Read KO E TOH TAPU KATOA TONGA KO ‘EKISOTO 33 Bible Online

KO ‘EKISOTO 33 - KO E TOH TAPU KATOA TONGA bible

KO ‘EKISOTO 33

¹PEA folofola ‘a Sihova kia Mōsese, Tu‘u, hiki mei heni, ‘a koe mo e kakai kuo ke ‘ohake mei ‘Isipite, ‘o ‘alu ki he fonua ‘a ia na‘a ku fuakava ai kia ‘Epalahame, ‘Aisake, mo Sēkope, ‘o pehē, Te u foaki ia ki ho hako:

²pea te u tuku atu ha ‘āngelo ke taki ho‘omou ‘alu; (pea te u kapusi ‘a ha‘a Kēnani, mo ha‘a ‘Āmoli, mo ha‘a Heti, mo ha‘a Pēlisi, ‘a ha‘a Hevi, mo ha‘a Siepusi)

³‘o a‘u ki he fonua ‘oku mahutafea ‘i he hu‘akau mo e honi: ka ‘e ‘ikai te u ‘alu hake au ‘i ho lotolotonga, he ko e kakai kia kekeva koe; na‘a ‘iloange te u faka‘auha koe ‘i he hala.

⁴Pea ‘i he fanongo ‘a e kakai ki he ongoongo kovi ko ia, na‘a nau fetāngihi, pea na‘e ‘ikai ‘ai ‘e ha taha ‘ene teunga.

⁵Pea folofola ‘a Sihova kia Mōsese, Lea ki ha‘a ‘Isileli, ‘o pehē, Ko e kia kekeva kimoutolu: kapau te u ‘alu ‘i homou lotolotonga ko ha mōmeniti ‘e taha, te u faka‘auha koe: pea ko eni, hu‘ihu‘i ho‘o teunga, ka u vakai pe ko e hā te u fai kiate koe.

⁶Pea na‘e vete ‘e ha‘a ‘Isileli ‘enau teunga mei he mo‘unga ko Hōlepi, ‘o fai atu.

⁷Pea ko e anga ‘o Mōsese ke ‘ave ‘a e tēniti, ‘o fokotu‘u ‘i tu‘a ‘apitanga ‘o mama‘o atu; pea na‘a ne ui ia ko e Tēniti Fe‘iloaki‘anga. Pea ka pehē, pea ‘ilonga ha taha na‘e kumi kia Sihova, na‘a ne ‘alu atu ki he Tēniti Fe‘iloaki‘anga, ‘a ia na‘e ‘i he tu‘a ‘apitanga.

⁸Pea ka faifai pea me‘a ange ‘a Mōsese, ko e ‘alu ki he Tēniti, na‘e mālanga ki ‘olunga ‘a e kakai, ‘o tu‘u takitaha ‘i hono mata tēniti, ‘o mo‘u sio atu kia Mōsese, ‘o a‘u ki he‘ene hū ki he Tēniti.

⁹Pea ka hū leva ‘a Mōsese ki he Tēniti, na‘e ‘alu hifo ‘a e Pou-‘ao ‘o tu‘u ‘i he mata tēniti, ‘o alea mo Mōsese.

¹⁰Pea ka sio ‘e he kakai kotoa ki he tu‘u ‘a e Pou-‘ao ‘i he mata Tēniti, na‘a nau tutu‘u kotoa pē ‘o lotu, takitaha ‘i hono mata tēniti.

¹¹Pea ko e fefolofolai ‘a e ‘Eiki mo Mōsese na‘e fai ko e femātaaki, ‘o hangē ko e talanoa ‘a ha tangata mo hono kaume‘a. Pea na‘e foki ia ki he ‘apitanga, ka ko hono tauhi ko Siosiua ko e foha ‘o Nuni, ko e talavou, na‘e ‘ikai mahu‘i ia mei he Tēniti.

¹²Pea fakatau folofola ‘a Mōsese kia Sihova, ‘o pehē; Vakai, kuo ke me‘a mai, ‘o pehē, Ke ke ‘ohake ‘a e kakai ni; ka kuo ‘ikai te ke fakahā mai pe ko hai te ke fekau ke ‘alu mo au: ka kuo ke folofola mai, ‘o pehē, ‘Oku ou ‘ilo ho hingoa, pea ‘oku ou lelei‘ia ‘iate koe.

¹³Pea ko eni, kapau mo‘oni kuo u ta‘imālie ‘ofa ‘i ho ‘ao, ke ke faka‘ilo mai mu‘a ho hala, ke u ‘ilo‘i koe; koe‘uhi ā ke u fakahōifua ‘a e ‘Afiona: ke ke me‘a foki ko e pule‘anga ni ko ho‘o kakai.

¹⁴Pea folofola mai ‘e ia, Ko hoku Fōtunga ‘e ‘alu mo koe, pea te u fakamālōlō koe.

¹⁵Pea ne fakatau folofola ange, Kapau ‘e ‘ikai ‘alu mo kimautolu ho Fōtunga, ‘oua ‘e ‘ohake kinautolu ‘i heni.

¹⁶He ko e hā ‘e ‘ilo ai kuo hōifua ‘a e ‘Afiona kiate au, ‘a au mo ho‘o kakai? ‘ikai ko ‘etau ō pē? ‘A ē ‘oku mavahe ai kimautolu, ‘a au mo ho‘o kakai, mei he ngaahi fa‘ahinga kotoa pē ‘oku ‘i he funga ‘o e kelekele.

¹⁷Pea folofola ‘a Sihova kia Mōsese, Te u fai mo e me‘a ko ia foki, ‘a ia kuo ke lea ki ai; he kuo u lelei‘ia ‘iate koe, pea ‘oku ou ‘ilo ho hingoa.

¹⁸Pea pehē ‘e ia, ‘Oku ou kole, ke ke fakahā mai ho lāngilangi.

¹⁹Pea ne folofola mai, Te u fakaholo atu ‘i ho ‘ao ‘a hoku ngaahi lelei kotoa pē; pea te u ‘a‘au kiate koe ‘a e hingoa ‘o e ‘Eiki; pea te u ‘ofa kiate ia ‘a ia te u ‘ofa ki ai, pea te u fakamolemole ‘a ia te u fakamolemolea.

²⁰Pea folofola mai ia, ‘E ‘ikai te ke lava ke sio ki hoku mata; he ‘oku ‘ikai ha tangata te ne sio ki hoku mata, pea mo‘ui.

²¹Pea folofola mai ‘a e ‘Eiki, Ko eni, ‘oku ai ha potu ofi mai; pea te ke tu‘u ‘i he funga makatu‘u:

²²pea ka faifai pea fakaholo atu hoku lāngilangi, te u ‘ai koe ki ha ava ‘o e makatu‘u, pea te u ‘ufi‘ufi koe ‘aki hoku ‘aofi nima, kae‘oua kuo u ‘alu atu;

²³pea te u toki to‘o hoku nima, pea te ke mamata ki hoku tu‘a: ka ko hoku mata e ‘ikai te ke sio ki ai.