Read KO E TOH TAPU KATOA TONGA KO ‘EKISOTO 34 Bible Online

KO ‘EKISOTO 34 - KO E TOH TAPU KATOA TONGA bible

KO ‘EKISOTO 34

¹PEA folofola ‘a e ‘Eiki kia Mōsese, Ke ke tā ha‘o ongo lau‘i maka, ‘o hangē ko e ‘uluaki: pea te u tohi ki he ongo maka ‘a e ngaahi lea na‘e tu‘u ‘i he ongo ‘uluaki maka, ‘a ia na‘a ke laiki.

²Pea ke fai ho‘o teu ki he ‘apongipongi, pea ke ‘alu hake ‘apongipongi ki he mo‘unga ko Sainai, ‘o tu‘u ai ‘i hoku ‘ao ‘i he funga mo‘unga.

³Ka ‘e ‘ikai ha tangata ‘e ‘alu hake mo koe, pea ‘e ‘ikai ha tangata ‘e ‘iloa ‘i he mo‘unga kotoa, pea na‘a mo e fanga manu iiki mo e fanga manu lalahi ka ‘e ‘ikai te nau kaikai ‘i he talalo ‘o e mo‘unga ko ia.

⁴Pea ne hanga ‘o tā ha ongo lau‘i maka ‘o hangē ko e ‘uluaki; pea tu‘u hengihengi hake ‘a Mōsese, ‘o ‘alu hake ki he mo‘unga ko Sainai ‘o hangē ko e tu‘utu‘uni ‘a e ‘Eiki kiate ia, pea na‘a ne to‘o ‘a e ongo makatohi.

⁵Pea hā‘ele hifo ‘a Sihova ‘i he ‘Ao, ‘o tu‘u fakataha mo ia ‘i he potu ko ē, ‘o ne kalanga ‘aki ‘a e huafa ‘o Sihova.[38]

⁶‘Io, na‘e hā‘ele ange ‘a e ‘Eiki ‘i hono ‘ao, ‘o ne folofola, Ko Sihova, ‘a Sihova ‘Otua, ‘Alo‘ofa mo Anga lelei, Tuai ki he Houhau, pea Fonu ‘i he Kelesi mo e Mo‘oni;

⁷‘oku ta‘ofi meesi ma‘a e ngaahi toko afe,[39] ‘oku ne fakamolemole ‘a e kovi mo e talangata‘a mo e angahala, ka ‘e ‘ikai ‘aupito te ne faka‘atā ‘a e halaia; ‘oku ne ‘eke ‘a e kovi ‘a e mātu‘a ki he fānau, mo e makapuna, ‘o a‘u ki he tolu mo e faa‘i to‘utangata.

⁸Pea fakavave ‘a Mōsese, ‘o ne punou ki he kelekele ‘o hū.

⁹Pea ne pehē, ‘Ēī, kapau leva kuo u ta‘imālie ‘ofa ‘i ho ‘ao, ke hā‘ele mu‘a ‘a e ‘Afiona ‘i homau lotolotonga; he ko e kakai kia kekeva ia; pea fakamolemolea ‘emau kovi mo ‘emau angahala, pea ke ma‘u ‘a kimautolu mo‘o tofi‘a.

¹⁰Pea folofola mai ‘e ia, Ko au eni ‘oku ou fai ‘eku fuakava: te u fai ‘i he ‘ao ‘o ho kakai kotoa ha ngaahi me‘a fakaofo, ‘a ia kuo te‘eki ke feia ‘i ha potu ‘e taha ‘o māmani, pe ‘i ha taha ‘o e ngaahi pule‘anga: pea ko e kakai kotoa ‘oku ke nofo ‘i honau lotolotonga te nau mamata ki he mafai ‘a e ‘Eiki; he ko e me‘a faka‘ulia ‘a ‘eta feangai ‘e fai.

¹¹Tokanga kiate koe ke tauhi ‘a e ngaahi tu‘utu‘uni ‘oku ou ‘atu he ‘aho ni; vakai, ko ‘eku kapusi ē mei ho ‘ao ‘a ha‘a ‘Āmoli, mo ha‘a Kēnani, mo ha‘a Heti, mo ha‘a Pēlisi, mo ha‘a Hevi, mo ha‘a Siepusi.

¹²Tokanga kiate koe na‘a ‘iloange te ke fai taliti mo e kakai ‘o e fonua ‘oku ke ‘alu ki ai, kae hoko ia ko e tauhele ‘i ho lotolotonga:

¹³ka te ke holoki honau ngaahi ‘ōlita, pea te ke laiki ‘enau ngaahi pou tapu, pea te ke tā ‘enau ngaahi ‘āsela.

¹⁴He ‘e ‘ikai te ke lotu ki ha ‘otua kehe; he ko e ‘Eiki, ‘a ia ko hono huafa ko Fua‘a, ko e ‘Otua fua‘a ia:

¹⁵na‘a ‘iloange te ke fai taliti mo e kakai ‘o e fonua, pea nau tango ange ki honau ngaahi ‘otua, ke fai feilaulau ki ai, pea tala kātoanga kiate koe, pea ke hanga ‘o kai mei he‘ene feilaulau;

¹⁶pea ke ‘omi honau ngaahi ‘ōfefine ke nonofo mo ho‘ou ngaahi foha, pea tango ange ‘e honau ngaahi ‘ōfefine ki honau ngaahi ‘otua, ‘o nau taki ho ngaahi foha ke tango ki honau ngaahi ‘otua.

¹⁷‘E ‘ikai te ke ngaohi hao ngaahi ‘otua ukamea.

