Read KO E TOH TAPU KATOA TONGA KO ‘EKISOTO 14 Bible Online

KO ‘EKISOTO 14 - KO E TOH TAPU KATOA TONGA bible

KO ‘EKISOTO 14

¹Pea folofola ‘a Sihova kia Mōsese, ‘o pehē,

²Lea ki ha‘a ‘Isileli ke nau foki ‘o fokotu‘u tēniti ki he potu hahake ‘o Piheloti, ‘i he vaha‘a ‘o Mikitoli mo e tahi, ‘i he potu hahake ‘o Peali-Sēfoni; ‘i hono hāngai ko ia te mou fokotu‘u homou tēniti, ‘i tahi.

³Pea ‘e lau ‘e Felo ki ha‘a ‘Isileli, Kuo nau ‘efihia ‘i he fonua, kuo tāpuni ‘a e Toafa kiate kinautolu.

⁴Pea te u fakafefeka ‘a e loto ‘o Felo, pea te ne tuli kiate kinautolu; pea te u lāngilangi‘ia ‘ia Felo, mo ‘ene fu‘u hōsitē kotoa; pea ‘e ‘ilo ‘e he kau ‘Isipite ko Sihova au. Pea na‘a nau fai pehē.

⁵Pea na‘e fakahā ki he Tu‘i ‘Isipite ‘oku hola ‘a e kakai: pea na‘e liliu ‘a e loto ‘o Felo mo e loto ‘o ‘ene kau tamaio‘eiki ki he kakai, pea nau pehē, Ko e hā kuo tau fai pehē ai, ‘o tukuange ‘a ha‘a ‘Isileli mei he tauhi kiate kitautolu?

⁶Pea ne teuteu ‘ene sāliote, ‘o ne ‘alu mo ia hono kakai:

⁷‘io na‘a ne ‘ave ‘a e sāliote fili ‘e onongeau, mo e sāliote kotoa pē ‘a e kau ‘Isipite, pea mo e ngaahi kapiteni ki hono kotoa.

⁸‘Io, na‘e fakafefeka ‘e Sihova ‘a e loto ‘o Felo ko e Tu‘i ‘Isipite, pea na‘a ne tuli ki ha‘a ‘Isileli; pea ko ha‘a ‘Isileli ē ‘oku nau ‘alu atu mo e nima kuo hiki tā.[14]

⁹Ka ka tuli kiate kinautolu ‘e he kau ‘Isipite, ‘o nau ma‘u kinautolu ‘oku nau ‘apitanga ‘i tahi — ‘io ko e hoosi kotoa mo e sāliote ‘a Felo, mo ‘ene tau heka hoosi mo ‘ene hōsitē, ka ‘oku nau ‘i Piheloti, ‘i he potu hahake ‘o Peali-Sēfoni.

¹⁰Pea fakaofiofi mai ‘a Felo, pea tāngaki hake ‘a ha‘a ‘Isileli, pea tā ko ‘Isipite ē ‘oku tulimui mai; pea na‘a nau manavahē fu‘u; pea kaila ‘a ha‘a ‘Isileli kia Sihova.

¹¹Pea na‘a nau pehē kia Mōsese, Ko e masiva tanu‘anga ‘apē ‘a ‘Isipite kuo ke ‘ave ai kimautolu ke mate ‘i he toafa ni? Ko e hā kuo ke ngaohi pehe‘i ai kimautolu, ‘o ‘omi mei ‘Isipite?

¹²‘Ikai ko eni ‘a e lea na‘a mau fai kiate koe ‘i ‘Isipite, ‘o mau pehē, Tukuange kimautolu ke mau tauhi ‘a e kakai ‘Isipite? He na‘e ngutuhua ange ‘emau tauhi ‘a e kakai ‘Isipite ‘i he‘emau mate ‘i he toafa ni.

¹³Pea na‘e lea ‘a Mōsese ki he kakai, ‘Oua ‘e manavahē; mou tu‘u pē ‘o mamata ki he fakamo‘ui ‘a Sihova, ‘a ia te ne fai ma‘amoutolu he ‘aho ni: he ko e kau ‘Isipite kuo mou sio ki ai he ‘aho ni ‘e ‘ikai te mou toe mamata ki ai ‘o ta‘engata.

¹⁴Ko Sihova te ne tau ma‘amoutolu, ka ko kimoutolu te mou tu‘u noa pē.

¹⁵Pea folofola ‘a Sihova kia Mōsese, Ko e hā ‘oku ke tangi ai kiate au? lea ki ha‘a ‘Isileli ke nau laka atu.

¹⁶Ka ko koe te ke ofa‘aki ho tokotoko, ‘o mafao ho nima ki tahi, ‘o vaeua ia: pea ‘e ‘alu ‘a ha‘a ‘Isileli ‘i he loto tahi ‘i he mōmoa.

