Read KO E TOH TAPU KATOA TONGA KO ‘EKISOTO 36 Bible Online

KO ‘EKISOTO 36 - KO E TOH TAPU KATOA TONGA bible

KO ‘EKISOTO 36

¹PEA ui ange ‘e Mōsese ‘a Pesalili mo ‘Aholiapi, mo kinautolu kotoa pē na‘e ‘atamai poto, ha taha kuo fakapoto‘i hono loto ‘e he ‘Eiki, pea na‘e o‘i ia ‘e hono loto ke ha‘u ke fai ‘a e ngāue.

²Pea na‘a nau to‘o ‘o ‘ave mei he ‘ao ‘o Mōsese ‘a e me‘a‘ofa kotoa, ‘a ia na‘e ‘omi ‘e ha‘a ‘Isileli ke fai‘aki ‘a e ngāue ‘o e Fale Tapu, mo ngaohi ia.

³Pea na‘e kei ‘omi ‘i he pongipongi kotoa pē ‘a e me‘a‘ofa kiate ia.

⁴Pea ko e kau poto na‘e fai ‘a e ngāue ‘o e Fale Tapu, na‘a nau ha‘u takitaha mei he ngāue na‘a ne fai;

⁵pea na‘a nau lea kia Mōsese, ‘o pehē, ‘Oku lahi fau ‘a e me‘a ‘oku ‘omi ‘e he kakai, pea ‘oku hulu atu ‘i he ngāue na‘e tu‘utu‘uni ‘e Sihova ke fai.

⁶Ko ia na‘e fekau ‘e Mōsese, pea na‘a nau fanongonongo ‘i he ‘apitanga, ‘o pehē, ‘A tangata mo fafine, ‘oua na‘a toe ngaohi ha me‘a ka foaki ki he Fale Tapu. Ko ia na‘e ta‘ofi ‘a e kakai mei he ‘omi me‘a.

⁷He ko e me‘a kuo ma‘u na‘e fe‘unga mo e fai ‘o e ngāue kotoa pē, ‘o hulu atu.

⁸Pea ‘ilonga ‘a kinautolu ‘i he kau ngāue na‘e poto na‘a nau ngāue ki ke Tāpanekale, ‘o nau ngaohi ia ‘aki ‘a e tupenu ‘e hongofulu; ko e vavae hinehina kuo filo, mo e lanu-langi, mo e kula-po‘upo‘uli, mo e kula-‘aho‘aho: na‘e hā ai ‘a e ngaahi selupimi ‘i he fai ‘a e tangata lalanga.

⁹Ko e lōloa ‘o e tupenu takitaha ko e kiupite ‘e uofulu mā valu, pea ko e māukupu ‘o e tupenu takitaha ko e kiupite ‘e fā: na‘e fua tatau pē ‘a e tupenu kotoa.

¹⁰Pea na‘a ne hokohoko ‘a e tupenu mo e tupenu ke matai-nima, pea ne hokohoko ‘a e tupenu mo e tupenu ke matai-nima.

¹¹Pea na‘a ne ngaohi ‘a e ngaahi kavei lanu langi ‘i he tapa ‘o e tupenu ‘e taha ‘i he taupotu ‘o e matai-nima, pea pehē ‘ene fai ‘i he tapa ‘o e tupenu taupotu ‘i he matai-nima ‘e taha.

¹²Ko e kavei ‘e nimangofulu na‘a ne ngaohi ‘i he tupenu ‘e taha, pea ne ngaohi mo e kavei ‘e nimangofulu ‘i he taupotu ‘o e tupenu ‘i he matai-nima ‘e taha: na‘e fakafeu‘utaki ‘a e ngaahi kavei.

¹³Pea na‘a ne ngaohi ha fakama‘u koula ‘e nimangofulu, ‘o ne fakahoko ‘aki ‘a e ngaahi fakama‘u ‘a e tupenu ko ē mo ē: pea ko ia na‘e hoko ‘o taha pē ‘a e Tāpanekale.

¹⁴Pea na‘a ne ngaohi tupenu fulufulu‘i kosi ki ha tēniti ke pulonga ‘aki ‘a e Tāpanekale: na‘a ne ngaohi ia ko e tupenu ‘e hongofulu mā taha.

¹⁵Ko e lōloa ‘o e tupenu ‘e taha ko e kiupite ‘e tolungofulu, pea ko e kiupite ‘e fā hono māukupu; na‘e fua tatau pē ‘a e tupenu ‘e hongofulu mā taha.

¹⁶Pea na‘a ne hoko ‘a e ngaahi tupenu ke matai-nima ē matai-ono ē.

¹⁷Pea na‘a ne ngaohi ha kavei ‘e nimangofulu ‘i he kapa ‘o e tupenu taupotu ‘i he matai-nima, mo e kavei ‘e nimangofulu ‘i he kapa ‘o e tupenu ‘i he matai-ono.

