Read KO E TOH TAPU KATOA TONGA KO ‘EKISOTO 26 Bible Online

KO ‘EKISOTO 26 - KO E TOH TAPU KATOA TONGA bible

KO ‘EKISOTO 26

¹[30] PEA te ke ngaohi ‘a e Tāpanekale ‘aki ‘a e tupenu ‘e hongofulu; ‘a ia te ke ngaohi ‘aki ‘a e vavae hinehina kuo filo, pea ‘ai fakataha mo e lanu langi mo e kula-po‘upo‘uli mo e kula-‘aho‘aho, ke hā ai ha ngaahi selupimi: ko e fai ‘e he tangata lalanga.

²Ko e lōloa ‘o e tupenu takitaha ko e kiupite ‘e uofulu mā valu, pea ko e māukupu ‘o e tupenu takitaha ko e kiupite ‘e fā: ‘e fua tatau pē ‘a e tupenu kotoa pē.

³Ko e tupenu ko ē ‘e nima ‘e hokohoko ke taha, pea ko e tupenu ko ē ‘e nima ‘e hokohoko ke taha.

⁴Pea te ke ngaohi ‘a e ngaahi kavei lanu langi ‘i he tapa ‘o e tupenu ‘e taha, ‘i he taupotu ‘o e hoko; pea te ke ngaohi pehē foki ‘i he tapa ‘o e tupenu taupotu ‘i he matai-nima ‘e taha.

⁵Te ke ngaohi ha ngaahi kavei ‘e nimangofulu ‘i he tupenu ‘e taha, pea te ke ngaohi ha kavei ‘e nimangofulu ‘i he taupotu ‘o e tupenu ‘oku ‘i he matai-nima ‘e taha; ‘e fakafeu‘utaki ‘a e ngaahi kavei.

⁶Pea te ke ngaohi ha fakama‘u koula ‘e nimangofulu, pea te ke fakahoko ‘a e tupenu ko ē mo ē ‘aki ‘a e ngaahi fakama‘u, kae hoko ko e Tāpanekale pē taha.

⁷Pea te ke ngaohi tupenu fulufulu‘i kosi ki ha tēniti ke pulonga ‘aki ‘a e Tāpanekale: te ke ngaohi ia ko e tupenu ‘e hongofulu mā taha.

⁸Ko e lōloa ‘o e tupenu ‘e taha ko e kiupite ‘e tolungofulu, pea ko e māukupu ‘o e tupenu ‘e taha ko e kiupite ‘e fā; ‘e fua tatau pē ‘a e tupenu ‘e hongofulu mā taha.

⁹Pea te ke hoko ‘a e ngaahi tupenu ke matai-nima ē, matai-ono ē; pea te ke vaeua ‘a hono ono ‘o e tupenu ‘i he mata tēniti.

¹⁰Pea te ke ngaohi ha kavei ‘e nimangofulu ‘i he tapa ‘o e tupenu taupotu ‘i he matai-nima, mo e kavei ‘e nimangofulu ‘i he tapa ‘o e tupenu ‘i he matai-ono.

¹¹Pea te ke ngaohi ha fakama‘u kapa ‘e nimangofulu, pea te ke fakahū ‘a e ngaahi fakama‘u ki he ngaahi kavei, ‘o fakahoko ‘a e tēniti ke taha pē.

¹²Pea ko e potu ‘oku tāupe, ‘a e me‘a ‘oku toe ‘i he ngaahi tupenu ‘o e tēniti, ‘io, ‘a e toe vaeua ‘o e tupenu, ‘e tāupe ia ‘i he taa‘i Tāpanekale ki kō.

¹³Pea ko e kiupite ‘oku toe ‘i he lōloa ‘o e ngaahi tupenu ‘o e tēniti, ‘i hē mo ē, ‘e tāupe ia ‘i he tafa‘aki ko ē mo ē ‘o e Tāpanekale.

¹⁴Pea te ke ngaohi ha ‘u‘ufi ki he matahoko ‘o e tēniti ‘aki ‘a e ngaahi kili‘i sipi tangata kuo fakalanukula; pea mo ha fakatefisi ‘aki ‘a e kili‘i tukongi.

¹⁵Pea te ke ngaohi ‘a e holisi ‘o e Tāpanekale ‘aki ‘a e papa sitimi ‘o fokotutu‘u.

¹⁶Ko e lōloa ‘o e papa ‘e taha ko e kiupite ‘e hongofulu, pea ko e kiupite mo e haafe ‘a e māukupu ‘o e papa.

¹⁷‘E ai ha ongo ‘elelo ‘e ua ‘i he papa ‘e taha, ‘o fakahoko ‘a e taha mo e taha:[31] ‘e pehē ho‘o fai ki he ngaahi laupapa kotoa pē ‘o e Tāpanekale.

