Read KO E TOH TAPU KATOA TONGA KO ‘EKISOTO 21 Bible Online

KO ‘EKISOTO 21 - KO E TOH TAPU KATOA TONGA bible

KO ‘EKISOTO 21

¹KO eni ‘a e ngaahi kupu‘i konisitūtone te ke fai fono ‘aki kiate kinautolu.

²Kapau te ke fakatau ha tamaio‘eiki Hepelū, ko e ta‘u ‘e ono te ne ngāue: pea ‘i hono fitu te ne ma‘u ‘ene tau‘atāina ta‘etotongi.

³Kapau na‘a ne ha‘u taka pē, te ne ‘alu taka pē: kapau na‘a ne fakafinemotu‘a, te ne ‘alu mo ia hono uaifi.

⁴Kapau kuo ‘ange ha uaifi kiate ia ‘e hono ‘eiki, pea kuo ne fā‘ele‘i kiate ia ha fānau tangata pē fānau fefine; ‘e ‘a e ‘eiki ‘a e finemotu‘a mo e fānau, pea te ne ‘alu ‘e ia toko taha pē.

⁵Ka ‘o kapau ‘e mātu‘aki lea ‘e he tamaio‘eiki, ‘o pehē, ‘Oku ou ‘ofa ki hoku ‘eiki, ki hoku uaifi mo ‘eku fānau; ‘e ‘ikai te u ‘alu tau‘atāina:

⁶pea ‘e toki fakahopo ia ‘e hono ‘eiki ‘i he ‘ao ‘o ‘Elohimi, ‘o ne fakaofi ia ki he matapā, pe ki he pou matapā; pea ‘e vili hono telinga ‘e hono ‘eiki ‘aki ha vili; pea te ne nofo ko ‘ene tamaio‘eiki ‘o ta‘engata.

⁷Pea kapau ‘e fakatau ‘e ha tangata hono ‘ōfefine ke kaunanga, ‘e ‘ikai te ne ‘alu atu ‘o hangē ko e ‘alu atu ‘a e kau tamaio‘eiki.

⁸Kapau ‘oku ‘ikai ke matamatalelei‘ia ai ‘a hono ‘eiki, ‘a ia kuo ne polo‘i ia ma‘ana, pea ke ne tuku ke huhu‘i ia: ‘e ‘ikai ngofua ha‘ane fakatau ia ki ha kakai muli, koe‘uhi kuo ne lohiaki‘i ia.

⁹Pea kapau kuo ne polo‘i ia ma‘a hono foha, te ne fai ma‘ana ‘a ia ‘oku fai ki ha ‘ōfefine.

¹⁰Kapau te ne to‘o mo‘ona ha fefine ‘e taha; ‘e ‘ikai te ne fakasi‘isi‘i ‘ene kiki, pe ko hono kofu, pe ko e tō‘onga ‘o e mali.

¹¹Pea kapau ‘e ‘ikai te ne fai kiate ia ‘a e me‘a ni ‘e tolu, te ne toki ‘alu ta‘etotongi; ‘e ‘ikai ‘omi ha pa‘anga ki ai.

¹²Ko ia ‘oku ne taa‘i ha tangata, ‘o ne pekia, kuo pau ke mate tāmate‘i ia.

¹³Pea kapau na‘e ‘ikai ko ha‘ane lamalama, ka ko e ‘omi ‘e ‘Elohimi ki hono nima; pea te u toki tu‘utu‘uni ma‘au ha potu te ne hola ki ai.

¹⁴Ka ‘o kapau ko e fai fakamālohi ‘e ha tangata ki ha taha kehe ke tāmate‘i fakakākā; pea neongo ko e ‘ōlita ‘o‘oku, ka te mou to‘o atu ia mei ai, ke ne mate.

¹⁵Pea ko ia te ne taa‘i ‘ene tamai, pe ko ‘ene fa‘ē, kuo pau ke mate tāmate‘i ia.

¹⁶Pea ko ia ‘oku ne kaiha‘a ha tangata, pea ‘oku ne fakatau ia, pe ‘oku ‘iloa ia ‘oku ne kei ma‘u, kuo pau ke mate tāmate‘i ia.

¹⁷Pea ko ia ‘oku ne kape‘i ‘ene tamai, pe ko ‘ene fa‘ē, kuo pau ke mate tāmate‘i ia.

¹⁸Pea kapau ‘e kē ha tu‘unga tangata, pea te‘ia ha taha ‘e ha taha ‘aki ha maka pe ko hono nima, ka ‘oku ‘ikai te ne mate ai, kae toka fuoloa:

¹⁹kapau ‘e faifai ‘o ne ake, ‘o ne tautoko holo, pea ‘e hao ia na‘a ne fai ‘a e tā: ka te ne totongi ki he taimi ‘o ‘ene ta‘engāue, pea mo e faito‘o ki ai kae‘oua ke mo‘ui ‘aupito.

