Read KO E TOH TAPU KATOA TONGA KO ‘EKISOTO 29 Bible Online

KO ‘EKISOTO 29 - KO E TOH TAPU KATOA TONGA bible

KO ‘EKISOTO 29

¹PEA ko eni ‘a e me‘a te ke fai kiate kinautolu, ke fakatāpui kinautolu ke fai kiate au ‘a e ngāue fakataula‘eiki: to‘o ha pulu mui ‘e taha, mo ha ongo sipi tangata ‘oku ta‘ehana mele,

²mo ha mā ta‘elēvani, mo e ngaahi keke ta‘elēvani kuo natu ‘aki ‘a e lolo, pea mo ha ngaahi fo‘i mā ta‘elēvani manifinifi kuo pani lolo: te ke ngaohi ia ‘aki ‘a e ‘elito‘i uite.

³Pea te ke fa‘o fakataha ki ha kato, pea te ke ‘omi ‘i he kato, fakataha mo e pulu mui mo e ongo sipi tangata.

⁴Pea te ke fakaofi mai ‘a ‘Ēlone mo hono ngaahi foha ki he matapā ‘o e Tēniti Fe‘iloaki‘anga, pea te ke kaukau‘i kinautolu ‘i he vai.

⁵Pea te ke to‘o ‘a e ngaahi kofu, pea te ke ‘ai kia ‘Ēlone ‘a e Sote mo e Kofu-tōtōlofa ‘o e ‘ēfoti, pea mo e ‘ēfoti, pea mo e Sifa, pea te ke fakama‘u kiate ia ‘aki ‘a e No‘o-pulepule ‘o e ‘ēfoti:

⁶pea te ke ‘ai ‘a e Tatā ki hono ‘ulu, pea te ke ‘ai ‘a e Kalauni tapu ki he tatā.

⁷Pea te ke toki to‘o ‘a e lolo pani, ‘o lilingi ki hono ‘ulu ke pani ‘aki.

⁸Pea te ke fakaofi mai hono ngaahi foha, pea te ke ‘ai sote kiate kinautolu.

⁹Pea te ke ‘ai ha no‘o kia ‘Ēlone mo hono ngaahi foha, pea te ke ‘ai ha fa‘u kiate kinautolu: pea ‘e ‘onautolu ‘a e ngāue fakataula‘eiki ko e tu‘utu‘uni ta‘engata: pea te ke fakanofo ‘a ‘Ēlone mo hono ngaahi foha.

¹⁰Pea te ke ‘unuaki mai ‘a e pulu ki he mata Tēniti Fe‘iloaki‘anga, pea ‘e hilifaki ‘e ‘Ēlone mo hono ngaahi foha honau nima ki he ‘ulu ‘o e pulu.

¹¹Pea te ke tāmate‘i ‘a e pulu ‘i he ‘ao ‘o Sihova, fe‘unga mo e matapā ‘o e Tēniti Fe‘iloaki‘anga.

¹²Pea te ke to‘o ha me‘a mei he toto ‘o e pulu, ‘o ‘ai ki he ngaahi nifo ‘o e ‘ōlita ‘aki ho tuhu; ka te ke lilingi hono kotoa ‘o e toto ki he tefito‘i ‘ōlita.

¹³Pea te ke to‘o ‘a e tākai kotoa ‘oku ‘ufi‘ufi ‘aki ‘a e to‘oto‘onga, pea mo e milimili ‘oku ‘i he funga ‘ate, pea mo e ongo kofuua, mo e ngako ‘oku ‘i ai, pea te ke tutu ia ‘i he ‘ōlita.

¹⁴Pea ko e kakano ‘o e pulu mo hono kili, mo hono kinoha‘a, te ke faka‘auha ‘aki ‘a e afi ‘i he tu‘a ‘apitanga: ko e me‘a angahala ia.

¹⁵Pea te ke to‘o foki ‘a e sipi tangata ‘e toko taha, pea ko ‘Ēlone mo hono ngaahi foha te nau hilifaki honau nima ki he ‘ulu ‘o e sipi tangata.

¹⁶Pea te ke tāmate‘i ‘a e sipi tangata, pea te ke to‘o hono toto, ‘o luluku ‘aki ‘a e ‘ōlita takatakai.

¹⁷Pea te ke tafa ‘a e sipi, pea te ke fufulu hono to‘oto‘onga, mo hono ngaahi alanga, ‘o hilifaki ki hono ngaahi konga, mo hono ‘ulu.

