki ha pou-afi po‘uli, ke huluhulu ‘a e hala te nau ‘alu ai.

¹³Pea na‘a ke hā‘ele hifo ki funga mo‘unga Sainai, pea na‘a ke fefolofolai mo kinautolu mei langi; pea na‘a ke ‘ange kiate kinautolu ha konisitūtone totonu, mo e ngaahi lao mo‘oni, ‘a e ngaahi fekau mo e ngaahi tu‘utu‘uni na‘e lelei.

¹⁴Pea na‘a ke faka‘ilo kiate kinautolu ho Sāpate tapu, pea na‘a ke fakafai ‘i ho‘o sevāniti ko Mōsese ha‘anau ngaahi tu‘utu‘uni, mo fekau, mo ha lao.

¹⁵Pea na‘a ke ‘ange ha‘anau mā mei langi ‘i he‘enau hōngea, pea na‘a ke fakapū kitu‘a ha vai mei he makatu‘u telia ‘enau fie inu, pea ke tala kiate kinautolu ke nau ‘alu ‘o ma‘u ‘a e fonua ‘a ia kuo ke hiki ho nima ke ‘ange mo‘onautolu.

¹⁶Ka ko kinautolu mo ‘emau ngaahi kui na‘a nau mofuta, ‘o nau fakakekeva honau kia, ‘o ‘ikai te nau momo‘i muitala ki ho‘o ngaahi tu‘utu‘uni;

¹⁷pea na‘e ‘ikai te nau loto ke talangofua, pea na‘e ‘ikai te nau manatu ho‘o ngaahi me‘a fakaofo, ‘a ia kuo ke feia ‘i ho‘o feangai mo kinautolu; ka nau fakakekeva honau kia, pea ‘i he‘enau angatu‘u na‘a nau fokotu‘u ha kapiteni ke nau foki ki he‘enau nofo pōpula. Ka ko e ‘Otua mohu fakamolemole ‘a e ‘Afiona, ko e Angalelei mo ‘Alo‘ofa, Tuai-ki-he-houhau, pea Fonu-‘i-he-kelesi, pea na‘e ‘ikai te ke li‘aki kinautolu.

¹⁸‘Io, ‘i he‘enau ngaohi ha‘anau kafi ukamea, mo nau pehē, Ko eni ho ‘Otua ‘a ia na‘a ne ‘ohake koe mei ‘Isipite — pea hulu fau ‘enau mā‘imoa ‘aki koe;

¹⁹ka na‘e pehē ho‘o mohu ‘alo‘ofa, ko ia na‘e ‘ikai te ke li‘aki kinautolu ‘i he Toafa; na‘e ‘ikai mahu‘i ‘a e Pou-‘ao mei he‘ene fotu ‘aho kiate kinautolu, pe ko e Pou-afi po‘uli, ke huluhulu ‘a e hala ‘oku nau ‘alu ai.

²⁰Pea na‘a ke foaki ho Laumālie Lelei ke ako kinautolu, pea na‘e ‘ikai te ke mamae‘i ho‘o mana mei honau ngutu, pea na‘a ke ‘ange vai ma‘a ‘enau fie inua.

²¹‘Io, ko e fāngofulu ta‘u na‘a ke tauhi kinautolu ‘i he Toafa; na‘e ‘ikai te nau masiva; na‘e ‘ikai luku honau kofu, pea, na‘e ‘ikai fepulopulasi honau va‘e.

²²Pea na‘a ke foaki kiate kinautolu ‘ani pule‘anga moni kakai, ‘o ke tufa kiate kinautolu ‘o a‘u ki he tuliki: ko ia na‘a nau ma‘u ‘a e fonua ‘o Sīhoni, ‘io, ko e fonua ‘o Tu‘i Hesiponi mo e fonua ‘o ‘Oki Tu‘i Pēsani.

²³Pea na‘a ke fakatokolahi honau hako ke tatau mo e ngaahi fetu‘u ‘o e langi, pea na‘a ke fakahū kinautolu ki he fonua na‘a ke folofola ai ki honau tupu‘anga ke nau hū ki ai ‘o ma‘u.

²⁴Ko ia na‘e hū ‘a e fānau, ‘o ma‘u ‘a e fonua, pea na‘a ke fakatōkilalo ‘i honau ‘ao ‘a e nofo he fonua, ‘a e kau Kēnani, pea na‘a ke tuku kinautolu ki honau nima, mo honau ngaahi tu‘i, mo e ngaahi kakai ‘o e fonua, ke nau fa‘iteliha ki ai.

²⁵Pea nau puke kolo ‘aa‘i, mo ha kelekele mahu: pea nau ma‘u ha ngaahi fale na‘e fonu ‘i he lelei fua pē, ko e ngaahi lepa tā, ko e ngaahi ngoue vaine mo e ngaahi ngoue ‘ōlive, pea lahi ‘a e ngaahi ‘akau kai: ko ia na‘a nau kai ‘o mākona, ‘o nau sino ai, pea nau fefiefia‘i ‘i ho‘o angalelei kuo lahi.

