Read KO E TOH TAPU KATOA TONGA KO ‘ĒSETA 3 Bible Online

KO ‘ĒSETA 3 - KO E TOH TAPU KATOA TONGA bible

KO ‘ĒSETA 3

¹HILI ‘a e ngaahi me‘a ko ia na‘e hākeaki‘i ‘e Kingi ‘Ehasivelo ‘a Hāmani foha ‘o Hametata, ko e ha‘a ‘Ēkaki,[6] ‘o ne hiki ia ki mu‘a, ‘o ne ‘ai hono nofo‘anga ke mā‘olunga hake ‘i he hou‘eiki kotoa na‘e fe‘ao mo ia.

²Pea ko e kau tamaio‘eiki kotoa ‘a e tu‘i na‘e ‘i he matapā ‘o e tu‘i na‘a nau tū‘ulutui ‘o hū kia Hāmani: he na‘e pehē ‘a e tu‘utu‘uni ‘a e tu‘i ki ai. Ka ko Motekiai na‘e ‘ikai te ne tū‘ulutui, pea na‘e ‘ikai te ne hū.

³Pea na‘e lea ‘a e kau tamaio‘eiki ‘a e tu‘i na‘e ‘i he matapā ‘o e tu‘i kia Motekiai, Ko e hā ‘oku ke paetaku‘i ai ‘a e tu‘utu‘uni ‘a e tu‘i?

⁴Pea ‘i he faifai pea ‘ikai te ne tokanga kiate kinautolu, neongo ‘enau lea ki ai ‘i he ‘aho kotoa pē, na‘a nau tala kia Hāmani, ke vakai pe ‘e tu‘u ‘a e ngaahi lea ‘a Motekiai; he kuo ne tala kiate kinautolu ko e Siu ia.

⁵Pea ‘i he vakai ‘e Hāmani ‘oku ‘ikai ke tū‘ulutui kiate ia ‘e Motekiai, pe hū, na‘a ne fonu ‘ita.

⁶Ka na‘e ‘ikai te ne āfeitaulalo ke ala kia Motekiai toko taha, he kuo nau fakahā kiate ia ‘a e kakai ‘o Motekiai: ko ia na‘e feinga ‘a Hāmani ke faka‘auha ‘a e kau Siu kotoa na‘e ‘i he pule‘anga kotoa ‘o ‘Ehasivelo, ‘io, ‘a e kakai ‘o Motekiai.

⁷‘I he ‘uluaki māhina, ‘a ia ko Nīsani, ‘i hono hongofulu mā ua ta‘u ‘o Kingi ‘Ehasivelo, na‘e fai ‘a e puli (ko e talotalo ia) ‘i he ‘ao ‘o Hāmani ki he ‘aho hokohoko, mo e māhina hokohoko, ‘o a‘u ki he hongofulu mā ua, ‘a ia ko e māhina ko ‘Ātali.

⁸Pea fakatau folofola ‘a Hāmani kia Kingi ‘Ehasivelo, ‘Oku ai ha kakai ‘e taha ‘oku movetevete mo tōtōholo ‘i he ngaahi kakai ‘o e ngaahi vahefonua ‘o ho pule‘anga; pea ko ‘enau ngaahi lao ‘oku makehe mo e kakai kotoa pē; pea ko e ngaahi lao ‘a e ‘afiona ‘oku ‘ikai te nau fai: pea ko ia ‘oku ‘ikai taau mo e ‘afiona ke tuku ai pē kinautolu.

⁹Ka lelei ki he ‘afiona, pea tuku ke fai ha tohi ke faka‘auha kinautolu; pea te u ‘atu ha mano‘i taleniti siliva ki he nima ‘o kinautolu ‘oku fai ‘a e ngāue, ke ‘omi ki he ngaahi fale koloa ‘o e tu‘i.

¹⁰Pea unuhi ‘e he tu‘i ‘a e mama mei hono nima, ‘o ne ‘ange kia Hāmani ko e foha ‘o Hametata, ‘a e ha‘a ‘Ēkaki, ko e fili ‘o e kau Siu.

¹¹Pea folofola ‘a e tu‘i kia Hāmani, Ko e me‘a ki he siliva kuo tuku ia ma‘au, mo e kakai foki ke fai ki ai ho‘o fa‘iteliha.

¹²Pea na‘e toki ui mai ‘a e kau sikalaipe ‘a e tu‘i ‘i he ‘uluaki māhina, mo hono ‘aho hongofulu mā tolu; pea na‘e fai tohi, ‘a ia kotoa na‘e tu‘utu‘uni ‘e Hāmani, ki he ngaahi tu‘i fakale‘o ‘o ‘ene ‘afio, pea ki he ngaahi kōvana na‘e pule ki he tukui vahefonua, pea ki he hou‘eiki ‘o e ngaahi kakai; na‘e fai ki he vahefonua takitaha ‘o fakatatau ki hono tohinima, pea ki he kakai takitaha ‘o fakatatau ki hono lea; na‘e tohi ‘i he huafa ‘o Kingi ‘Ehasivelo, pea na‘e sila‘i ‘aki ‘a e mama ‘a e tu‘i.

¹³‘Io, na‘e tuku atu ‘a e ngaahi tohi, ‘o ‘ave ‘e he kau ‘ave tohi ki he vahefonua kotoa pē ‘o e tu‘i, Tokua ke faka‘auha, ke tāmate‘i, mo faka‘osi ‘a e kau Siu kotoa pē, ‘a e talavou mo e motu‘a, ‘a e tamaiki mo e kau fefine, ‘i ha ‘aho pē taha, ‘io, ‘i hono ‘aho hongofulu mā tolu ‘o e māhina ko hono hongofulu mā ua, ‘a ia ko e māhina ko ‘Ātali, pea ke vete ‘enau koloa.

¹⁴Ko e hiki ‘o e tohi, ‘a ia na‘e fai koe‘uhi ke ‘ange ha tu‘utu‘uni ki he vahefonua takitaha, na‘e ‘atu ava pē ki he kakai kotoa pē, koe‘uhi ke nau toka teuteu ki he ‘aho ko ia.

¹⁵Na‘e ‘alu atu ‘a e kau ‘ave tohi kuo fakavave ‘i he fekau ‘a e tu‘i; pea na‘e tala ‘a e fono ‘i Sūsani Loto-kolo; pea na‘e nofo ‘a e tu‘i mo Hāmani ke inu kava; ka ko e kolo ko Sūsani na‘e ngatētē tu‘u.