Read KO E TOH TAPU KATOA TONGA KO ‘EKISOTO 15 Bible Online

KO ‘EKISOTO 15 - KO E TOH TAPU KATOA TONGA bible

KO ‘EKISOTO 15

¹Toki hiva‘aki ‘e Mōsese mo ha‘a ‘Isileli ‘a e hiva ni kia Sihova, ‘o nau pehē, Te u hiva kia Sihova, he kuo ne lāngilangi‘ia lahi; Ko e hoosi mo hono angi kuo ne laku ki tahi.

²Ko hoku mālohinga mo ‘eku ta‘anga ‘a IAA; Pea kuo ne hoko ko hoku fakamo‘ui‘anga, Ko hoku ‘Otua eni, pea te u fakamālō‘ia; Ko e ‘Otua ‘o ‘eku ngaahi kui, pea te u fakahīkihiki‘i ia.

³Ko e pāte‘i tau ‘a Sihova: Ko Sihova hono hingoa.

⁴Ko e ngaahi sāliote ‘a Felo mo ‘ene hōsitē kuo ne tolo ki tahi na: ‘Io, ko ‘ene kau kapiteni fili kuo pe‘ehi ‘i he Tahi Kulokula.

⁵‘Oku ‘ufi‘ufi kinautolu ‘e he ngaahi moana: Na‘a nau ‘alu hifo ki he kilisitahi ‘o hangē ha maka.

⁶Ko ho nima to‘omata‘u, ‘e Sihova, kuo ongoongo ia ‘i he ivi lahi: Ko ho nima to‘omata‘u, ‘e Sihova, ‘oku ne laiki ‘a e fili ke lailai.

⁷Pea ‘i he pehē fau ho lāngilangi‘ia ‘Oku ke tulaki ‘a kinautolu na‘e tu‘u ki he ‘Afiona. ‘Oku ke ‘ai atu ho houhau; ‘Oku ke keina kinautolu ‘o hangē ha kafukafu.

⁸‘Io, ‘i he mānava ‘o ho fofonga na‘e fokotu‘utu‘u ‘a e ngaahi vai, Na‘e tu‘u hake ‘a e vai ‘o hangē ha puke, Na‘e fefeka ‘a e tahi ‘i he loto moana.

⁹Na‘e pehē ‘e he fili, Te u tuli, te u ma‘u. Te u tufa ‘a e vete, ‘E topono hoku loto kiate kinautolu; Te u unuhi ‘eku heletā, ‘E faka‘auha kinautolu ‘e hoku nima.

¹⁰Na‘a ke ifi ‘aki ho‘o mānava, Na‘e ‘u‘ufi kinautolu ‘e he tahi: Na‘e ngalo hangē ha pulu ‘i he ngaahi vai lalahi.

¹¹Ko hai ‘i he ngaahi ‘otua ‘oku tatau mo koe, ‘e Sihova? Ko hai ‘oku tatau mo koe, ko e lāngilangi‘ia ‘i he mā‘oni‘oni, Ko e manavahē‘ia ‘i he fakamālō, ko e fai me‘a fakaofo?

¹²Na‘a ke mafao atu ho nima to‘omata‘u, ‘Oku fōngia ‘e he kelekele ‘a kinautolu.

¹³Kuo ke taki atu ‘i ho‘o ‘alo‘ofa ‘a e kakai ni ne ke huhu‘i; Kuo ke tataki ‘i ho mālohi ki ho ‘afio‘anga tapu.

¹⁴Kuo fanongo ‘a e ngaahi kakai — ‘oku nau ilifia: Kuo puke ‘i he tete ‘a e nofo Filisitia.

¹⁵Toki tāfu‘ua ‘a e hou‘eiki ‘o ‘Ītomi ia. Ko e kau to‘a ‘o Moape kuo nau puke ‘i he fakalīfulifusia: Kuo vai ‘a e nofo Kēnani kotoa.

¹⁶‘Oku tō kiate kinautolu ‘a e tailiili mo e lilika; ‘I he lahi ‘o ho ivi ‘oku nau longo pē hangē ha maka; Kae‘oua ke laka atu ho kakai, ‘e Sihova, Kae‘oua ke laka atu ‘a e kakai ni kuo ke huhu‘ia.

¹⁷Te ke fakahū kinautolu, ‘o tō ‘i he mo‘unga ‘o ho tofi‘a, ‘A e potu kuo ke teuteu ko ho ‘afio‘anga, ‘e Sihova, ‘A e potu tapu, ‘e ‘Ātonai, kuo fokotu‘u ‘e ho nima.

¹⁸Ko Sihova te ne Hau ‘o lauikuonga pea ta‘engata.

¹⁹He na‘e hū ‘a e hoosi ‘a Felo mo ‘ene tau sāliote mo ‘ene tau heka hoosi ki tahi, pea na‘e fakafoki mai ‘e Sihova ‘a e ngaahi vai ‘o e tahi kiate kinautolu; ka ko ha‘a ‘Isileli na‘a nau laka ‘i he mōmoa ‘i he loto tahi.

²⁰Pea ko Meliame ko e fefine palōfita, ko e tuofefine ‘o ‘Ēlone, na‘a ne to‘o ha nafa fāngongo, pea muimui kiate ia ‘a e kau fefine kotoa pē, ‘o nau ‘alu mo e ngaahi lali mo e me‘e.

²¹Pea fai ‘e Meliame ‘a e tali kiate kinautolu, ‘o pehē, Hiva kia Sihova, he kuo ne lāngilangi‘ia lahi, Ko e hoosi mo hono angi kuo ne laku ki tahi.

²²Pea hiki ‘e Mōsese ‘a ‘Isileli mei he Tahi Kulokula, pea nau hū ai ki he toafa ‘o Sua; pea nau ‘alu ‘i he toafa ‘o ‘aho tolu, ‘o ‘ikai te nau ‘ilo ha vai.

²³Pea nau ha‘u ai ki Mala, ka na‘e ‘ikai te nau lava ke inu ‘a e ngaahi vai ‘o Mala, he na‘e kona: ‘ā ē ā na‘e fakahingoa ai ko Mala (Tamala).

²⁴Pea na‘e mumuhu ‘a e kakai kia Mōsese, ‘o pehē, Ko e hā te mau inu?

²⁵Pea tautapa ia kia Sihova, pea fakahā kiate ia ‘e Sihova ha ‘akau, pea ne lī ia ki he vai, pea na‘e melie ‘a e ngaahi vai. Ko e potu ia na‘a ne fokotu‘u ma‘a e kakai ha founga mo ha totonu, pea ko e potu ko ia na‘a ne sivi ai kinautolu.

²⁶‘O ne folofola, ‘o pehē, Kapau te ke mātu‘aki muitala ki he lea ‘a Sihova ko ho ‘Otua, mo ke fai ‘a e me‘a ‘oku hā totonu ki hono ‘ao, pea ke fakaongo ki he‘ene ngaahi fekau, ‘o tauhi ‘ene ngaahi tu‘utu‘uni kotoa pē, ‘e ‘ikai ai te u ‘ai kiate koe ha taha ‘o e ngaahi mahaki ‘a ia na‘a ku ‘ai ki he kau ‘Isipite: he ko au ko Sihova-Faito‘o-koe.

²⁷Pea nau a‘u ai ki ‘Ēlimi, pea ‘i he potu ko ia na‘e ai ha vai ‘e hongofulu mā ua, mo e fu‘u paame ‘e fitungofulu: pea nau fokotu‘u tēniti ‘i ai, ‘o ofi ki he ngaahi vai.