Read KO E TOH TAPU KATOA TONGA KO ‘EKISOTO 3 Bible Online

KO ‘EKISOTO 3 - KO E TOH TAPU KATOA TONGA bible

KO ‘EKISOTO 3

¹PEA nofo ‘a Mōsese ko e tauhi ‘o e fanga manu ‘a Setelō ko e taula‘eiki ‘o Mitiani, ko e kāinga ‘o hono uaifi; pea na‘a ne taki ‘a e fanga manu ki he tu‘a toafa, ‘o ne a‘u ki he Mo‘unga ‘o ‘Elohimi, ‘a Hōlepi.

²Pea na‘e hā kiate ia ‘a e ‘āngelo ‘a Sihova ‘i he loto afi na‘e ulo hake ‘i he vao talatala‘āmoa; pea ne vakai, tā neongo ‘oku vela ‘a e vao talatala‘āmoa ‘i he afi, ka ‘oku ‘ikai keina ai ‘a e talatala‘āmoa.

³Pea pehē ‘e Mōsese, Ka u afe atu mu‘a, ‘o mamata ki he fu‘u me‘a ni kuo hā, pe ko e hā ‘oku ‘ikai vela ai ‘a e talatala‘āmoa.

⁴Pea ‘i he ‘afio‘i ‘e Sihova ‘oku ne afe mai ke vakai, na‘e ui kiate ia ‘e he ‘Otua mei he loto talatala‘āmoa, ‘o pehē, ‘E Mōsese! ‘e Mōsese! Pea ne tali, Ko au eni.

⁵Pea ne folofola, ‘Oua te ke ofi mai ki heni: to‘o ho topuva‘e mei ho va‘e, he ko e potu ‘oku ke tu‘u ai ko e kelekele tapu.

⁶Pea ne folofola foki, Ko Au ko e ‘Otua ‘o ho tupu‘anga, ko e ‘Otua ‘o ‘Epalahame, ko e ‘Otua ‘o ‘Aisake, pea ko e ‘Otua ‘o Sēkope. Pea na‘e fakapūlou ‘e Mōsese hono mata; he na‘a ne manavahē ke hanga kia ‘Elohimi.

⁷Pea folofola ‘a Sihova, Kuo u mātu‘aki mamata ki he ngaohikovi‘i ‘o hoku kakai ‘oku ‘i ‘Isipite, pea kuo ongo mai ‘enau tautapa koe‘uhi ko honau kau ‘ōfisa; he ‘oku ou ‘ilo‘i ‘enau ngaahi mamahi;

⁸pea kuo u ‘alu hifo ke fakahaofi kinautolu mei he nima ‘o e kau ‘Isipite, pea ke ‘ohake kinautolu mei he fonua ko ia ki ha fonua lelei mo lahi, ha fonua ‘oku mahutafea ‘i he hu‘akau mo e honi; ‘a e feitu‘u ‘o ha‘a Kēnani, mo ha‘a Heti, mo ha‘a ‘Āmoli, mo ha‘a Pēlisi, mo ha‘a Hevi, mo ha‘a Siepusi.

⁹Pea ko eni, kuo a‘u mai kiate au ‘a e tautapa ‘a ha‘a ‘Isileli: kae‘uma‘ā kuo u mamata foki ki he fakamamahi ‘oku fai ‘e he kau ‘Isipite kiate kinautolu.

¹⁰Pea ko ia ke ke ha‘u ā, ka u fekau atu koe kia Felo, ke ‘omi mei ‘Isipite ‘a hoku kakai ko ha‘a ‘Isileli.

¹¹Pea fakatau folofola ‘e Mōsese kia ‘Elohimi, ‘o pehē, Ko hai au ke u ‘alu kia Felo, pea ke u ‘omi ‘a ha‘a ‘Isileli mei ‘Isipite?

¹²Pea ne folofola mai, Koe‘uhi ā te u ‘iate koe; pea ko eni ha‘o fakamo‘oni ko Au ia kuo fekau atu koe: ‘Oka ke ka taki atu ‘a e kakai na mei ‘Isipite, te mou tauhi kia ‘Elohimi ‘i he mo‘unga ko eni.