¹⁸Pea ‘i ho‘o ngaohi holisi ki he Tāpanekale, te ke ngaohi ha papa ‘e uofulu ki he fa‘ahi ki he Tonga (‘a e fakato‘omata‘u).

¹⁹Pea te ke ngaohi ha tu‘unga siliva ‘e fāngofulu ke tu‘u ‘i he lalo uofulu‘i papa; ko e tu‘unga ‘e ua ki he lalo papa ko ē, ki hono ongo ‘elelo ‘o‘ona, mo e tu‘unga ‘e ua ki he lalo papa ko ē ki he ongo ‘elelo ‘o‘ona.

²⁰Pea ki he tafa‘aki ko ē ‘o e Tāpanekale, ‘a e fa‘ahi ki tokelau, ‘e ngaohi ha papa ‘e uofulu;

²¹mo honau tu‘unga siliva ‘e fāngofulu, ko e tu‘unga ‘e ua ‘i he lalo papa ko ē, mo e tu‘unga ‘e ua ‘i he lalo papa ko ē.

²²Pea ki he tā ‘o e Tāpanekale ki lulunga te ke ngaohi ha papa ‘e ono.

²³Pea te ke ngaohi ha ongo papa ki he ngaahi tuliki ‘o e Tāpanekale ‘i he ongo tā.

²⁴Pea te na pikiua ‘i lalo, pea fakataha kinaua mei ‘olunga ‘i he ‘uluaki kavei; ‘e fai pehē ki he ua ko ē foki; ko e me‘a ia ki he ongo tuliki.

²⁵Pea ‘e valu ‘a e ngaahi papa, pea ko honau ngaahi tu‘unga siliva ko e tu‘unga ‘e hongofulu mā ono; ko e tu‘unga ‘e ua ki he lalo papa ko ē, mo e tu‘unga ‘e ua ki he lalo papa ko ē.

²⁶Pea te ke ngaohi kiato ‘aki ‘a e ‘akau sitimi; ko e nima ki he ‘ū papa ‘o e fa‘ahi Tāpanekale ko ē,

²⁷pea mo e kiato ‘e nima ki he ‘ū papa ‘o e fa‘ahi Tāpanekale ko ē; mo e kiato ‘e nima ki he ‘ū papa ‘o e tā ‘o e Tāpanekale ki lulunga.

²⁸Pea ko e kiato loto ‘i he loto holisi ‘e tau mei potu ki potu.

²⁹Pea te ke ‘u‘ufi ‘a e ngaahi laupapa ‘aki ‘a e koula, pea ko honau ngaahi kavei te ke ngaohi koula pē ke velo ai ‘a e ngaahi kiato; pea te ke ‘ufi‘ufi koula ‘a e ngaahi kiato.

³⁰Pea te ke fokotu‘u ‘a e Tāpanekale ‘o fakatatau ki hono konisitūtone, ‘a ia na‘e tuku ke ke mamata ki ai ‘i he mo‘unga.

³¹Pea te ke ngaohi ha tatau ‘aki ‘a e lanu langi, mo e kula-po‘upo‘uli mo e kula-aho‘aho, mo e vavae hinehina kuo filo: te ke ngaohi ia ke hā ha ngaahi selupimi ‘i he lalanga:

³²pea te ke tautau ia ‘i ha pou sitimi ‘e fā, kuo ‘u‘ufi koula, pea koula honau ngaahi tautau‘anga, ‘o nau tu‘u ‘i ha tu‘unga siliva ‘e fā.

³³Pea te ke ‘ai ‘a e tatau fe‘unga mo e ngaahi fakama‘u ko ē, kae ‘i lalo; pea te ke fakahū ki hē, ki he loto tatau, ‘a e ‘a‘ake fakamo‘oni‘anga: pea ko homou ‘āvahevahe ia ‘o e Potu Tapu mo e Potu Toputapu.

³⁴Pea te ke ‘ai ‘a e hōifua‘anga ki he funga ‘a‘ake fakamo‘oni‘anga ‘i he Potu Toputapu.

³⁵Pea te ke tuku ‘a e tēpile mei he tu‘a tatau, pea ko e tu‘unga maama ‘e fehangahangai mo e tēpile, ‘o tu‘u ‘i he fa‘ahi Tāpanekale ki he Tonga: pea ko e tēpile te ke ‘ai ki he fa‘ahi tokelau.

³⁶Pea te ke ngaohi ha puipui ki he mata tēniti ‘aki ‘a e lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo; ‘e fai ai ha ngāue ‘a e tuitui poto.

³⁷Pea te ke ngaohi ki he puipui ko ia ha pou sitimi ‘e nima, pea te ke ‘u‘ufi koula ia, pea ‘e koula honau ngaahi tautau‘anga: pea te ke haka ki ai ha tu‘unga kapa ‘e nima.