Read KO E TOH TAPU KATOA TONGA KO ‘ĒSETA 6 Bible Online

KO ‘ĒSETA 6 - KO E TOH TAPU KATOA TONGA bible

KO ‘ĒSETA 6

¹KO E pō ko ia na‘e ‘ikai mamohe ‘a e tu‘i, pea ne fekau ke ‘omi ‘a e tohi Kalonikali, pea na‘e laulau atu ‘i he ‘ao ‘o e tu‘i.

²Pea faifai pea nau a‘u ki he fakamatala ko eni, Tokua na‘e faka‘ilo ‘e Motekiai ‘a Pikitana mo Tēlesi, ko e ongo ‘iunoke ‘a e tu‘i na‘e kau ‘i he kau le‘o hū‘anga, kuo na feinga ke ala kia Kingi ‘Ehasivelo.

³Pea folofola ‘a e tu‘i, Ko e hā ha fakahīkihiki‘i pe fakanofo tu‘unga na‘e fai kia Motekiai koe‘uhi ko e me‘a ko ia? Pea tali ‘a e kau tama ‘a e tu‘i na‘e tauhi ia, Kuo te‘eki ke fai kiate ia ha me‘a.

⁴Pea folofola ‘a e tu‘i, Ko hai ‘oku ‘i loto‘ā na? Tā ko Hāmani kuo ha‘u ki he loto‘ā tu‘a ‘o e fale ‘o e tu‘i, ke fakatau folofola ki he‘ene ‘afio ke fakatūfana‘i ‘a Motekiai ‘i he ‘akau kuo ne teu mo‘ona.

⁵Ko ia na‘e fakatau folofola hake ‘a e kau tama ‘a e tu‘i, Ko Hāmani ena ‘oku tu‘u mai mei loto‘ā. Pea folofola ‘a e tu‘i, Ke ne ha‘u pē.

⁶Pea hū mai ‘a Hāmani. Pea folofola ‘a e tu‘i ki ai, Ko e hā ‘e fai ki he tangata ‘oku hu‘u ki ai ‘a e loto ‘o e tu‘i ke fakahīkihiki‘i? Pea pehē ‘e Hāmani ‘i hono loto, Ko hai ha taha ‘oku hu‘u ‘a e finangalo ‘o e tu‘i ki ai ke fakahīkihiki‘i, ‘o tuku au?

⁷Pea fakatau folofola ‘a Hāmani ki he tu‘i, Ko e tangata ‘oku hu‘u ki ai ‘a e finangalo ‘o e tu‘i ke fai hono fakahīkihiki‘i — [7]

⁸ke ‘omi mo‘ona ‘a e kofu fakatu‘i ‘oku fa‘a tui ‘e he ‘afiona, mo e hoosi ‘oku heka ai ‘a e ‘afio, pea ‘oku ‘ai ha kalauni fakatu‘i ‘i hono ‘ulu:

⁹pea ke tuku ‘a e kofu mo e hoosi ki he nima ‘o ha taha ‘o e hou‘eiki nōpele ‘o e tu‘i, ke nau fakakofu ‘aki ‘a e tangata ‘oku tokanga ‘a e tu‘i ke fakahīkihiki‘i; pea ke ne fakahā‘ele ia ‘i he funga hoosi, ‘o hala loto kolo; pea ke ne ui‘aki ‘i hono ‘ao, ‘o pehē, Ko e tō‘onga eni ‘e fai ki ha tangata ‘oku tokanga ‘a e tu‘i ke fakahīkihiki‘i.

¹⁰Pea folofola ‘a e tu‘i kia Hāmani, Fai vave; to‘o ‘a e kofu mo e hoosi, ‘o hangē ko ho‘o lau, ‘o fai pehē kia Motekiai Siu ‘oku nofo ‘i he hū‘anga ki Loto‘ā: ke ‘oua ‘e hala ha me‘a ‘e taha ‘i he ngaahi me‘a kuo ke lau.

¹¹Pea to‘o ‘e Hāmani ‘a e kofu mo e hoosi, ‘o ne fakakofu ‘aki ‘a Motekiai, pea ne fakahā‘ele ia ‘i he loto kolo, ‘o ne ui‘aki ‘i mu‘a, Ko e tō‘onga eni ‘e fai ki ha tangata ‘oku tokanga ‘a e tu‘i ke fakahīkihiki‘i.

¹²Pea foki ‘a Motekiai ki he hū‘anga ki Loto‘ā, ka ka fakavave ‘a Hāmani ki hono fale ‘o‘ona, ‘oku ne ‘oiauē mo pūlou.

¹³Pea ‘a‘au ‘e Hāmani ki hono uaifi ko Sēlesi, pea ki hono kāinga kotoa, ‘a e me‘a kehekehe kuo hoko kiate ia. Pea tali ki ai ‘ene kau poto mo Sēlesi ko hono uaifi, ‘o pehē, Kapau ko e hako‘i Siu ‘a Motekiai, ‘a ia kuo ke kamata vaivai ki ai, ‘e ‘ikai te ke lava‘i ia, ka kuo pau te ke mātu‘aki holo ai.

¹⁴Lolotonga ‘enau kei alea mo ia mo e a‘u mai ‘a e kau ‘iunoke ‘a e tu‘i, ‘o nau fakavave ‘a e ‘ave ‘o Hāmani ki he kātoanga kuo teu ‘e ‘Ēseta.