¹⁸Pea te ke tutu kotoa ‘a e sipi tangata ‘i he ‘ōlita; ko e feilaulau-mōifua ia kia Sihova: ko e ngangatu fakahōifua, fai‘aki ‘a e afi kia Sihova.

¹⁹Pea te ke to‘o ‘a e sipi tangata ‘e taha; pea ko ‘Ēlone mo hono ngaahi foha te nau hilifaki honau nima ki he ‘ulu ‘o e sipi tangata.

²⁰Te ke toki tāmate‘i ‘a e sipi tangata, pea te ke to‘o ha me‘i toto mei ai, ‘o ‘ai ki he mua‘i telinga to‘omata‘u ‘o ‘Ēlone, pea ki he mua‘i telinga to‘omata‘u ‘o hono ngaahi foha, pea ki honau motu‘a nima to‘omata‘u, pea ki honau motu‘a va‘e to‘omata‘u; pea te ke luluku ‘aki ‘a e toto ‘a e ‘ōlita takatakai.

²¹Pea te ke to‘o ha me‘i toto mei he ‘ōlita, pea mo ha me‘i lolo pani, pea te ke afuhi ‘aki ‘a ‘Ēlone, pea mo hono ngaahi kofu, mo hono ngaahi foha, pea mo e ngaahi kofu ‘o hono ngaahi foha, ‘i he‘enau tu‘u fakataha mo ia; pea te ne tapu leva, ‘a ia mo hono ngaahi kofu, mo hono ngaahi foha, pea mo e ngaahi kofu ‘o hono ngaahi foha, fakataha mo ia.

²²Pea te ke to‘o mei he sipi tangata ‘a e ngako, mo e tu‘ulāvelo, pea mo e takai ‘oku ne ‘ufi‘ufi ‘a e to‘oto‘onga, pea mo e milimili ‘o e ‘ate, pea mo e ongo kofuua, mo e ngako ‘oku ‘i ai, pea mo e tefito alanga to‘omata‘u; he ko e sipi tangata fakanofo ia:

²³pea mo ha fo‘i mā ‘e taha, pea mo ha fo‘i keke natu lolo ‘e taha, pea mo ha fo‘i mā manifinifi ‘e taha, mei he koto mā ta‘elēvani ‘oku ‘i he ‘ao ‘o Sihova:

²⁴pea te ke ‘ai kotoa ki he ‘aofinima ‘o ‘Ēlone mo hono ngaahi foha, pea te ke tākalo ‘aki ia ko e feilaulau-tākalo ‘i he ‘ao ‘o Sihova.

²⁵Pea te ke to‘o ia mei honau nima, pea te ke tutu ia ‘i he ‘ōlita ‘i he funga feilaulau-mōifua, ko e ngangatu fakahōifua ki he finangalo ‘o Sihova, fai‘aki ‘a e afi ki he‘ene ‘Afio.

²⁶Pea te ke to‘o ‘a e fatafata ‘o e sipi tangata fakanofo ‘o ‘Ēlone, pea te ke tākalo ‘aki ia ko e feilaulau-tākalo ‘i he ‘ao ‘o Sihova; pea ‘e hoko ia ko ho ‘inasi.

²⁷Pea te ke tapui ‘a e fatafata na‘e tākalo ‘aki, pea mo e tefito alanga ‘o e feilaulau hapai, ‘a ia ‘oku tākalo ‘aki pea hapai ‘aki foki, mei he sipi tangata fakanofo, ‘a ia kuo feia mo‘o ‘Ēlone mo hono ngaahi foha:

²⁸pea ‘e ‘o ‘Ēlone mo hono ngaahi foha ia, ko honau ‘inasi ‘o ta‘engata mei ha‘a ‘Isileli; he ko e feilaulau hapai ia: pea ‘e hoko ko e feilaulau hapai mei ha‘a ‘Isileli mei he‘enau ngaahi feilaulau-‘ofa, ‘io, ko ‘enau feilaulau-hapai ia kia Sihova.

²⁹Pea ko e ngaahi kofu tapu ‘a ia kuo ‘o ‘Ēlone, ‘e ‘o hono ngaahi foha ‘amui, ke fai ai honau pani mo honau fakanofo.