¹³Pea tali ‘e Mōsese kia ‘Elohimi, Ko eni, ka u ka ‘alu ki ha‘a ‘Isileli, pea u lea kiate kinautolu ‘o pehē, Ko e ‘Otua ‘o ho‘omou ngaahi kui kuo ne fekau au kiate kimoutolu; pea te nau pehē mai kiate au, Ko hai hono huafa? Pea ko e hā ai ha‘aku lea ‘e fai kiate kinautolu?

¹⁴Pea folofola ‘a e ‘Otua kia Mōsese, KO AU KO AU AI PĒ.[6] Pea ne toe folofola, Ko eni ‘a e lea te ke fai ki ha‘a ‘Isileli, Ko KO-AU-AI PE kuo ne fekau au kiate kimoutolu.

¹⁵Pea folofola atu ‘a e ‘Otua kia Mōsese, Ko eni ho‘o lea ‘e fai ki ha‘a ‘Isileli, Kuo fekau au kiate kimoutolu ‘e Sihova, ko e ‘Otua ‘o ho‘omou ngaahi kui, ko e ‘Otua ‘o ‘Epalahame, ko e ‘Otua ‘o ‘Aisake, pea ko e ‘Otua ‘o Sēkope: ko hoku hingoa ia ‘o ta‘engata, pea ko hoku fakamanatu ia ki he to‘utangata mo e to‘utangata.

¹⁶‘Alu ‘o fakataha ‘a e mātu‘a ‘o ‘Isileli, pea ke lea kiate kimoutolu, ‘o pehē, Kuo hā kiate au ‘a Sihova ko e ‘Otua ‘o ho‘omou ngaahi kui, ko e ‘Otua ‘o ‘Epalahame mo ‘Aisake mo Sēkope, pea kuo ne pehē mai, Kuo u mātu‘aki ‘a‘ahi kiate kimoutolu, ‘o vakai ki he ngaahi me‘a ‘oku fai kiate kimoutolu ‘i ‘Isipite:

¹⁷pea kuo u pehē, Te u ‘ohake kimoutolu mei he fakamamahi ‘e he kakai ‘Isipite ki he fonua ‘o ha‘a Kēnani, mo ha‘a Heti, mo ha‘a ‘Āmoli, mo ha‘a Pēlisi, mo ha‘a Hevi, mo ha‘a Siepusi, ko e fonua ‘oku mahutafea ‘i he hu‘akau mo e honi.

¹⁸Pea te nau tuitala ki ho‘o lea; pea te ke a‘u atu ki he Tu‘i ‘Isipite, ‘a koe mo e mātu‘a ‘o ‘Isileli, pea te mou pehē kiate ia, Ko Sihova ko e ‘Otua ‘o ha‘a Hepelū kuo ne hā‘ele hifo kiate kimautolu; pea ko ia ke mau ‘alu mu‘a ki he Toafa ko e vaa‘i hala ‘o e ‘aho ‘e tolu, ke mau feilaulau ai kia Sihova ko homau ‘Otua.

¹⁹Ka ‘oku ou ‘ilo ‘e ‘ikai tukuange kimoutolu ke ‘alu ‘e he Tu‘i ‘Isipite, ‘io, neongo ha tā mamafa.

²⁰Pea te u mafao hoku nima, pea te u taa‘i ‘a ‘Isipite ‘aki ‘eku ngaahi me‘a fakaofo kehekehe, ‘a ia te u fai ‘i honau lotolotonga: pea hili ia te ne tuku atu kimoutolu.

²¹Pea te u ‘ai ke ‘ofeina ‘a e kakai ni ‘i he ‘ao ‘o e kakai ‘Isipite: pea ‘i he faifai pea mou ‘alu atu, ‘e ‘ikai te mou ‘alu mola:

²²ka ‘e kole ‘a e fefine takitaha mei hono kaungā‘api, pea mei he fefine ‘oku ‘āunofo ‘i hono fale, ‘a e teunga siliva mo e teunga koula, mo e kofu; pea te mou ‘ai ia ki ho‘omou fānau tangata mo ho‘omou fānau fefine: ‘io, te mou vete ‘a e kakai ‘Isipite.