²⁰Pea kapau ‘e taa‘i ‘e ha tangata ha‘ane tamaio‘eiki, pe kaunanga, ‘aki ha ‘akau, ‘o ne pekia ai leva; kuo pau ke fai ‘a e sauni ki ai.

²¹Ka ‘o kapau te ne tolonga ‘i ha ‘aho ‘e taha pe ua, ‘e ‘ikai sauni: he ko ‘ene koloa ia.

²²Pea kapau ‘e feolo‘i ha tu‘unga tangata, pea lavea ai ha fefine feitama, pea tō ‘ene tama, kae ngata ai ‘a e kovi: kuo pau ke fakamo‘ua ‘a e tangata ‘o fakatatau ki he me‘a ‘e lau ‘e he husepāniti ‘o e fefine; pea te ne fai ‘a e totongi ‘i he tu‘utu‘uni ‘a e kau fakamaau.

²³Ka ‘o kapau ‘e ai ha kovi ‘e hoko, pea te ke totongi ‘a e mo‘ui ‘aki ‘a e mo‘ui,

²⁴‘a e mata ‘aki ha mata, ‘a e nifo ‘aki ha nifo, ‘a e nima ‘aki ha nima, ‘a e va‘e ‘aki ha va‘e,

²⁵‘a e mōfia ‘aki ‘a e fakamomofi, ‘a e kafo ‘aki ha fakakafo, ‘a e haha ‘aki ha haha.

²⁶Ka ‘o kapau ‘e taa‘i ‘e ha tangata ‘a e mata ‘o ‘ene tamaio‘eiki, pe ko e mata ‘o ‘ene kaunanga, ‘o ne kui; te ne fakatau‘atāina ia ko e totongi ‘o hono fo‘i mata.

²⁷Pea kapau ‘e mokulu ha nifo ‘o ‘ene tamaio‘eiki, pe ha nifo ‘o ‘ene kaunanga, ‘i ha‘ane fai ha me‘a ki ai; te ne fakatau‘atāina ia koe‘uhi ko hono fo‘i nifo.

²⁸Pea kapau ‘e tui‘i ‘e ha pulu ha tangata, pe ha fefine, ‘o ne pekia; kuo pau ke tolomaka‘i ‘a e pulu, pea ‘e ‘ikai kai hono kakano; kae ‘atā ‘a e tangata ‘oku ‘a‘ana.

²⁹Ka ‘o kapau ko e pulu na‘e pau‘u mu‘a, pea kuo fai ha na‘ina‘i kiate ia ‘oku ‘a‘ana, ka ‘oku ‘ikai te ne tokanga‘i ‘a e manu, pea kuo ne tāmate‘i ha tangata pe ha fefine, pea ‘e toki tolomaka‘i ‘a e pulu, pea ‘e mate tāmate‘i mo e tangata ‘oku ‘a‘ana.

³⁰Kapau ‘e hilifaki ha totongi, te ne ‘atu ia, pe ko e hā ha tu‘utu‘uni ‘e fai kiate ia ko e huhu‘i ‘o ‘ene mo‘ui.

³¹Pe kuo ne tui‘i ha foha, pe kuo ne tui‘i ha ‘ōfefine, ‘e fai pē ki ai ‘o hangē ko e tu‘utu‘uni ko eni.

³²Kapau kuo tui‘i ‘e he pulu ha tamaio‘eiki, pe ko ha kaunanga, ‘e fai pa‘anga pē; te ne ‘atu ha sikeli ‘e tolungofulu ki hono ‘eiki, pea tolongi ‘a e pulu.

³³Pea kapau ‘e tangaki ‘e ha tangata ha luo, pe keli ha luo, ‘o ‘ikai te ne ‘ufi‘ufi, pea tō ai ha pulu pe ha ‘asi,

³⁴pea ko ia ‘oku ‘a‘ana ‘a e luo te ne fakaai: te ne ‘atu ha pa‘anga kiate ia ‘oku ‘a‘ana, kae ‘iate ia ‘a e manu kuo mate.

³⁵Pea kapau ‘e lavea ‘a e pulu ‘a ha tangata ‘i he pulu ‘a ha taha kehe, ‘o ne mate ai; pea te na fakatau ‘a e pulu ‘oku kei mo‘ui, ‘o vahevahe ‘a e pa‘anga, pea te na vahevahe foki mo e manu kuo mate.

³⁶Ka ‘o kapau ‘oku hā ko e pulu na‘e pau‘u mu‘a, pea kuo ‘ikai tokanga ki ai ‘a e tangata ‘oku ‘a‘ana, kuo pau ke ne fakaai, ‘o totongi ‘a e pulu ‘aki ha pulu, kae ‘a‘ana ‘a e manu kuo mate.