Read KO E TOH TAPU KATOA TONGA KO ‘EKISOTO 24 Bible Online

KO ‘EKISOTO 24 - KO E TOH TAPU KATOA TONGA bible

KO ‘EKISOTO 24

¹KA ko Mōsese na‘a ne folofola ki ai, ‘o pehē, ‘Alu hake kia Sihova, ‘a koe mo ‘Ēlone, ‘a Nātapi mo ‘Āpiu, pea mo e toko fitungofulu ‘i he mātu‘a ‘Isileli; pea te mou tu‘u mei he mama‘o, ‘o fai ho‘omou lotu:

²pea ko Mōsese pē toko taha ‘e ‘unu‘unu ke ofi kia Sihova: ka ko kinautolu ‘e ‘ikai te nau ‘unu‘unu mai; pea ‘e ‘ikai ‘alu hake mo ia ha kakai.

³Pea na‘e ha‘u ‘a Mōsese, ‘o ne ‘a‘au ki he kakai ‘a e ngaahi folofola ‘a Sihova, mo e ngaahi kupu‘i konisitūtone: pea na‘e tali le‘o taha ‘a e kakai, ‘o nau pehē, Ko e me‘a kotoa kuo folofola ki ai ‘e Sihova te mau fai.

⁴Pea tohi ‘e Mōsese ‘a e ngaahi fo‘i folofola ‘a Sihova, pea ne tu‘u hengihengi hake, ‘o ne fokotu‘u ha ‘ōlita ‘i he talalo ‘o e mo‘unga, pea mo ha pou ‘e hongofulu mā ua ke hoa mo e matakali ‘e hongofulu mā ua ‘o ‘Isileli,

⁵pea na‘a ne fekau ha tu‘unga talavou ‘o ha‘a ‘Isileli, pea na‘a nau ‘atu ha ngaahi feilaulau tutu, mo fai ‘a e ngaahi feilaulau-‘ofa kia Sihova, ko e fanga pulu.

⁶Pea to‘o ‘e Mōsese hono vaeua ‘o e toto, ‘o ne ‘ai pēsoni; pea ko hono vaeua na‘a ne afuhi ‘aki ‘a e ‘ōlita.

⁷Pea na‘a ne to‘o ‘a e tohi ‘o e fuakava, ‘o ne lau ia ‘i he ‘ao ‘o e kakai, pea na‘a nau pehē, Ko e me‘a kotoa kuo folofola ki ai ‘a Sihova te mau fai, pea te mau talangofua ki ai.

⁸Pea to‘o ‘e Mōsese ‘a e toto, ‘o ne afuhi ‘aki ‘a e kakai, ‘o ne pehē, Ko e toto fuakava eni, ‘a e fuakava kuo fai ‘e Sihova mo kimoutolu ‘i he funga ‘o e ngaahi lea ni kotoa.

⁹Pea na‘e toki ‘alu hake ‘a Mōsese mo ‘Ēlone, ‘a Nātapi mo ‘Āpiu, mo e fitungofulu‘i mātu‘a ‘o ‘Isileli:

¹⁰pea na‘a nau mātā ‘a e ‘Otua ‘o ‘Isileli; pea ko hono tu‘ungava‘e na‘e hangē kuo ngaohi ‘aki ‘a e sāfaia ‘asinisini, pea ngingila hangē ko e langi ma‘a.

¹¹Pea na‘e ‘ikai te ne ala ki he hou‘eiki ‘o ha‘a ‘Isileli: pea na‘a nau mo‘usiofia ‘a ‘Elohimi, pea na‘a nau kai mo inu.

¹²Pea folofola ‘a Sihova kia Mōsese, ‘Alu hake kiate au ki he mo‘unga, ‘o nofo ai, pea te u ‘atu kiate koe ‘a e ngaahi makatohi, mo e lao mo e ngaahi tu‘utu‘uni ‘a ia kuo u tohi ai; koe‘uhi ke ke ako ia kiate kinautolu.

¹³Pea tu‘u hake ‘a Mōsese mo hono tauhi ko Siosiua: pea ‘alu hake ‘a Mōsese[27] ki he mo‘unga ‘o ‘Elohimi.

¹⁴Ka ka pehē ‘e ia ki he kau mātu‘a, Mou tatali ‘i hē kiate kimaua, kae‘oua ke ma foki mai kiate kimoutolu: pea ko eni ‘oku mou ‘i ai mo ‘Ēlone mo Hua, ‘ilonga ia ‘oku ‘i ai ha‘ane me‘a, ke ne ‘unu‘unu kiate kinaua.

¹⁵Pea ‘alu hake ‘a Mōsese ki he mo‘unga, pea na‘e ‘ufi‘ufi ‘a e mo‘unga ‘e he ngaahi ‘ao.

¹⁶Pea na‘e toka ‘a e kolōlia ‘o e ‘Eiki ‘i he funga mo‘unga ko Sainai, pea na‘e ‘ufi‘ufi ia ‘e he ‘ao, ‘o ‘aho ono: pea ‘i hono fitu ‘o e ‘aho na‘a ne ui kia Mōsese mei he loto ‘ao.

¹⁷Pea ko e hā ‘a e kolōlia ‘o Sihova na‘e hangē ko e afi faka‘auha ‘i he tumutumu‘i mo‘unga ‘i he sio ki ai ‘a ha‘a ‘Isileli.

¹⁸Pea hū ‘a Mōsese ki he loto ‘ao, ‘o ne ‘alu hake ki he mo‘unga: pea na‘a ne ‘i he mo‘unga ‘a Mōsese ‘i he ‘aho ‘e fāngofulu mo e pō ‘e fāngofulu.