Read KO E TOH TAPU KATOA TONGA KO ‘EKISOTO 32 Bible Online

KO ‘EKISOTO 32 - KO E TOH TAPU KATOA TONGA bible

KO ‘EKISOTO 32

¹PEA ‘i he vakai ‘e he kakai ‘oku fakatotoka ‘e Mōsese ‘ene ‘alu hifo mei he mo‘unga, na‘a nau fakataha kia ‘Ēlone, ‘o nau pehē kiate ia, Tu‘u, ‘o ngaohi mai hatau ‘otua[36] ke takimu‘a kiate kitautolu; he ko e me‘a ki he siana ni ko Mōsese, ‘a ia na‘a ne ‘omi kitautolu mei ‘Isipite, ‘oku ‘ikai te tau ‘ilo pe ko e hā kuo hoko kiate ia.

²Pea lea ‘a ‘Ēlone kiate kinautolu, ‘o pehē, Paki mai ‘a e ngaahi teunga koula ‘a ia ‘oku ‘i he telinga ‘a homou ngaahi ‘unoho, mo homou ngaahi foha, mo homou ngaahi ‘ōfefine, ‘o ‘omi kiate au.

³Pea na‘e hanga ‘a e kakai kotoa, ‘o paki‘i ‘a e ngaahi teunga koula mei honau telinga, ‘o nau ‘omi kia ‘Ēlone.

⁴Pea ne tali ia mei honau nima, ‘o ne tongi ‘aki ha tutu‘u, ‘o ne ngaohi ‘aki ha kafi ukamea. Pea nau pehē, Ko eni, ‘e ha‘a ‘Isileli, ho ‘otua, ‘a ia ne ne ‘ohake koe mei ‘Isipite.

⁵Pea ‘i he vakai ki ai ‘e ‘Ēlone, na‘a ne langa ha ‘ōlita ‘i hono ‘ao, ‘o ne fanongonongo, Ko e kātoanga kia Sihova ‘apongipongi.

⁶Pea na‘a nau tutu‘u hengihengi hake. Pea nau feia ha ngaahi feilaulau-mōifua. Pea nau ‘omi mo e ngaahi feilaulau-‘ofa; pea na‘e nofo ‘a e kakai ‘o kai mo inu kava, pea nau tutu‘u ke va‘inga.

⁷Pea folofola ‘a e ‘Eiki kia Mōsese, Tu‘u, ‘o ‘alu hifo; he ko ho kakai na, ‘a ia na‘a ke ‘ohake mei ‘Isipite, kuo nau fakaka‘anga kinautolu:

⁸kuo vave ‘enau afe mei he hala na‘a ku tu‘utu‘uni kiate kinautolu: kuo nau ngaohi hanau kafi ukamea, pea kuo nau lotu ki ai, mo feilaulau ki ai, pea kuo nau lea ‘o pehē, Ko eni, ‘e ha‘a ‘Isileli, ho ‘otua, ‘a ia na‘a ne ‘ohake koe mei ‘Isipite.

⁹Pea folofola ‘a Sihova kia Mōsese, kuo u vakai ‘a e kakai na, Pea tā ko e kakai kia kekeva ia:

¹⁰ko ia tukuange mu‘a ke kakaha ‘eku ‘ita kiate kinautolu, ka u faka‘auha kinautolu, pea te u ngaohi koe ko e kakai lahi.

¹¹Pea fai ‘e Mōsese ke fakamokomoko ki he finangalo ‘o Sihova ko hono ‘Otua, ‘o ne pehē, Ko e hā ‘oku kakaha pehē ai ‘a e tuputāmaki ‘a e ‘Afiona ki ho‘o kakai, ‘a ia na‘a ke taki mai mei ‘Isipite; ‘aki ‘a e ivi lahi mo e nima mālohi!

¹²Koe‘uma‘ā ke lea ‘e he kau ‘Isipite, ‘o pehē, Tā ko e mala na‘a ne taki atu ai kinautolu, ke fakapoongi kinautolu ‘i he mo‘unga, pea ke faka‘auha kinautolu mei he funga ‘o e kelekele. ‘Ē, ke lolou mu‘a ‘a e kakaha ‘o ho houhau, pea liliu ‘a e mala ki ho kakai.

¹³Manatu kia ‘Epalahame, kia ‘Aisake mo ‘Isileli, ko ho‘o kau tamaio‘eiki, ‘a ia na‘a ke fuakava kiate kinautolu ‘i he ‘Afiona, ‘o ke folofola ki ai, ‘o pehē, Te u fakatokolahi homou hako ke tatau mo e ngaahi fetu‘u ‘o e langi, pea ko e fonua ni kotoa kuo u lea ki ai, te u ‘atu ia ki homau hako, pea te nau tofi‘a ‘aki ‘o ta‘engata.

¹⁴Pea na‘e fakatomala ‘a e ‘Eiki ‘i he mala na‘a ne pehē ke fai ki hono kakai.

¹⁵Pea tafoki ai ‘a Mōsese, ‘o ne ‘alu hifo mei he mo‘unga, ‘oku ne to‘o ‘a e ongo Maka ‘o e Fakamo‘oni; ko e ongo maka na‘e tohi hona ongo fa‘ahi fakatou‘osi, ‘io, na‘e tohi ‘a ē mo ē.

¹⁶Pea ko e ongo maka ko ē ko e ngāue ‘a e ‘Otua, pea ko e tohi nima ‘a e ‘Otua, ‘o tongi ‘i he ongo maka.

