Read KO E TOH TAPU KATOA TONGA KO ‘EKISOTO 22 Bible Online

KO ‘EKISOTO 22 - KO E TOH TAPU KATOA TONGA bible

KO ‘EKISOTO 22

¹KAPAU ‘e kaiha‘asi ‘e ha taha ha pulu pe ha sipi, ‘o ne tāmate‘i ia, pe fakatau; te ne ‘ange ha pulu ‘e nima ko e fetongi ‘o e pulu ko ia, pea ko e sipi ‘e fā ke fetongi ‘a e sipi.

²Kapau ‘e ma‘u ha kaiha‘a ‘i he‘ene hae fale, pea taa‘i ia, ‘o ne pekia; ‘e ‘ikai lau fakapō ki he tangata ko ia.

³Ka ‘o kapau kuo hopo ‘a e la‘ā ‘i he‘ene fai, ‘e lau ko ‘ene fakapō: na‘e pau ke ne totongi; ka ‘ikai ha‘ane me‘a, ‘e fakatau ia koe‘uhi ko ‘ene kaiha‘a.

⁴Kapau ‘e mātu‘aki ‘iloa ‘a e me‘a kaiha‘a ‘i hono nima ‘oku kei mo‘ui, pe ko ha pulu pe ‘asi pe sipi, te ne totongi ‘o liunga ua.

⁵Kapau kuo ‘i ha taha ‘a e kai ‘o ha ngoue pe ha ngoue vaine, ko ‘ene tukuange ‘ene manu ‘o ne kaikai ‘i he ngoue ‘a ha taha kehe;[24] te ne totongi ki ai mei he lelei ‘o ‘ene ngoue, mo e lelei ‘o ‘ene ngoue vaine.

⁶Kapau ‘e puho hake ha afi, ‘o mo‘ua ai ‘a e ‘a talatala, pea vela ai ‘a e ngaahi fokotu‘unga koane, pe ko e ta‘u kuo motu‘u, pe ko e ngoue, kuo pau ke totongi ‘e ia na‘a ne tafu ‘a e afi.

⁷Kapau ‘e ‘ange ‘e ha tangata ki ha toko taha ha pa‘anga pe ha koloa ke tauhi, pea kaiha‘asia ia mei he fale ‘o e siana; kapau ‘e ‘iloa ‘a e kaiha‘a te ne totongi lōua.

⁸Kapau ‘e ‘ikai ‘iloa ‘a e kaiha‘a, pea ko e tangata ‘oku ‘o‘ona ‘a e fale te ne ‘unu‘unu mai kia ‘Elohimi, ke sivi pe kuo ‘ikai te ne ala ki he koloa ‘a e tokotaha ko ia.

⁹Ko e me‘a kotoa pē ‘oku matamata ko e angahala, pe ‘oku kau ki ha pulu, pe ha ‘asi, pe ha sipi, pe ha kofu, pe ko ha me‘a kuo mole, ‘a ia ‘oku pehē ‘e ha taha, “‘Oku pehē ‘a e me‘a,” ‘e ‘ave kia ‘Elohimi ‘ena me‘a; pea ko ia ‘e fakahalaia ‘e ‘Elohimi te ne totongi lōua ki he tokotaha.

¹⁰Kapau ‘e ‘ange ‘e ha tangata ki ha taha ha ‘asi, pe pulu, pe sipi, mo e hā fua ha manu, ke tauhi, pea mate ia, pe lavea, pe ‘ave, kae ‘ikai ha taha ‘e mamata ki ai,

¹¹‘e fai ‘i he‘ena me‘a ha fuakava ‘i he huafa ‘o Sihova, ‘Ilo ‘e ia ‘o kapau kuo ne ala ki he koloa ‘a e tokotaha ko ē; pea ko ia ‘oku ‘a‘ana ‘a e me‘a te ne tali ia, pea ‘e ‘ikai ha totongi ‘e fai.

¹²Ka ‘o kapau na‘e mātu‘aki kaiha‘asia lolotonga ‘ene ‘iate ia, pea te ne toki totongi kiate ia ‘oku ‘a‘ana.

