Read KO E TOH TAPU KATOA TONGA KO ‘EKISOTO 18 Bible Online

KO ‘EKISOTO 18 - KO E TOH TAPU KATOA TONGA bible

KO ‘EKISOTO 18

¹PEA ko Setelō ko e taula‘eiki ‘o Mitiani mo e kāinga ‘o e uaifi ‘o Mōsese, na‘a ne fanongo ki he ngaahi me‘a kuo fai ‘e he ‘Otua ma‘a Mōsese pea mo hono kakai ‘Isileli, ‘o pehē kuo ‘omi ‘e Sihova ‘a ‘Isileli mei ‘Isipite.

²Pea ‘omi ‘e Setelō ko e kāinga ‘o e uaifi ‘o Mōsese ‘a Sīpola ko e uaifi ‘o Mōsese, neongo kuo ne fakafoki ia,

³pea mo ‘ene ongo tama, ‘a ia ko e hingoa ‘o e taha ko Kēsome (Nofo-muli)[20] koe‘uhi ko ‘ene pehē, Kuo u ‘āunofo ‘i ha fonua muli:

⁴pea ko e hingoa ‘o e taha ko ‘Eliesa (Ko e ‘Otua-ko-hoku-tokoni),[21] koe‘uhi “ko e ‘Otua ‘o ‘eku tamai na‘e ‘i ai ma‘aku tokoni, ‘o ne fakahaofi mei he heletā ‘a Felo.”

⁵Pea ha‘u ‘a Setelō ko e kāinga ‘o e uaifi ‘o Mōsese kia Mōsese ki he Toafa kuo ha‘u mo ia ‘ene fānau mo hono uaifi, ‘o ne fokotu‘u tēniti ‘i he potu ko ia ‘i he Mo‘unga ‘o ‘Elohimi.

⁶Pea ne lea kia Mōsese ‘o pehē, Ko au eni ko e kāinga ‘o ho uaifi, ‘a Setelō, kuo u ha‘u kiate koe, pea ‘oku ‘iate au ho uaifi, pea ‘oku ‘iate ia ‘ene ongo tama.

⁷Pea hū kitu‘a ‘a Mōsese ke fakafetaulaki ki he kāinga ‘o hono uaifi, ‘o ne faka‘apa‘apa ki ai, mo ‘uma kiate ia; pea na fetāpaaki, pea nau toki hū ki hē tēniti.

⁸Pea ‘a‘au ‘e Mōsese ki he kāinga ‘o hono uaifi ‘a e me‘a kotoa kuo fai ‘e Sihova kia Felo, pea ki he kakai ‘Isipite, koe‘uhi ko ‘Isileli, ‘a e ngaahi faingata‘a kuo nau mo‘ua ai ‘i he hala, mo e fakahaofi kinautolu ‘e Sihova.

⁹Pea na‘e fiefia ‘a Setelō ‘i he ngaahi lelei kuo fai ‘e Sihova ma‘a ‘Isileli, ‘a ia kuo ne fakamo‘ui ia mei he nima ‘o e kakai ‘Isipite.

¹⁰Pea pehē ‘e Setelō, Ke mālō‘ia ‘a Sihova, ‘a ia kuo ne fakahaofi kimoutolu mei he nima ‘o e kau ‘Isipite, pea mei he nima ‘o Felo, ‘a ia kuo ne fakahaofi ‘a e kakai mei he lalo nima ‘o e kau ‘Isipite.

¹¹Kuo u toki ‘ilo ‘oku lahi ‘a Sihova ‘i he ngaahi ‘otua kotoa pē; he ‘i he me‘a na‘a nau fakamofutofuta ai na‘a ne ha‘aki kinautolu.

¹²Pea to‘o ‘e Setelō ko e kāinga ‘o e uaifi ‘o Mōsese ha feilaulau-mōifua, mo e feilaulau ni‘ihi ma‘a e ‘Otua; pea na‘e omi ‘a ‘Ēlone mo e kau Mātu‘a ‘o ‘Isileli ke keinanga mo e kāinga ‘o e uaifi ‘o Mōsese ‘i he ‘ao ‘o ‘Elohimi.

¹³Pea pongipongi hake na‘e nofo ‘a Mōsese ke fai fakamaau ki he kakai, pea na‘e tutu‘u mai ‘a e kakai kia Mōsese mei he pongipongi ki he efiafi.