¹⁷Pea fanongo ‘e Siosiua ki he longoa‘a ‘a e kakai ‘i he‘enau kaila, pea ne pehē kia Mōsese, ‘Oku ai ha kaila-tau ‘i he ‘apitanga.

¹⁸Pea tali ‘e ia, ‘Oku ‘ikai ko e kaila ‘a ha kakai ‘oku mālohi, pea ‘oku ‘ikai ko e kaila ha kakai ‘oku vaivai: ka ko e longoa‘a ha kakai ‘oku hiva ‘oku ongo mai kia kita.

¹⁹Pea ‘i he faifai pea na ofi ki he ‘apitanga, na‘a na mamata ki he kafi mo e me‘e; pea puke ‘a e fu‘u ‘ita ‘a Mōsese, ‘o ne pe‘ehi ‘a e ongo maka, ‘o laiki ‘i he lalo mo‘unga.

²⁰Pea ne to‘o ‘a e kafi kuo nau ngaohi, ‘o ne tutu ia ‘i he afi, ‘o ne tuki ke efu, ‘o ne tūtuu‘i ‘i he fukahi vai, ‘o ne kouna ‘a ha‘a ‘Isileli ke inu mei ai.

²¹Pea lea ‘a Mōsese kia ‘Ēlone, Ko e hā tū ha me‘a na‘e fai ‘e he kakai ni kiate koe ke ke fie fakaangahala‘i pehe‘i ai kinautolu?

²²Pea pehē ‘e ‘Ēlone, Ke ‘oua ‘e tuputāmaki lahi ‘a e Feitu‘u na! ‘oku ke mea‘i ‘a e kakai, ko e fa‘ahinga fita‘a.

²³Pea na‘a nau lea mai kiate au, Ngaohi mai mu‘a hatau ‘otua, ke takimu‘a kiate kitautolu; he ko e me‘a ki he siana ni ko Mōsese, ‘a ia na‘a ne ‘ohake kitautolu mei ‘Isipite, ‘oku ‘ikai te mau ‘ilo pe ko e hā kuo hoko kiate ia.

²⁴Pea u pehē kiate kinautolu, ‘Ilonga ha ma‘u koula, ke paki mai; pea na‘a nau ‘omi kiate au; pea u lī ia ki he afi, pea na‘e tō mai ‘a e kafi ko eni.

²⁵Pea ‘i he vakai ‘e Mōsese ki he kakai ‘oku nau fakalusa, (he kuo fakalusa kinautolu ‘e ‘Ēlone, ‘o tuku ke luma‘i ‘e honau ngaahi fili)

²⁶pea tu‘u ai ‘a Mōsese ‘i he matanikolo ‘o e ‘apitanga, ‘o ne pehē, Ko hai ‘oku ‘i he fa‘ahi ‘a Sihova? Ha‘u ia kiate au, pea na‘e fakataha kiate ia ‘a ha‘a Līvai kātoa.

²⁷Pea ne pehē kiate kinautolu, Ko eni ‘a e folofola ‘a Sihova, ko e ‘Otua ‘o ‘Isileli, Ke takitaha tau ‘ene heletā ‘i hono kongaloto, ‘o fe‘alu‘aki mei he matanikolo ki he matanikolo, pea ‘ilonga hao tokoua, pe kaume‘a, pe kaungā‘api ‘oku ke ‘ilo ki ai, ke ke tāmate‘i.

²⁸Pea na‘e fai ‘e ha‘a Līvai, ‘o hangē ko e lea ‘a Mōsese, pea na‘e tō ‘i he ‘aho ko ia ‘a e toko tolu afe nai ‘i he kakai, ko e kau tangata.

²⁹Pea pehē ‘e Mōsese, Fakanofo kimoutolu[37] he ‘aho ni ke nofo kia Sihova, takitaha ‘aki hono foha mo hono tokoua; ke ne hifo mai ‘anai ha tāpuaki kiate kimoutolu.

³⁰Pea pongipongi hake na‘e lea ‘a Mōsese ki he kakai, ‘o pehē, Kuo mou fai angahala lahi: ka ko eni te u ‘alu hake kia Sihova; hei‘ilo te u lava ha fakalalo ma‘a ho‘omou angahala.

³¹Pea na‘e foki ‘a Mōsese ki he ‘Eiki, ‘o ne pehē, ‘Oi! kuo fai ‘e he kakai ‘a e fu‘u angahala ni, pea kuo nau ngaohi hanau ‘otua koula.

³²Ka ko eni, ka lelei ki he ‘Afiona ke fakamolemole ‘enau angahala — pea ka ‘ikai, ke ke tāmate‘i mu‘a au mei he tohi kuo ke fai.

³³Pea folofola ‘a Sihova kia Mōsese, Ko ia kuo angahala kiate au, ko ia ia te u tāmate‘i mei he‘eku tohi.

³⁴Pea ko eni, ke ke tu‘u ‘o taki ‘a e kakai ki he me‘a na‘a ku lea ai kiate koe; vakai, ko ‘eku ‘Āngelo te ne takimu‘a kiate koe: ka ‘i he ‘aho ‘o ‘eku ‘eke, te u ‘eke ‘enau angahala kiate kinautolu.

³⁵Pea na‘e taa‘i ‘e Sihova ‘a e kakai, koe‘uhi ko ‘enau ngaohi ‘a e kafi na‘e ngaohi ‘e ‘Ēlone.