Read KO E TOH TAPU KATOA TONGA KO ‘EKISOTO 23 Bible Online

KO ‘EKISOTO 23 - KO E TOH TAPU KATOA TONGA bible

KO ‘EKISOTO 23

¹‘OUA te ke fakatupu ha ongoongo loi: ‘oua te ke fakakauvaka mo e tangata kovi ke fai ha fakamo‘oni loi.

²Neongo ko ha tokolahi, ‘oua na‘a ke ō mo kinautolu ke fai ha kovi; ‘oua na‘a ke lea angimui ki ha tokolahi ke piko‘i ha fakamaau:

³pea neongo ko e masiva, ‘e ‘ikai te ke ‘ofa kovi ki ai, ‘o kapau ko hano fakamaau.

⁴Ka ‘iloange te ke ma‘u ‘a e pulu ‘a ho fili, pe ko ‘ene ‘asi, ‘oku ‘alu hē, kuo pau te ke fakafoki ia ki ai.

⁵Kapau te ke sio ki he ‘asi ‘a ha taha ‘oku fehi‘a kiate koe ‘oku ta‘omia ‘i he‘ene kavenga, pea ke pehē ke tuku pē kiate ia-‘a! te ke hanga ‘o kau mo ia ke vete.

⁶‘Oua te ke piko‘i ‘a e fakamaau ‘o si‘i masiva ‘oku ‘iate koe, ‘oka ai ha‘ane hopo.

⁷Faka‘ehi‘ehi koe mei he me‘a kākā; pea ko e ta‘ehalaia mo e faitotonu ‘oua te ke tāmate‘i, he tala‘ehai te u fakatonuhia ha taha angahala.

⁸Pea ko e me‘a‘ofa ‘e ‘ikai te ke tali; he ‘oku fakakui ‘e he me‘a‘ofa ‘a kinautolu ‘oku ‘ā, mo fakakehe ‘a e fakamatala ‘a e tonuhia.

⁹Pea ko e muli ‘e ‘ikai te ke fai fakamamahi ki ai: he ‘oku mou ‘ilo ‘e kimoutolu ‘a e anga ‘o e loto‘i muli, he na‘a mou nofo muli ‘i he fonua ko ‘Isipite.

¹⁰Pea ko e ta‘u ‘e ono te ke ngoue‘i ho kelekele, pea utu hono fua.

¹¹Ka ‘i hono fitu ‘o e ta‘u te ke tuku hifo ke fo‘ou; kae kai mei ai ‘a e kau masiva ‘o ho fonua: pea ka toe ha me‘a, ‘e kai ia ‘e he fanga manu ‘o e vao. Te ke fai pehē foki ki ho‘o ngoue vaine mo ho‘o ngoue ‘ōlive.

¹²Ko e ‘aho ‘e ono te ke fai ai ho‘o ngāue, ka ‘i hono fitu ‘o e ‘aho te ke tuku: koe‘uhi ke mālōlō ho‘o pulu mo ho‘o ‘asi, pea ke fakamānava hake ‘a e tama ‘a ho‘o kaunanga mo e muli.

¹³Pea ko e me‘a kotoa pē kuo u lea‘aki kiate kimoutolu te mou tauhi ia: pea ko e hingoa ‘o e ngaahi ‘otua kehe ‘oua te mou momo‘i takua; ‘oua na‘a ongona ha me‘a pehē mei homou ngutu.

¹⁴Tu‘o tolu ‘i he ta‘u te ke fai kātoanga kiate au.

¹⁵Ko e Kātoanga Tapu-lēvani te ke tauhi ia: ko e ‘aho ‘e fitu te mou kai mā ta‘elēvani ai ‘o hangē ko ‘eku fekau, ‘i hono taimi tu‘utu‘uni ‘i he māhina ko ‘Āpipi (he ko ia ia na‘a ke ha‘u ai mei ‘Isipite); pea ‘e ‘ikai te mou omi mola ki hoku ‘ao.

¹⁶Pea ko e Kātoanga ‘o e Polopolo-ta‘u, ko e ‘uluaki fua ‘o ho‘o ngāue, ‘o e me‘a kuo ke tō ‘i ho‘o ngoue. Pea ko e Kātoanga Utu ta‘u ‘oka ‘osi ‘a e ta‘u, ‘i ho‘o fetuku mai ho‘o fita‘a mei he ngoue‘anga.

