Read KO E TOH TAPU KATOA TONGA KO ‘ĒSETA 4 Bible Online

KO ‘ĒSETA 4 - KO E TOH TAPU KATOA TONGA bible

KO ‘ĒSETA 4

¹PEA ‘i he ‘ilo ‘e Motekiai ‘a e me‘a kotoa kuo fai, na‘a ne hae hifo hono kofu, ‘o ne ‘ai ‘a e tauanga‘a mo e efu, ‘o ne hala loto kolo, ‘o ne ‘ai ‘ene fu‘u fākafoa fakamamahi.

²Na‘a ne a‘u foki ki he mata hū‘anga ki Loto‘ā; he na‘e tapu ke hū ha taha ‘i he matapā ‘o e tu‘i ‘oku ne ‘ai tauanga‘a.

³Pea ‘i he tukui vahefonua, ‘ilonga ha potu na‘e a‘u ki ai ‘a e fanongonongo mo e tu‘utu‘uni ‘a e tu‘i, na‘e hoko ai ‘a e fu‘u tangi ‘a e kakai Siu, mo e ‘aukai, mo e tangi lo‘imata, mo e lau‘aitu: pea na‘e fola ‘a e tauanga‘a mo e efu ki he tokolahi.

⁴Pea hū mai ‘a e kau fefine ‘a ‘Ēseta, mo ‘ene kau ‘iunoke, ‘o nau fakahā kiate ia; pea fu‘u teketekelili ai ‘a e kuini: pea ne fekau atu ha ni‘ihi mo e kofu ke fakakofu ‘a Motekiai, pea ke hu‘i ‘a e tauanga‘a meiate ia: ka na‘e ‘ikai te ne tali.

⁵Pea ui ange ‘e ‘Ēseta ‘a Hātaki, ko e taha ‘i he kau ‘iunoke ‘a e tu‘i, ‘a ia kuo ne fokotu‘u ke fakafe‘ao kiate ia, ‘o ne fekau ke ne ‘alu kia Motekiai ke ‘ilo pe ko e hā ‘a e me‘a, mo e hā ‘oku ne peheni ai.

⁶Pea hū ki tu‘a ‘a Hātaki kia Motekiai, ki he mala‘e ‘o e kolo ‘oku ‘i he mata hū‘anga ki Loto‘ā.

⁷Pea fakahā ki ai ‘e Motekiai ‘a e me‘a kotoa pē kuo hoko kiate ia, pea mo e mahu‘inga ‘o e siliva kuo tala‘ofa ‘e Hāmani te ne fakahū ki he ngaahi fale koloa ‘o e tu‘i, koe‘uhi ko e faka‘auha ‘o e kakai Siu.

⁸Na‘a ne ‘ange foki kiate ia ‘a e hiki ‘o e tohi tu‘utu‘uni kuo tufa ‘i Sūsani ke faka‘auha kinautolu, ke sio ki ai ‘a ‘Ēseta, pea ke fakahinohino kiate ia; pea ke fonosi ia ke ‘alu ki he tu‘i, ‘o hū, ‘o kole tonu ‘i hono fofonga telia hono kakai.

⁹Pea ha‘u ‘a Hātaki, ‘o fakahā kia ‘Ēseta ‘a e ngaahi lea ‘a Motekiai.

¹⁰Pea tali ‘e ‘Ēseta kia Hātaki, ‘o tuku ‘ene fekau kia Motekiai, ‘o pehē,

¹¹‘Oku lāu‘ilo ‘a e kau tamaio‘eiki ‘a e tu‘i, mo e kakai ‘o hono ngaahi vahefonua, ka ‘ilonga ha taha — ha tangata pe fefine — ‘a ia te ne a‘u atu ki he tu‘i, ki he loto‘ā loto, te‘eki ke ui mai ‘e he tu‘i, ‘oku taha pē ‘a e lao ki ai, ke ne mate, ngata pē ‘i ha taha ‘e mafao atu ki ai ‘e he tu‘i ‘a e sēpita koula, ka ne mo‘ui: ka ko au kuo ‘aho tolungofulu mo e ‘ikai ui mai au ke u ‘alu ki he tu‘i.

¹²Pea na‘a nau tala kia Motekiai ‘a e ngaahi lea ‘a ‘Ēseta.

¹³Toki fekau ‘e Motekiai ke nau foki kia ‘Ēseta mo e lea ko eni, ‘Oua te ke lau ‘i ho loto ko koe ‘oku ke ngali hao ‘i he kau Siu kotoa ko ho‘o ‘i he fale ‘o e tu‘i.

¹⁴He kapau te ke mātu‘aki fakalongo ‘i he taimi ni, ‘e tupu ma‘a e kakai Siu ha fakahaofi mo ha fakamo‘ui mei ha potu kehe, ka ko koe mo e fale ‘o ho‘o tamai ‘e ‘auha: pea na‘a kuo ke a‘u ki ho tu‘unga fakapule‘anga koe‘uhi pē ko ha taimi pehē.

¹⁵Pea fekau ‘e ‘Ēseta ke nau foki kia Motekiai mo e lea ko eni, ‘Alu, fakataha ‘a e kau Siu kotoa ‘oku toe ‘i Sūsani;

¹⁶pea mou ‘aukai ma‘aku, pea ‘oua te mou kai pe inu ‘o ‘aho tolu, po‘uli mo ‘aho: ko au foki mo ‘eku kau fefine te mau ‘aukai pehē; pea te u toki ‘alu ai ki he tu‘i, neongo ‘oku fehālaaki mo e lao: pea kapau te u mate ai, pea u mate.

¹⁷Pea laka ange ‘a Motekiai, ‘o fai ‘o hangē tofu pē hono tu‘utu‘uni ‘e ‘Ēseta.