Read KO E TOH TAPU KATOA TONGA KO ‘EKISOTO 31 Bible Online

KO ‘EKISOTO 31 - KO E TOH TAPU KATOA TONGA bible

KO ‘EKISOTO 31

¹PEA folofola ‘a Sihova kia Mōsese, ‘o pehē,

²Vakai, kuo u ui hingoa ‘a Pesalili ko e foha ‘o ‘Uli, ko e foha ‘o Hua, ‘i he matakali ‘o Siuta;

³pea kuo u taumalingi kiate ia ‘a e laumālie[35] ‘o e ‘Otua, ke fakapoto mo faka‘atamai‘i, mo fakalotomatala, mo fakaalafua,

⁴ke ne fakakaukau‘i hano anga ‘o e ngaahi me‘a, pea ke tufunga koula mo siliva mo e kapa,

⁵pea ke tongi maka fonofono, pea ke tongi ‘akau, ke fai ‘a e ngāue kotoa pē ‘oku faingata‘a.

⁶Pea ko au foki kuo u tuku ke tokoni kiate ia ‘a ‘Aholiapi, ko e foha ‘o ‘Ahisamaki, ‘i he matakali ‘o Tani; pea kuo u tuku ha poto ki he loto ‘o e kau nima mea‘a, ke nau ngaohi ‘a e me‘a kehekehe kuo u tu‘utu‘uni atu: ‘a e Tēniti Fe‘iloaki‘anga,

⁷pea mo e ‘A‘ake Fakamo‘oni‘anga, pea mo e Hōifua‘anga, ‘a ia ‘oku hilifaki ki ai, pea mo e nāunau kotoa ‘o e Tēniti;

⁸pea mo e Tēpile mo hono nāunau, pea mo e Tu‘unga Maama ma‘a mo hono nāunau kotoa, pea mo e ‘ōlita Tutu‘anga-‘inisēnisi,

⁹mo e ‘ōlita Tutu‘anga-feilaulau mo hono nāunau kotoa, pea mo e Pālutu‘anga mo hono Tu‘unga;

¹⁰pea ngaahi kofu mālohi, mo e ngaahi kofu tapu kia ‘Ēlone ko e taula‘eiki, pea mo e ngaahi kofu ‘o hono ngaahi foha, ke fai‘aki ‘a e ngāue fakataula‘eiki;

¹¹pea mo e Lolo pani, pea mo e ‘inisēnisi namu kakala ki he Potu Tapu: ‘o hangē tofu pē ko ‘eku tu‘utu‘uni atu, ‘e pehē ‘enau fai.

¹²Pea folofola ‘a Sihova kia Mōsese, ‘o pehē,

¹³Te ke lea mo koe ki ha‘a ‘Isileli, ‘o pehē, Kehe ko ‘eku ngaahi Sāpate te mou tauhi ia: he ko e faka‘ilonga ia ‘i he vaha‘a ‘o‘oku mo kimoutolu ‘i homou ngaahi to‘utangata; ke mou ‘ilo ko au Sihova ia ‘oku ou tapui kimoutolu.

¹⁴Ko ia te mou tauhi ‘a e Sāpate; he ko e me‘a tapu ia ma‘amoutolu: ko ia ‘oku ne maumau‘i ia te ne mātu‘aki mate: ‘io, ‘ilonga ia ‘oku fai ai ha ngāue, ‘e motuhi ‘a e laumālie ko ia mei he lotolotonga ‘o hono kakai.

¹⁵Ko ha ono‘i ‘aho ‘e fai ai ha ngāue, ka ‘i hono ‘aho fitu ‘e fai ai ha Sāpate mālōlō tapu kia Sihova: ko ia kotoa pē ‘oku ne fai ha ngāue ‘i he ‘aho Sāpate, ‘e mātu‘aki mate.

¹⁶Ko ia ‘e tauhi ‘e ha‘a ‘Isileli ‘a e Sāpate, ke fai ai ha mālōlō ‘i honau ngaahi to‘utangata; ko e fuakava ta‘engata ia.

¹⁷Ko e faka‘ilonga ia ‘i he vaha‘a ‘o‘oku mo ha‘a ‘Isileli ke ta‘engata: he ko ha ono‘i ‘aho na‘e ngaohi ai ‘e Sihova ‘a e ngaahi langi mo māmani, pea ‘i hono ‘aho fitu na‘a ne mālōlō, mo fakamānava hake.

¹⁸Pea ‘i he ‘osi ‘ena alea mo Mōsese ‘i he mo‘unga ko Sainai, na‘a ne ‘ange kiate ia ‘a e ongo maka Fakamo‘oni‘anga, ko e ongo makatohi kuo tohi ‘e he louhi‘i nima ‘o Sihova.