¹⁸Pea na‘a ne ngaohi ha fakama‘u kapa ‘e nimangofulu ke fakahoko ‘aki ‘a e tēniti ke taha pē.

¹⁹Pea na‘a ne ngaohi ha ‘u‘ufi ki he tēniti ‘aki ‘a e ngaahi kili‘i sipi tangata kuo fakalanukula, mo ha fakatefisi ‘aki ‘a e ngaahi kili‘i tutu‘u.

²⁰Pea ne ngaohi ‘a e holisi ‘o e Tāpanekale ‘aki ‘a e papa sitimi, ‘o fokotutu‘u.

²¹Ko e lōloa ‘o e papa ‘e taha ko e kiupite ‘e hongofulu, pea ko e kiupite mo e haafe ‘a e māukupu ‘o e papa.

²²Na‘e ai ha ongo ‘elelo ‘e ua ‘i he papa ‘e taha, ‘o fakahoko ‘a e taha mo e taha: na‘e pehē ‘ene fai ki he ngaahi laupapa kotoa pē ‘o e Tāpanekale.

²³‘Io, na‘a ne ngaohi ‘a e holisi ‘o e Tāpanekale; ko e papa ‘e uofulu ki he fa‘ahi ki Tonga (‘a e fakato‘omata‘u):

²⁴pea ne ngaohi ha tu‘unga siliva ‘e fāngofulu ke tu‘u ‘i he lalo uofulu‘i papa: ko e tu‘unga ‘e ua ‘i he lalo papa ko ē, ki he ongo ‘elelo ‘o‘ona, mo e tu‘unga ‘e ua ki he lalo papa ko ē ki he ongo ‘elelo ‘o‘ona.

²⁵Pea ki he tafa‘aki ko ē ‘o e Tāpanekale, ‘a e fa‘ahi ki tokelau, na‘a ne ngaohi ha papa ‘e uofulu, mo honau tu‘unga siliva ‘e fāngofulu;

²⁶ko e tu‘unga ‘e ua ki he lalo papa ko ē, mo e tu‘unga ‘e ua ki he lalo papa ko ē.

²⁷Pea ki he tā ‘o e Tāpanekale ki lulunga na‘a ne ngaohi ha papa ‘e ono.

²⁸Pea na‘a ne ngaohi ha ongo papa ki he ngaahi tuliki ‘o e Tāpanekale ‘i he ongo tā.

²⁹Pea na‘a na pikiua ‘i lalo, pea ne fakataha kinaua ‘i ‘olunga ‘i he ‘uluaki kavei: na‘a ne fai pehē ki he ua ko ē foki; ko e me‘a ia ki he ongo tuliki.

³⁰Ko ia na‘e valu ‘a e ngaahi papa, pea ko honau ngaahi tu‘unga siliva ko e tu‘unga ‘e hongofulu mā ono; ko e tu‘unga ‘e ua ki he lalo papa ko ē, mo e tu‘unga ‘e ua ki he lalo papa ko ē.

³¹Pea na‘a ne ngaohi kiato ‘aki ‘a e ‘akau sitimi; ko e nima ki he ‘ū papa ‘o e fa‘ahi Tāpanekale ko ē,

³²pea mo e kiato ‘e nima ki he ‘ū papa ‘o e fa‘ahi Tāpanekale ko ē, pea mo e kiato ‘e nima ki he ‘ū papa ‘o e tā ‘o e Tāpanekale ki lulunga.

³³Pea na‘a ne ngaohi ‘a e kiato loto ke a‘u mei potu ki potu ‘i he loto ‘ū laupapa.

³⁴Pea na‘a ne ‘u‘ufi ‘a e ngaahi laupapa ‘aki ‘a e koula, pea ko honau ngaahi kavei na‘a ne ngaohi koula pē, ke velo ai ‘a e ngaahi kiato, pea na‘a ne ‘u‘ufi koula ‘a e ngaahi kiato.

³⁵Pea na‘a ne ngaohi ‘a e Tatau ‘aki ‘a e lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo: na‘a ne ngaohi ia ke hā ai ha ngaahi selupimi ‘i he lalanga.

³⁶Pea na‘a ne ngaohi ki ai ha pou sitimi ‘e fā, pea ne ‘u‘ufi koula ia: pea na‘e koula mo honau ngaahi tautau‘anga; pea na‘a ne haka ki ai ha tu‘unga siliva ‘e fā.

³⁷Pea na‘a ne ngaohi ha puipui ki he mata tēniti ‘aki ‘a e lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo, pea na‘e fai ai ha ngāue ‘a e tuitui poto;

³⁸ko hono pou ‘e nima foki mo honau ngaahi tautau‘anga; pea na‘a ne ‘ufi‘ufi koula ‘a e ngaahi ‘ulu‘i pou, mo honau ngaahi ‘akau fakakava: ka ko honau tu‘unga ‘e nima na‘e palasa.