Read KO E TOH TAPU KATOA TONGA KO ‘EKISOTO 16 Bible Online

KO ‘EKISOTO 16 - KO E TOH TAPU KATOA TONGA bible

KO ‘EKISOTO 16

¹PEA nau hiki mei ‘Ēlimi, pea nau a‘u, ‘a e fakataha kātoa ‘o ha‘a ‘Isileli, ki he Toafa ‘o Sini, ‘a ia ‘oku ‘i he vaha‘a ‘o ‘Ēlimi mo Sainai, ‘i hono hongofulu mā nima ‘o e ‘aho, ‘i hono ua ‘o e māhina ‘i he‘enau ‘alu atu mei ‘Isipite.

²Pea na‘e lāunga ‘a e fakataha kotoa ‘o ha‘a ‘Isileli kia Mōsese mo ‘Ēlone ‘i he toafa:

³pea pehē kiate kinaua ‘e ha‘a ‘Isileli, Taumaiā na‘a mau mate ‘i he nima ‘o Sihova ‘i ‘Isipite, lolotonga na‘a mau feangai mo e ngaahi kulo kakano, mo kai mā ‘o mākona; he kuo mo ‘omi kimautolu ki he toafa ni ke tāmate‘i ‘a e fu‘u fakataha ni ‘i he honge.

⁴Pea folofola ‘a Sihova kia Mōsese, Ko eni te u faka‘uha mā ma‘amoutolu mei langi, pea ‘e ‘alu atu ‘a e kakai ‘o tufi ‘i he ‘aho ‘a e me‘a ‘o e ‘aho ko ia, koe‘uhi ke u sivi kinautolu pe te nau fou ‘i he‘eku lao pe ‘ikai.

⁵Pea ka hoko mai hono ono ‘o e ‘aho, te nau teuteu ‘a ia te nau ha‘u mo kinautolu; pea ‘e liunga ua ia ‘i he me‘a ‘oku nau tufi ‘i he ngaahi ‘aho kehe.

⁶Pea lea ‘a Mōsese mo ‘Ēlone ki ha‘a ‘Isileli kātoa. Te mou ‘ilo efiafi kuo ‘omi kimoutolu ‘e Sihova mei ‘Isipite:

⁷pea te mou mamata pongipongi ki he lāngilangi ‘o Sihova, he‘ene ongo‘i ho‘omou lāunga kiate ia: he ko e hā kimaua ke mou lāunga kiate kimaua?

⁸Pea lea ‘a Mōsese, Ko e foaki ‘e Sihova kiate kimoutolu efiafi ha kakano ke kai, mo e mā ‘apongipongi ke mou mākona, ko ‘ene fanongo ki ho‘omou lāunga ‘a ia ‘oku mou fai kiate ia; pea ko e hā kimaua? ‘Oku ‘ikai ko kimaua ‘oku mou lāunga ki ai, ka ko Sihova.

⁹Pea lea ‘a Mōsese kia ‘Ēlone, ‘o pehē, Tala ki he fakataha kotoa ‘o ha‘a ‘Isileli ke nau ‘unu‘unu mai ki he ‘ao ‘o Sihova; he kuo ne ‘afio‘i ‘enau lāunga.

¹⁰Pea ‘i he lea ‘a ‘Ēlone ki he fakataha kotoa ‘o ha‘a ‘Isileli, na‘a nau hanga ki he toafa, pea ‘iloange na‘e hā ‘a e Sikaina ‘o Sihova ‘i he ‘Ao.

¹¹Pea na‘e folofola ‘a Sihova kia Mōsese, ‘o pehē,

¹²Kuo u ongo‘i ‘a e lāunga ‘a ha‘a ‘Isileli: lea kiate kinautolu ‘o pehē, Efiafi hifo te mou kai kakano, pea pongipongi hake te mou mākona ‘i he mā; pea te mou ‘ilo ko Sihova au ko homou ‘Otua.

¹³Pea ‘i he hoko ‘a e efiafi, na‘e ‘alu hake ‘a e kueili, ‘o ‘ufi‘ufi ‘a e ‘apitanga; pea ‘i he pongipongi hake na‘e ai ha ‘uha hahau ki he ‘apitanga, ‘o takatakai.

¹⁴Pea ‘i he ‘alu hake ‘a e ‘uha hahau, tā ko ena ‘i he toafa ha mokimoki‘i me‘a fuopotopoto, ‘o iiki hangē ko e hahau maka ‘oku ‘i he funga kelekele.

¹⁵Pea ‘i he mamata ki ai ‘e ha‘a ‘Isileli na‘a nau fepehē‘aki, Ko e mana ia:[16] he na‘e ‘ikai te nau ‘ilo pe ko e hā ia. Pea lea ‘a Mōsese kiate kinautolu, Ko ‘ena ia ‘a e mā kuo foaki ‘e Sihova ma‘amou kai.

¹⁶Ko eni ‘a e me‘a kuo tu‘utu‘uni ‘e Sihova, Ke tufi mei ai takitaha ‘o fakatatau mo ‘ene kai, ko e oma ki he toko taha, ‘o fakatatau ki he lau ‘a homou kakai. Ke takitaha tufi ma‘anautolu ‘oku ‘i he tēniti.

