Read KO E TOH TAPU KATOA TONGA KO ‘EKISOTO 11 Bible Online

KO ‘EKISOTO 11 - KO E TOH TAPU KATOA TONGA bible

KO ‘EKISOTO 11

¹PEA folofola ‘a Sihova kia Mōsese, ‘Oku kei toe ha tā ‘e taha ke u ‘omi kia Felo, pea ki ‘Isipite; hili ia te ne tukuange kimoutolu; ka ne ka tukuange homou kotoa te ne mātu‘aki kapusi kimoutolu mei heni.

²Ke ke lea mu‘a ‘i he telinga ‘o e kakai ke nau kole teunga siliva mo teunga koula, ‘a e tangata mei hono kau tangata, mo e fefine mei hono kau fefine.

³Pea na‘e tuku ‘e Sihova ke ‘ofeina ‘a e kakai ‘i he ‘ao ‘o e kau ‘Isipite. Koe‘uhi ko e tangata ko Mōsese na‘a ne mā‘olunga ‘aupito ‘i he fonua ko ‘Isipite, ‘i he ‘ao ‘o e kau tamaio‘eiki ‘a Felo, pea mo e ‘ao ‘o e kakai.

⁴Pea fakahā ‘e Mōsese, Ko eni ‘a e folofola ‘a Sihova, ‘I he tu‘uapō te u ‘alu atu ‘i he lotolotonga ‘o ‘Isipite:

⁵pea ‘e mate ‘a e ‘uluaki tama kotoa pē ‘i he fonua ko ‘Isipite, ‘o fai mei he ‘uluaki tama ‘a Felo ‘oku ‘afio ‘i hono taloni, ‘o a‘u ki he ‘uluaki tama ‘a e kaunanga ‘oku nofo mei he tu‘a me‘a momosi; pea mo e ‘uluaki tama kotoa pē ‘a e fanga manu.

⁶Pea ‘e ai ha fu‘u tangi ‘i he feitu‘u kotoa pē ‘o ‘Isipite, ‘a ia kuo te‘eki hano tatau, pea ‘e ‘ikai toe ai hano tatau.

⁷Ka ‘e ‘ikai ue‘i ‘e ha kulī hono ‘elelo ki ha taha ‘o ha‘a ‘Isileli, ki he kakai pe ki he manu; koe‘uhi ke mou ‘ilo ‘oku vahe‘i ‘e Sihova ‘a e kakai ‘Isipite mei he kakai ‘Isileli.

⁸Pea ko kinautolu ni kotoa pē ko ho‘o kau tamaio‘eiki te nau ‘alu hifo kiate au, pea te nau hū kiate au, ‘o pehē, ‘Alu atu koe, mo e kakai kotoa ‘oku fakaongo kiate koe; pea hili ia te u toki ‘alu atu. Pea ne hū kitu‘a meia Felo kuo lili.

⁹Pea na‘e folofola ‘a Sihova kia Mōsese, ‘o pehē, ‘E ‘ikai tokanga ‘a Felo kiate kimoua; koe‘uhi koe fakalahi ‘eku ngaahi mana ‘i he fonua ko ‘Isipite.

¹⁰Pea na‘e fai ‘e Mōsese mo ‘Ēlone ‘a e ngaahi mana ko ia kotoa pē ‘i he ‘ao ‘o Felo, ka ka fakafefeka ‘e Sihova ‘a e loto ‘o Felo, pea na‘e ‘ikai te ne tukuange ‘a ha‘a ‘Isileli mei hono fonua.