³⁰Pea ko hono foha te ne fetongi ia ‘i he ngāue fakataula‘eiki, te ne ‘ai ia ‘o ‘aho fitu, ‘i he‘ene hū ki he Tēniti Fe‘iloaki‘anga, ke fai ‘ene ngāue fakalotu ‘i he Potu Tapu.

³¹Pea te ke to‘o ‘a e sipi tangata fakanofo, pea te ke haka hono kakano ‘i ha potu tapu.

³²Pea ‘e kai ‘e ‘Ēlone mo hono ngaahi foha ‘a e kakano ‘o e sipi tangata, mo e mā ‘oku ‘i he kato, ‘i he matapā ‘o e Tēniti Fe‘iloaki‘anga.

³³Pea te nau kai ‘a e ngaahi me‘a na‘e fai‘aki ‘a e fakalelei, ke fakanofo mo fakatāpui kinautolu: ka ‘e ‘ikai kai ai ‘e ha kehe, he ko e me‘a tapu.

³⁴Pea kapau ‘e toe ki he ‘apongipongi ha me‘a mei he kakano fakanofo, pe ko e mā, pea te ke tutu ‘a e toe ko ia ‘aki ‘a e afi: ‘e ‘ikai kai ia, he ko e me‘a tapu.

³⁵Pea te ke fai kia ‘Ēlone mo hono ngaahi foha ‘o hangē tofu pē ko ‘eku tu‘utu‘uni kiate koe: ko e ‘aho ‘e fitu te ke fai honau fakanofo.

³⁶Pea te ke feia ‘i he ‘aho kotoa pē ha pulu feilaulau angahala ke fakalelei ‘aki: pea te ke fakama‘a ‘a e ‘ōlita ‘i ho‘o fai ‘a e fakalelei ma‘ana; pea te ke pani ia mōno fakatāpui.

³⁷Ko e fitu‘i ‘aho te ke fai ‘a e fakalelei ma‘a e ‘ōlita, pea te ke fakatāpui ia, pea ‘e hoko ia ko e ‘ōlita toputapu: ‘ilonga ha me‘a ‘e lave ki he ‘ōlita ‘e tapu leva.[33]

³⁸Pea ko eni ‘a e me‘a te ke feia ‘i he ‘ōlita; ko e ongo lami ‘oku ta‘u taha ‘i he ‘aho kotoa pē.

³⁹Ko e lami ‘e taha ‘e feia pongipongi; pea ko hono ua ‘o e lami te ke fai ‘i he‘ene efiafi hifo:

⁴⁰pea ‘e ‘atu mo e ‘uluaki lami ha vahehongofulu ‘o e ‘elito‘i mahoa‘a, kuo natu ‘aki ha lolo tuki, fe‘unga mo e vahefā ‘o ha hina; pea mo e vahefā ‘o ha hina uaine mōno kava.

⁴¹Pea ko hono ua ‘o e lami te ke feia ‘i he‘ene efiafi hifo, pea ko hono kinaki ‘e tatau mo e feilaulau pongipongi, pea pehē mo hono kava: ko e ngangatu fakahōifua ia, fai‘aki ‘a e afi kia Sihova.

⁴²Ko e feilaulau-mōifua tu‘u ma‘u ia ‘i homou ngaahi to‘utangata, ‘o fai ‘i he matapā ‘o e Tēniti Fe‘iloaki‘anga ‘i he ‘ao ‘o Sihova: ko e potu ia te u fe‘iloaki ai mo kimoutolu, ke alea mo koe ‘i ai.

⁴³‘Io, ko e potu ko ia te u fe‘iloaki ai mo ha‘a ‘Isileli; pea te u fakatāpui ia ‘aki hoku lāngilangi.

⁴⁴‘Io, te u fakatāpui ‘a e Tēniti Fe‘iloaki‘anga mo e ‘Ōlita: ko ‘Ēlone foki mo hono ngaahi foha te u fakatāpui, ke nau fai ‘a e ngāue fakataula‘eiki kiate au.

⁴⁵Pea te u nofo ‘i he lotolotonga ‘o ha‘a ‘Isileli, pea te u hoko ko honau ‘Otua.

⁴⁶Pea te nau ‘ilo ko Sihova au ko honau ‘Otua, ‘a ia na‘a ku ‘omi kinautolu mei ‘Isipite ke u nofo fonua ‘i honau lotolotonga: ko Sihova au ko honau ‘Otua.