¹⁷Pea na‘e fai pehē ‘a ha‘a ‘Isileli, ‘o nau tufi; lahi ‘a e ni‘ihi, si‘i ‘a e ni‘ihi.

¹⁸Pea nau fua oma, pea na‘e ‘ikai hulu atu ‘a ha‘a tufi lahi, pea ‘ikai fusimo‘omo ‘a ha‘a tufi si‘i: kuo nau tufi takitaha fe‘unga mo ‘ene kai.

¹⁹Pea lea ‘a Mōsese kiate kinautolu, ‘E ‘ikai fakatoe ‘e ha taha ha me‘a ki he ‘apongipongi:

²⁰ka na‘e ‘ikai te nau tokanga kia Mōsese, pea na‘e fakatoe ‘e ha ni‘ihi ha me‘a ki he ‘apongipongi, pea na‘e ‘uangahia ia pea namua‘a: pea na‘e ‘ita ‘a Mōsese kiate kinautolu.

²¹Pea na‘a nau tufi ia ‘i he pongipongi kotoa pē, ‘o takitaha ke fe‘unga mo ‘ene kai; pea ‘i he māfana ‘a e la‘ā na‘e ‘auhia.

²²Pea ‘iloange ‘i hono ono ‘o e ‘aho ko e mā na‘a nau tufi na‘e liunga ua, ko e taki oma ‘e ua ki he toko taha: pea na‘e ha‘u ‘a e hou‘eiki kotoa ‘o e kakai, ‘o nau fakahā kia Mōsese.

²³Pea ne pehē kiate kinautolu, Ko eni ia na‘e folofola ki ai ‘a Sihova, Ko e ‘apongipongi ko e mālōlō; ko e sāpate tapu kia Sihova: ‘ilonga ha me‘a ke ta‘o, pea ta‘o, ‘ilonga ha me‘a ke haka, pea haka; pea ‘ilonga ha me‘a ‘oku toe, tuku ke tauhi ma‘amoutolu ki he ‘apongipongi.

²⁴Pea na‘a nau tuku ia ki he ‘apongipongi, ‘o hangē ko e tu‘utu‘uni ‘a Mōsese; pea na‘e ‘ikai namua‘a, pea na‘e ‘ikai ha ‘uanga ‘i ai.

²⁵Pea pehē ‘e Mōsese, Mou kai ia he ‘aho ni, he ko e ‘aho ni ko e Sāpate ‘a Sihova; ko e ‘aho ni ‘e ‘ikai te mou ‘ilo ia ‘i he vao.

²⁶Ko e ‘aho ‘e ono te mou tufi ia; ka ‘i hono ‘aho fitu, ‘a ia ko e Sāpate, ‘e ‘ikai ‘i ai.

²⁷Pea ko eni ‘i he ‘aho Sāpate na‘e ‘alu kitua‘ā ha ni‘ihi ‘o e kakai ke tufi, ka na‘e ‘ikai te nau ‘ilo ai.

²⁸Pea folofola ‘a Sihova kia Mōsese, ‘E tuku ‘afē ho‘omou ta‘efie tauhi ‘eku ngaahi tu‘utu‘uni mo ‘eku ngaahi lao?

²⁹Vakai, he kuo ‘atu ‘e Sihova kiate kimoutolu ‘a e Sāpate; ko ia ‘oku ne foaki ia kiate kimoutolu ‘i hono ‘aho ono ‘a e mā ‘o e ‘aho ‘e ua; mou takitaha nofo ‘i hono tangutu‘anga; ‘oua ‘e ‘alu kitu‘a ha taha mei hono feitu‘u ‘i he ‘aho Sāpate.

³⁰Ko ia na‘e nofo ai ‘a e kakai ‘i he ‘aho Sāpate.

³¹Pea na‘e fakahingoa ia ‘e he fale ‘o ‘Isileli ko e mana:[17] pea na‘e hangē ia ko e tenga‘i kolianita, ‘o hinehina; pea ko hono ifo na‘e hangē ko e pisikete natu honi.

³²Pea na‘e pehē ‘e Mōsese, Ko eni ‘a e me‘a kuo tu‘utu‘uni ‘e Sihova, Fakafonu ha oma mei ai ke tauhi ki homou ngaahi to‘utangata, koe‘uhi ke nau mamata ki he me‘a ‘a ia kuo u fafanga ‘aki kimoutolu ‘i he Toafa ‘i he‘eku ‘omi kimoutolu mei ‘Isipite.

³³Pea lea ‘a Mōsese kia ‘Ēlone, To‘o ha ‘angame‘a ‘e taha, ‘o ‘ai ki ai ha oma kātoa ‘o e mana, ‘o tuku ‘i he ‘ao ‘o Sihova ke tauhi ki homou ngaahi to‘utangata.

³⁴Hangē ko e tu‘utu‘uni ‘a Sihova kia Mōsese, ko ia na‘e tuku ia ‘e ‘Ēlone ‘i he ‘ao ‘o e Fakamo‘oni‘anga ke tauhi.

³⁵Pea na‘e kai mana ‘e ha‘a ‘Isileli ‘i he ta‘u ‘e fāngofulu, kae‘oua ke nau a‘u ki he fonua nofo‘anga; na‘a nau kai mana ‘o a‘u ki he‘enau lava ki he tafafonua ‘o Kēnani.

³⁶Pea ko eni ko e oma ko e vahehongofulu ‘o e efa.