¹⁷Tu‘o tolu ‘i he ta‘u ‘e hā ho‘o kau tangata kotoa pē ‘i he ‘ao ‘o e ‘Eiki Sihova.

¹⁸‘E ‘ikai te ke ‘atu ‘a e toto ‘o ‘eku feilaulau ‘i he ‘i ai ha mā fakalēvani; pea ‘e ‘ikai a‘u ki he ‘apongipongi ‘a e ngako ‘o ‘eku kātoanga.

¹⁹Ko e polopolo ‘o e ‘uluaki fua ‘o ho kelekele te ke ‘omi ki he fale ‘o Sihova ko ho ‘Otua. ‘E ‘ikai te ke haka ha ki‘i kosi ‘i he huhu‘a ‘o ‘ene fa‘ē.

²⁰Ko eni ‘oku ou fekau atu ha ‘Āngelo ke ‘alu mu‘omu‘a kiate koe ke tauhi koe ‘i he hala, pea ke fakahū ki he potu kuo u teuteu.

²¹Tokanga telia ia, pea fakaongo ki he‘ene lea; ‘oua ‘e angatu‘u kiate ia, he tala‘ehai te ne fakamolemole ho‘omou angahala; he ko hoku hingoa ‘oku tu‘u ‘iate ia.

²²He kapau te ke mātu‘aki fakaongo ki he‘ene lea, ‘o fai hono kotoa ‘o e me‘a te u tala, pea te u toki hoko ko e fili ‘o ho ngaahi fili, mo e fakamamahi ‘o ho kau fakamamahi.

²³Pea ko hoku ‘Āngelo te ne ‘alu mu‘omu‘a ‘iate koe, pea te ne a‘utaki koe ki ha‘a ‘Āmoli, mo ha‘a Heti, mo ha‘a Pēlisi, mo ha‘a Kēnani, ki ha‘a Hevi, mo ha‘a Siepusi: pea te u fakaka‘anga kinautolu.

²⁴‘E ‘ikai te ke lotu ki honau ngaahi ‘otua, pea ‘e ‘ikai te ke tauhi ki ai, pea ‘e ‘ikai te ke fai ki he‘enau ngaahi ngāue: ka te ke mātu‘aki faka‘auha kinautolu, pea te ke laiki ‘aupito ‘enau ngaahi pou tapu.

²⁵Pea te mou tauhi ‘a Sihova ko homou ‘Otua, pea te ne tāpuaki ho‘o me‘akai, mo ho‘o me‘ainu; pea te u talafua ‘a e fakamahaki meiate kimoutolu.

²⁶‘E ‘ikai ha me‘a ‘e tamatō pe pa‘a ‘i ho fonua: ko e lau ‘o homou ta‘u te u fakakakato.

²⁷Te u tuku atu hoku ngeia ke mu‘omu‘a ‘iate koe, pea te u have‘i ‘a e kakai fua pē te ke a‘u ki ai, pea te u ngaohi ho ngaahi fili kotoa pē ke sītu‘a kiate koe.

²⁸Pea te u fekau ke mu‘omu‘a atu ‘iate kimoutolu ‘a e langomū-hōneti,[26] pea te ne kapusi mei homou ‘ao ‘a ha‘a Hevi, mo ha‘a Kēnani, mo ha‘a Heti.

²⁹‘E ‘ikai te u kapusi atu kinautolu ‘i ha ta‘u pē taha, na‘a ngaongao ‘a e fonua, pea tupu lahi fau kiate koe ‘a e manu ‘o e vao.

³⁰‘E fakakongokonga pē ‘eku kapusi kinautolu mei ho ‘ao, kae‘oua ke ke tokolahi, ‘o nofo‘ia ‘a e fonua.

³¹Pea te u ‘ai ho ngata‘anga mei he Tahi Kulokula ki he Tahi ‘o e kau Filisitia, pea mei he Toafa ki Vaitafe: he te u tuku ki homou nima ‘a e kakai ‘o e ngaahi fonua; pea te ke kapusi atu kinautolu.

³²‘E ‘ikai te ke fai ha taliti mo kinautolu, pe ko honau ngaahi ‘otua.

³³‘E ‘ikai te nau nofo ‘i ho fonua; na‘a nau o‘i koe ke fai angahala kiate au: he kapau te ke tauhi honau ngaahi ‘otua, kuo pau ke hoko ia ko e tauhele kiate koe.