²⁶Ka na‘a nau talangata‘a mo angatu‘u kiate koe, ‘o nau fakasītua‘i ho‘o lao, ‘o nau fakapoongi ho‘o kau palōfita na‘e fai honau tākitala, ke fakafoki kinautolu ki he ‘Afiona, ‘io, na‘e hulu ‘enau mā‘imoa ‘aki koe.

²⁷Ko ia, na‘a ke tuku kinautolu ki he nima ‘o honau kau fakamamahi, ‘a ia na‘a nau fakamamahi‘i kinautolu. Pea ‘i he taimi ‘o ‘enau mamahi, na‘a nau tautapa ki he ‘Afiona, pea na‘a ke ongo‘i mei langi, pea ke ‘ange hanau taukapo, he ko Mohu ‘Alo‘ofa ‘a e ‘Afiona, pea na‘a nau fakahaofi kinautolu.

²⁸Ka ‘i he‘enau nonga leva, na‘a nau toe fai kovi ‘i he‘enau feangai mo koe: ko ia, na‘a ke li‘aki kinautolu, ‘o tuku ke fa‘iteliha ai honau ngaahi fili; ko ia na‘a nau fakaehaua kinautolu; ka ‘i he‘enau tafoki ‘o tautapa ki he ‘Afiona, na‘a ke ongo‘i mei langi; pea na‘e tu‘o lahi ho‘o hamusi kinautolu, he ko ho tau ‘a e ‘alo‘ofa.

²⁹Pea na‘a ke fai honau tākitala ke fakafoki kinautolu ki ho‘o lao. Ka ko e fa‘ahinga ko ia na‘a nau mofuta, pea na‘e ‘ikai te nau muitala ho‘o ngaahi tu‘utu‘uni, (ka ko e me‘a ia ka fai ki ai ‘e ha tangata, te ne mo‘ui ai) pea nau faka-uma-mamahi, ‘o faka-kia-kekeva, ‘o ‘ikai te nau talangofua.

³⁰Ka na‘e lahi ta‘u ho‘o fakatokotoka kiate kinautolu, pea ke fai honau tākitala ‘aki ho Laumālie, ‘o fou ‘i ho‘o kau palōfita, ka na‘e ‘ikai te nau fie fanongo: ko ia na‘a ke tukuange kinautolu ki he nima ‘o e ngaahi kakai ‘o e fonua kehekehe.

³¹Ka ‘i ho‘o mohu ‘alo‘ofa na‘e ‘ikai te ke fai ke nau ‘osi, pea na‘e ‘ikai te ke li‘aki kinautolu; he ko e ‘Otua angalelei mo ‘alo‘ofa ‘a e ‘Afiona.

³²Pea ko eni, ‘e homau ‘Otua, ‘a e ‘Otua Mā‘olunga, ‘a e Mafi, ‘a e Manavahē‘ia, ‘a e Tauhi Kovinānite mo e Meesi, ‘oua na‘a matamata si‘i ‘a e fu‘u faingata‘a kuo ne ma‘u kimautolu, ‘a homau ngaahi tu‘i, ‘a homau hou‘eiki, mo homau kau taula‘eiki, mo homau kau palōfita, mo ‘emau ngaahi kui, mo ho kakai kotoa, talu e kuonga ‘o e ngaahi Tu‘i ‘Āsilia ‘o a‘u mai ki he ‘aho ni.

³³Ka ‘oku tonuhia ‘a e ‘Afiona ‘i he fu‘u kovi kuo ke ‘omi kiate kimautolu; he kuo ke fai tōnunga, ka ko kimautolu kuo mau fai angahala;

³⁴pea ko homau ngaahi tu‘i, homau hou‘eiki homau ngaahi taula‘eiki, mo ‘emau ngaahi kui, kuo ‘ikai te nau fai ki ho‘o lao, pe tokanga ki ho‘o ngaahi tu‘utu‘uni, mo ho‘o ngaahi tākitala ‘a ia na‘a ke fai kiate kinautolu.

³⁵He ko kinautolu na‘e ‘ikai te nau ngāue kiate koe ‘i honau pule‘anga, pe ‘i he fu‘u lelei na‘a ke fai mai, pe ‘i he fonua ‘atā mo mahu na‘a ke foaki ke nau fe‘ao mo ia; pea na‘e ‘ikai te nau tafoki mei he‘enau tō‘onga kovi.

³⁶Me‘a mai; ko kimautolu ko e kau hopoate he ‘aho ni, pea ko e fonua na‘a ke foaki ki homau tupu‘anga ke kai hono fua mo hono lelei — vakai! ‘oku mau nofo ai ko e kau hopoate.

³⁷Pea ‘oku lahi ‘ene fakatupu fua ki he ngaahi tu‘i kuo ke tuku ke pule‘i kimautolu koe‘uhi ko ‘emau ngaahi angahala: pea ‘oku nau pule ki homau sino, pea ki he‘emau monumanu, mo fa‘iteliha ai, pea ‘oku mau faingata‘a‘ia lahi kimautolu.

³⁸Ka neongo ‘a e fu‘u me‘a ko ia kotoa, ka ko kimautolu ‘oku mau fai ha kovinānite pau, pea kuo mau tohi ia; pea kuo sila‘i ia ‘e homau hou‘eiki, ‘a homau kau Līvai, pea mo homau kau taula‘eiki.