¹³Kapau na‘e mātu‘aki haehae, ke ne ‘omi ia ko e fakamo‘oni; ‘e ‘ikai te ne totongi ‘a e me‘a kuo haehae.

¹⁴Pea kapau ‘e nō ha me‘a ‘e ha tangata mei ha taha kehe, pea lavea ia, pe mate, ka na‘e ‘ikai ‘i ai ‘a e tangata ‘oku ‘a‘ana; kuo pau te ne totongi.

¹⁵Kapau na‘e ‘i ai ‘a e tangata ‘oku ‘a‘ana, ‘e ‘ikai ha totongi ‘e fai: kapau ko e manu nō, na‘e fua ia ‘e he pa‘anga ‘o hono nō.

¹⁶Kapau ‘e kākaa‘i ‘e ha tangata ha ta‘ahine kuo te‘eki polo‘i, ‘o ne mohe mo ia, kuo pau te ne ‘ange ki he mātu‘a ‘a e koloa totonu, ka ne ma‘u ia mōno uaifi.

¹⁷Kapau ‘oku ‘ikai ‘aupito loto ‘ene tamai ke foaki ia kiate ia, ka te ne ‘ange pē ha pa‘anga ‘o taau mo e fakakoloa ‘o ha ta‘ahine.

¹⁸‘E ‘ikai te mou tuku ke mo‘ui ha fefine fai tuki.

¹⁹Ko ia te ne mohe mo ha manu ‘e mate tāmate‘i.

²⁰Ko ia ‘oku ne feilaulau ki ha ‘otua, ‘o ‘ikai kia Sihova toko taha, ‘e tuku ia ki he faka‘auha.

²¹Ko e muli ‘e ‘ikai te ke fai fakamālohi ki ai, pe fakamamahi‘i; he na‘a mou nofo muli kimoutolu ‘i ‘Isipite.

²²‘Ilonga ha uitou, pe fānau tamai mate, ‘e ‘ikai te mou fakamamahi‘i kinautolu.

²³Kapau te mou momo‘i fai fakamamahi ki ai, ‘io, ka momo‘i tangi ‘e ia kiate au, te u mātu‘aki ongo‘i ‘enau tangi;

²⁴pea ‘e kakaha ‘eku ‘ita, pea te u tāmate‘i kimoutolu ‘aki ‘a e heletā, pea ‘e uitou ‘a homou ngaahi uaifi, pea tamai mate ho‘omou fānau.

²⁵Kapau te ke tali ha nō pa‘anga ‘a ha taha masiva ‘o hoku kakai ‘oku ‘iate koe, ‘e ‘ikai te ke fai kiate ia ‘a e tō‘onga ‘o e tangata ‘oku mo‘ua ki ai ha taha; ‘e ‘ikai te ke ‘eke kiate ia ha toloi.

²⁶Neongo kuo ke ki‘i to‘o pē ‘a e kofu ‘o e tokotaha ko ē mo‘o talifaki, ka te ke fakafoki kiate ia te‘eki ke tō ‘a e la‘ā:

²⁷he ko si‘ono kafu pē taha ia, ka e kofu ia ‘o hono kili; te ne mohe ‘i he hā? Pea ka faifai pea tangi ia kiate au, pea te u ongo‘i: he ko e taha ‘ofa au.

²⁸‘E ‘ikai te mou tālalakulaku ki he ‘Otua,[25] pe kape ki he pule ‘o ho kakai.

²⁹‘Oua te mou tuai ke ‘omi ‘a e mahu mo e huhu‘a ‘o homou ta‘u; ko e ‘uluaki ‘o ho‘omou fānau tangata te mou foaki kiate au.

³⁰‘E pehē foki mo ho‘o fai ki ho‘o fanga pulu, mo ho‘o fanga sipi: ko e ‘aho ‘e fitu te ne ‘i he‘ene fa‘ē, ‘i hono ‘aho valu te mou ‘omi kiate au.

³¹Pea te mou nofo kiate au ko e kakai tapu: ko ia ko e kakano kuo haehae ‘e he manu ‘i he vao ‘e ‘ikai te mou kai ia: ka te mou lī ia ki he fanga kulī.