¹⁸Te ke tauhi ‘a e kātoanga Tapu-lēvani. Ko ha fitu‘i ‘aho te ke kai me‘a ta‘elēvani, ‘o hangē ko ‘eku fekau, ‘i hono taimi tu‘utu‘uni, ‘i he māhina ko ‘Āpipi: he ko e māhina ko ‘Āpipi na‘a ke hū kitu‘a ai mei ‘Isipite.

¹⁹‘Ilonga ha ‘olopo‘ou ‘oku ‘a‘aku ia; pea pehē mo ho‘o fanga pulu mo ho‘o fanga sipi, kapau ko e tangata ‘a e ‘olopo‘ou.

²⁰Pea ko e ‘olopo‘ou ‘o e ‘asi te ke huhu‘i ‘aki ha lami: pea kapau ‘e ‘ikai te ke huhu‘i, te ke fesi‘i hono kia. Te ke huhu‘i ho ngaahi foha kotoa pē ‘oku ‘olopo‘ou. Pea ‘e ‘ikai tu‘u mola ha toko taha ‘i hoku ‘ao.

²¹Te ke ngāue ‘i he ‘aho ‘e ono, ka ‘i hono fitu ‘o e ‘aho te ke mālōlō: pe ko e tōta‘u, pe ko e ututa‘u, te ke mālōlō pē.

²²Pea te ke fai ‘a e Kātoanga Lauuike, ‘a e Polopolo Uite, pea mo e Kātoanga Ututa‘u ‘i he faka‘osi ‘o e ta‘u.

²³Tu‘o tolu ‘i he ta‘u ‘e fakahā kinautolu ‘e ho‘o kau tangata kotoa pē ‘i he ‘ao ‘o e ‘Afio ‘a Sihova ko e ‘Otua ‘o ‘Isileli,

²⁴he te u kapusi mei ho ‘ao ‘a e ngaahi pule‘anga, pea te u toloaki atu ho ngaahi kau‘ā: pea ‘e ‘ikai mānumanu ‘e ha taha ki ho kelekele, ‘oka ke ka ‘alu hake ke fakahā koe ‘i he ‘ao ‘o Sihova ko ho ‘Otua, ‘a e tu‘o tolu ‘i he ta‘u.

²⁵‘E ‘ikai te ke fono ‘aki ‘a e toto ‘o ‘eku feilaulau ha mā ta‘elēvani, pea ‘e ‘ikai ‘ahoia ‘a e feilaulau ‘o e kātoanga Pāsova.

²⁶Ko e fungani polopolo ‘o ho kelekele te ke ‘omi ki he fale ‘o Sihova ko ho ‘Otua. ‘E ‘ikai te ke haka ha ki‘i kosi ‘i he huhu‘a ‘o ‘ene fa‘ē.

²⁷Pea folofola ‘a Sihova kia Mōsese, Ke ke tohi ma‘au ‘a e ngaahi lea ko ia: he kuo u fai kovinānite mo koe mo ‘Isileli ‘i he funga ‘o e ngaahi lea ko ia.

²⁸Pea na‘a ne ‘i he potu ko ia mo e ‘Eiki ‘i he ‘aho ‘e fāngofulu mo e pō ‘e fāngofulu; na‘e ‘ikai te ne kai ai ha me‘akai, pe inu ha vai. Pea na‘a ne tohi ‘i he ongo maka tohi ‘a e ngaahi lea ‘o e kovinānite, ‘a e Fekau ‘e Hongofulu.

²⁹Pea ‘i he faifai pea ‘alu hifo ‘a Mōsese mei he mo‘unga ko Sainai, (na‘a ne ha‘u mo ia ‘i hono nima ‘a e ongo maka fakamo‘oni ‘i he‘ene ‘alu hifo mei he mo‘unga) na‘e ‘ikai ‘ilo ‘e Mōsese ‘oku tapa ‘a e kili ‘o hono fofonga, ko e me‘a ‘i he fefolofolai kuo fai.

³⁰Pea ‘i he mamata ‘e ‘Ēlone mo ha‘a ‘Isileli kātoa kia Mōsese, tā ‘oku tapa ‘a e kili ‘o hono fofonga; pea na‘a nau manavahē ke ‘unu‘unu kiate ia.

³¹Ka ka ui ange kinautolu ‘e Mōsese, pea na‘e toki foki kiate ia ‘a ‘Ēlone mo e hou‘eiki ‘o e Fakataha; pea na‘e alea ‘a Mōsese mo kinautolu.

³²Pea hili ia na‘e ‘unu‘unu mai ‘a ha‘a ‘Isileli kotoa; pea na‘a ne ‘a‘au kiate kinautolu ‘a e ngaahi tu‘utu‘uni kotoa pē kuo na fefolofolai ki ai mo e ‘Eiki ‘i he mo‘unga ko Sainai.

³³Pea ‘i he faka‘osi ‘e Mōsese ‘ene lea kiate kinautolu, na‘a ne ‘ai ha veili ki hono mata.

³⁴Ka ‘i he hū ‘a Mōsese ki he ‘ao ‘o e ‘Eiki ke fefolofolai mo ia, na‘a ne to‘o ‘a e veili kae‘oua ke ne hū kitu‘a. Pea ne hū kitu‘a, ‘o tala ki ha‘a ‘Isileli ‘a e me‘a kuo tu‘utu‘uni mai;

³⁵pea vakai ‘e ha‘a ‘Isileli ki he fofonga ‘o Mōsese, tā ‘oku huhulu ‘a e kili ‘o hono fofonga: ko ia na‘e toe ‘ai ‘e Mōsese ‘a e veili ki hono mata kae‘oua ke ne toe hū ke fefolofolai mo ia.