¹⁴Pea ‘i he mamata ‘e he kāinga ‘o e uaifi ‘o Mōsese ki he ngaahi me‘a ‘oku ne fai ma‘a e kakai, na‘a ne lea hake, Ko e hā tū ‘a e me‘a ni ‘oku ke fai ki he kakai? Ko e hā ‘oku ke nofo toko taha ai koe, ko e tu‘ulaki mai kiate koe ‘a e fu‘u kakai mei he pongipongi ki he efiafi?

¹⁵Pea tali ‘e Mōsese ki he kāinga ‘o hono uaifi, Koe‘uhi ‘oku ha‘u ‘a e kakai kiate au ke fehu‘i ki he ‘Otua:

¹⁶ka ai ha‘anau me‘a ‘oku nau ha‘u kiate au, ka u fakamaau ‘a e vā ‘o e tangata mo e tangata, pea u faka‘ilo ‘a e ngaahi tu‘utu‘uni ‘a ‘Elohimi, mo ‘ene ngaahi lao.

¹⁷Pea pehē ‘e he kāinga ‘o e uaifi ‘o Mōsese kiate ia, ‘Oku ‘ikai lelei ‘a e me‘a ‘oku ke fai.

¹⁸He kuo pau te ke malūmaea ai; ‘o ‘ikai ko koe pē, ka ko e kakai ni foki ‘oku ‘iate koe: he ‘oku mamafa fau ‘a e ngāue kiate koe: ‘e ‘ikai lava ke ke fai toko taha pē.

¹⁹‘Ē, tokanga ki he‘eku lea, ka u fale‘i koe, pea ‘e ‘iate koe ‘a e ‘Otua: Ke ke fakafofonga ‘a e kakai ki he ‘Otua, pea ‘omi ‘e koe ‘a e ngaahi me‘a kia ‘Elohimi.

²⁰Pea te ke ako kinautolu ‘i he ngaahi tu‘utu‘uni mo e ngaahi lao, pea te ke faka‘ilo kiate kinautolu ‘a e founga te nau fou ai, mo e ngāue te nau feia.

²¹Pea ‘e ‘a‘au ke fili mei he kakai kotoa ha kakai fita, ha ni‘ihi ‘oku ‘apasia ki he ‘Otua, ko e kakai fai mo‘oni, ‘o fehi‘a ki he koloa lavaki; pea fakanofo kinautolu ko e kau pule ki he ngaahi afe, mo e kau pule ki he ngaahi teau, mo e kau pule ki he ngaahi nimangofulu, mo e kau pule ki he ngaahi hongofulu:

²²pea tuku ke nau fai fakamaau ki he kakai ‘i he taimi kehekehe; pea ka ‘ilonga ha me‘a mamafa te nau ‘omi kiate koe, ka ko e ngaahi me‘a iiki te nau fakamaau ‘e kinautolu: ko ia ‘e fakama‘ama‘a ai ho‘o kavenga, pea te nau fua ia fakataha mo koe.

²³Kapau te ke fai ‘a e me‘a ni, pea finangalo ki ai ‘a e ‘Otua, pea te ke lava ke tolonga; pea ko e fu‘u kakai ni foki te nau a‘u lelei ki honau feitu‘u.

²⁴Pea tokanga ‘a Mōsese ki he lea ‘a e kāinga ‘o hono uaifi, pea ne fai ‘a e me‘a kotoa pē kuo ne tala.

²⁵Pea na‘e fili ‘e Mōsese ha kakai fita mei ‘Isileli kātoa, ‘o ne fakanofo kinautolu ko e ngaahi ‘ulu ki he kakai, ko e kau pule ‘o e ngaahi afe, ko e kau pule ‘o e ngaahi teau, ko e kau pule ‘o e ngaahi nimangofulu, ko e kau pule ‘o e ngaahi hongofulu.

²⁶Pea na‘a nau fai fakamaau ki he kakai ‘i he taimi kotoa pē: ‘ilonga ha me‘a faingata‘a na‘a nau ‘omi kia Mōsese, ka ko e ngaahi me‘a iiki na‘a nau fakamaau ‘e kinautolu.

²⁷Pea tuku ‘e Mōsese ‘a e kāinga ‘o hono uaifi ke ‘alu, pea ne fononga ki hono fonua ‘o‘ona.