¹⁷Pea ko au ē ‘oku ou fakafefeka ‘a e loto ‘o e kakai ‘Isipite, pea te nau muimui kiate kimoutolu, pea te u lāngilangi‘ia ‘ia Felo mo ‘ene hōsitē kotoa, ‘a ‘ene tau heka hoosi mo ‘ene tau sāliote.

¹⁸Pea ‘e ‘ilo ‘e he kau ‘Isipite ko Sihova au, ‘oka u ka fakalāngilangi‘i au ‘ia Felo, ‘i he‘ene tau sāliote mo ‘ene tau heka hoosi.

¹⁹Pea na‘e hiki ‘a e ‘āngelo ‘a ‘Elohimi, ‘a ia kuo ne hā‘ele mu‘omu‘a ki he tau ‘a ‘Isileli, ‘o ne hā‘ele mei mui; pea na‘e hiki ‘a e pou ‘ao mei honau ‘ao, ‘o tu‘u mei honau tu‘a;

²⁰‘o ne hū ‘i he vaha‘a ‘o e tau ‘a ‘Isipite mo e tau ‘a ‘Isileli, ‘o ne ‘i ai pē ko e ‘ao mo e fakapo‘uli; pea ne fakamaama ‘i he pō:[15] ko ia na‘e ‘ikai ke vāfeinofi ai ‘a ē mo ē ‘i he pō kotoa.

²¹Pea mafao atu ‘e Mōsese hono nima ki tahi, pea na‘e fakatafe atu ‘e Sihova ‘a e tahi ‘aki ‘a e matangi mālohi mei hahake ‘i he pō ko ia kotoa, ‘o ne fakamātu‘u ‘a e tahi, pea na‘e tu‘usi ‘a e tahi.

²²Pea na‘e hū ‘a ha‘a ‘Isileli ki he loto tahi ‘i he mōmoa; pea na‘e tu‘u mai ‘a e tahi mo‘onau ‘ā mei to‘omata‘u mo to‘ohema.

²³Pea na‘e tuli atu kiate kinautolu ‘a e kau ‘Isipite, ‘o hū ki he loto tahi ‘a e ngaahi hoosi kotoa pē ‘a Felo, ‘a ‘ene tau sāliote mo ‘ene tau heka hoosi.

²⁴Pea ‘i he uasi pongipongi, ‘iloange na‘e fofonga atu ‘a Sihova ki he tau ‘a ‘Isipite ‘i he pou afi mo ‘ao, ‘o ne veuki ‘a e tau ‘a ‘Isipite;

²⁵‘o ne fakapine ‘a e me‘a teka ‘o ‘enau ngaahi sāliote, ‘o fakamatekangata‘a. Pea pehē ‘e he kau ‘Isipite, Tau hola mei he ‘ao ‘o ‘Isileli; he ko Sihova ‘oku tau ma‘anautolu ki he kau ‘Isipite.

²⁶Pea folofola ‘a Sihova kia Mōsese, Mafao atu ho nima ki tahi, koe‘uhi ke foki ‘a e tahi ‘o lōmaki‘i ‘a e kakai ‘Isipite, ‘a e tau sāliote mo e tau heka hoosi.

²⁷Pea mafao ‘e Mōsese hono nima ki tahi, pea na‘e foki mai ‘a e tahi ki hono loloto ‘i he ma‘a ‘a e ‘aho; pea hola ‘a e kau ‘Isipite, ‘o fakafetaulaki ki ai, pea tupe‘i ‘e Sihova ‘a e kau ‘Isipite ki loto tahi.

²⁸‘Io, na‘e foki ‘a e tahi, ‘o lōmaki‘i ‘a e tau sāliote mo e tau heka hoosi mo e hōsitē kotoa ‘a Felo na‘e muimui atu kiate kinautolu ki loto tahi: na‘e ‘ikai toe hanau momo‘i toko taha.

²⁹Ka ka hā‘ele ‘a ha‘a ‘Isileli ‘i he mōmoa ‘i he loto tahi, pea na‘e tu‘u mai ‘a e tahi mo‘onau ‘ā ‘i honau to‘omata‘u mo to‘ohema.

³⁰Ko ia, na‘e fakamo‘ui ‘e Sihova ‘a ‘Isileli ‘i he ‘aho ko ia mei he nima ‘o e kau ‘Isipite; pea na‘e mamata ‘a ‘Isileli ki he kau ‘Isipite ‘oku nau mate holo ‘i matātahi.

³¹Pea vakai ‘e ‘Isileli ‘a e ngāue lahi kuo fai ‘e Sihova ki he kau ‘Isipite; pea na‘e ‘apasia ‘a e kakai kia Sihova, pea na‘a nau tui kia Sihova mo ‘ene tamaio‘eiki ko Mōsese.