Read KO E TOH TAPU KATOA TONGA KO ‘EKISOTO 19 Bible Online

KO ‘EKISOTO 19 - KO E TOH TAPU KATOA TONGA bible

KO ‘EKISOTO 19

¹‘I hono māhina tolu hili ‘a e ‘alu atu ‘a ha‘a ‘Isileli mei ‘Isipite, ‘i he ‘aho pē ko ia na‘a nau a‘u ki he Toafa ‘o Sainai.

²Pea na‘a nau hiki mei Lefitimi, pea nau a‘u ki he Toafa ‘o Sainai, ‘o nau fokotu‘u tēniti ‘i he toafa, ‘io, na‘e fokotu‘u tēniti ai ‘a ha‘a ‘Isileli, ‘o hanga ki he mo‘unga.

³Pea hā‘ele hake ‘a Mōsese kia ‘Elohimi mo e ui kiate ia ‘e Sihova mei he mo‘unga, ‘o pehē, Ko eni ‘a e lea te ke fai ki he fale ‘o Sēkope, mo fakahinohino ki ha‘a ‘Isileli:

⁴Kuo mou mamata ki he me‘a kuo u fai ki he kau ‘Isipite, mo ‘eku fafa kimoutolu ‘i he funga kapakau‘i ‘īkale, ‘o ‘omi kimoutolu kiate au.

⁵Pea ko eni, kapau te mou mātu‘aki tokanga ki hoku le‘o, mo tauhi ‘eku fuakava, te mou toki hoko ko ‘eku koloa kānokato ‘i he kakai kotoa: he ‘oku ‘o‘oku ‘a māmani kātoa:

⁶pea te mou hoko kiate au ko e tu‘unga tu‘i taula‘eiki, ko e kakai tapu. Ko eni ‘a e ngaahi lea te ke fai ki ha‘a ‘Isileli.

⁷Pea ha‘u ‘a Mōsese, ‘o ne ui ange ‘a e Mātu‘a ‘a e kakai, ‘o ne tuku ‘i honau ‘ao ‘a e ngaahi fo‘i folofola ni, ‘a ia kuo tu‘utu‘uni ‘e Sihova kiate ia.

⁸Pea na‘e tali ‘a e kakai kotoa pē fakataha, ‘o pehē, Ko e me‘a kotoa kuo folofola‘aki mai ‘e Sihova te mau fai. Pea na‘e fakahoko mai ‘e Mōsese ‘a e ngaahi lea ‘a e kakai kia Sihova.

⁹Pea folofola ‘a Sihova kia Mōsese; Vakai, ko ‘eku ha‘u eni kiate koe kuo u kofu ‘aki ha ‘ao, koe‘uhi ke fanongo ‘e he kakai ‘oka u ka alea mo koe, ‘o nau tui ai kiate koe ‘o ta‘engata. Pea na‘e fakahā ‘e Mōsese ‘a e ngaahi lea ‘a e kakai kia Sihova.

¹⁰Pea folofola ‘a Sihova kia Mōsese, ‘Alu ki he kakai, ‘o fakama‘a ‘a kinautolu he ‘aho ni mo e ‘apongipongi, pea tuku ke nau fō honau kofu.

¹¹Pea ke ‘osi ho‘omou teu ki hono ‘aho tolu: he ‘i hono ‘aho tolu ‘e hā‘ele hifo ‘a Sihova ki he mo‘unga ko Sainai, kae mamata ‘e he kakai kotoa.

¹²Pea te ke fokotu‘u ha ‘ā ki he kakai takatakai, mo ke pehē, Mou faka‘ehi‘ehi ki he ‘alu hake ki he mo‘unga, mo e lave ki hano ‘eu: he ko ia ‘oku ne lave ki he mo‘unga, te ne mātu‘aki mate.

¹³‘E ‘ikai ala kiate ia ‘e ha nima, ka ‘e mātu‘aki tolomaka‘i ia pe fana‘i; pe ko ha manu pe ha tangata, ‘e ‘ikai te ne mo‘ui: ka toki fakatangiloloa ‘a e talupite, ‘e ‘alu hake ki he mo‘unga ‘a kinautolu na.

¹⁴Pea ‘alu hifo ‘a Mōsese mei he mo‘unga ki he kakai, ‘o ne fakama‘a ‘a e kakai, pea nau fō honau kofu.

¹⁵Pea na‘a ne pehē ki he kakai, Mou ‘osi teuteu ki hono tolu ‘o e ‘aho: ‘oua na‘a ofi ki ha fefine.

¹⁶Pea ko ia ‘i hono tolu ‘o e ‘aho, ‘i he‘ene ‘aho hake, tā na‘e hoko ‘i he funga mo‘unga ‘a e ngaahi mana, mo e ngaahi ‘uhila, pea ai ha ‘ao matolu ‘i he funga mo‘unga, mo e le‘o ‘o e talupite mālohi ‘aupito: pea na‘e tete ‘a e kakai kotoa na‘e ‘i he ‘apitanga.

¹⁷Pea na‘e taki atu ‘e Mōsese ‘a e kakai mei he ‘apitanga ke fakafe‘iloaki kia ‘Elohimi; pea na‘a nau tutu‘u ‘i he talalo ‘o e mo‘unga.

¹⁸Pea ko e mo‘unga ko Sainai ko e koto kohu fua pē, koe‘uhi ko e hā‘ele ki ai ‘a Sihova ‘i he afi; pea na‘e ‘alu hake ‘a e kohu ‘o hangē ko e kohu ‘o e fōnise, pea na‘e tete lahi ‘a e kakai kotoa.[22]

¹⁹Pea ‘i he ‘ai ‘a e ifi ‘o e talupite ‘o fai atu ‘o fakautuutu ‘aupito, na‘e lea ‘a Mōsese, pea tali ‘a ‘Elohimi ‘aki ha le‘o.

²⁰Pea na‘e hā‘ele hifo ‘a Sihova ki funga Sainai, ki he tumutumu ‘o e mo‘unga; pea na‘e ui hake ‘e Sihova ‘a Mōsese ki he funga mo‘unga, pea ‘alu hake ‘a Mōsese.

²¹Pea folofola ‘a Sihova kia Mōsese, ‘Alu hifo; na‘ina‘i ki he kakai, na‘a ‘iloange te nau hae mai ki loto kia Sihova ke mamata, pea tō honau tokolahi.

²²Pea ko e kau taula‘eiki foki ‘a ia ‘oku nau taka ofi kia Sihova, ke nau fakama‘a kinautolu, na‘a ‘iloange ‘e pā atu ‘a Sihova kiate kinautolu.

²³Pea tali ‘e Mōsese kia Sihova, ‘E ‘ikai lava ‘e he kakai ke ‘alu hake ki he mo‘unga ko Sainai: he na‘a ke na‘ina‘i mai ‘o pehē, ‘Aa‘i ‘a e mo‘unga ‘o tapui ia.

²⁴Pea folofola ‘a Sihova kiate ia, Laka hifo, pea te ke ‘alu hake ‘e koe, pea mo omi mo ‘Ēlone; kae‘oua na‘a hae mai ‘e he kau taula‘eiki mo e kakai ke ‘alu hake kia Sihova, na‘a pā atu ia kiate kinautolu.

²⁵Pea na‘e ‘alu hifo ‘a Mōsese ki he kakai, ‘o tala kiate kinautolu.