Read KO E TOH TAPU KATOA TONGA KO ‘EKISOTO 17 Bible Online

KO ‘EKISOTO 17 - KO E TOH TAPU KATOA TONGA bible

KO ‘EKISOTO 17

¹PEA hiki ai ‘a e nofo‘anga kotoa ‘o ‘Isileli mei he Toafa ‘o Sini, ‘o nau fononga ‘i he angi ‘a Sihova, ‘o nau fokotu‘u tēniti ‘i Lefitimi: pea na‘e ‘ikai ha vai ke inu ‘e he kakai.

²Pea na‘e lau fakamamahi ‘a e kakai kia Mōsese, ‘o nau pehē, Fei mo ‘omi hamau vai inu. Pea tali ‘a Mōsese kiate kinautolu, Ko e hā ‘oku mou fai ai ho‘omou mamahi kiate au? Ko e hā ‘oku mou ala‘aki ai kia Sihova?

³Pea na‘e feinga vai ‘a e kakai ‘i he potu ko ia; pea na‘e lāunga ‘a e kakai kia Mōsese, ‘o pehē, Ko e hā kuo pehē ai, ho‘o ‘omi kimautolu mei ‘Isipite ke tāmate‘i kita mo ‘ete fānau mo ‘ete fanga manu ‘aki ‘a e fie inu?

⁴Pea tautapa ‘a Mōsese kia Sihova, ‘o pehē, Ko e hā te u fai ma‘a e kakai ni? ‘oku toe si‘i pea nau tolongi au.

⁵Pea folofola ‘a Sihova kia Mōsese, Laka atu ‘i he ‘ao ‘o e kakai, pea ke ‘alu mo koe ‘a e kau Mātu‘a ‘o ‘Isileli; pea ko ho tokotoko, ‘a ia na‘a ke taa‘i ‘aki ‘a e vaitafe, to‘o ia ‘i ho nima, pea ke ‘alu.

⁶Ko au ‘eni te u ‘i he potu ko ia, ‘o tu‘u ‘i ho ‘ao ‘i he maka ‘i Hōlepi; pea te ke taa‘i ‘a e maka, pea ‘e ‘alu atu ha vai mei ai ke inu ‘e he kakai. Pea na‘e fai pehē ‘e Mōsese ‘i he ‘ao ‘o e kau Mātu‘a ‘o ‘Isileli.

⁷Pea na‘a ne fakahingoa ‘a e potu ko ia ko Masa (‘Ahi‘ahi), mo Mēlipa (ko Kē),[18] koe‘uhi ā ko e kē ‘a ha‘a ‘Isileli, pea koe‘uhi ko ‘enau ala‘aki kia Sihova; he‘enau pehē, Pe ‘oku ‘i hotau lotolotonga ‘a Sihova pe ‘ikai?

⁸Pea ha‘u ai ‘a ‘Amaleki ‘o tau mo ‘Isileli ‘i Lefitimi.

⁹Pea lea ‘a Mōsese kia Siosiua, Fili mai ha kau tangata, pea ke ‘alu kitua‘ā ‘o tau‘i ‘a ‘Amaleki: pongipongi hake te u tu‘u au ‘i he tumutumu ‘o e mo‘unga mo e tokotoko ‘o ‘Elohimi ‘i hoku nima.

¹⁰Pea na‘e fai ‘e Siosiua ‘o hangē ko e lea ‘a Mōsese kiate ia, ‘o ne tau mo ‘Amaleki: ka ko Mōsese mo ‘Ēlone mo Hua na‘a nau ō hake ki he tumutumu ‘o e mo‘unga.

¹¹Pea na‘e hoko ‘o pehē, ka hiki ‘e Mōsese hono nima, pea mālohi ‘a ‘Isileli; ka ‘oka fakamālōlō hifo hono nima, pea mālohi ‘a ‘Amaleki.

¹²Ka ko e ongo nima ‘o Mōsese na‘e mamafa; ko ia na‘a nau to‘o ha maka, ‘o ‘ai ‘i lalo, ‘o ne nofo ai; pea puke tu‘u hono nima ‘e ‘Ēlone mo Hua, ko e taha mei hē mo e taha mei hē; ko ia na‘e tu‘u ma‘u hono ongo nima ‘o a‘u ki he tō ‘a e la‘ā.

¹³Pea na‘e ikuna ‘e Siosiua ‘a ‘Amaleki mo hono kakai ‘aki ‘a e mata ‘o e heletā.

¹⁴Pea na‘e folofola ‘a Sihova kia Mōsese, Tohi ‘eni ‘i he Tohi ko e fakamanatu, pea lau ‘i he ongo telinga ‘o Siosiua, he te u mātu‘aki tāmate‘i ‘a e manatu kia ‘Amaleki mei he lalo langi.

¹⁵Pea na‘e langa ‘e Mōsese ha ‘esi feilaulau, ‘o ne fakahingoa ia ko Sihova-Nisi (Ko ‘eku fuka ‘a Sihova);

¹⁶he na‘a ne pehē, Ko ha nima ‘i he fuka ‘a IAA;[19] ko e tau ‘a Sihova mo ‘Amaleki ‘o laui to‘utangata.