Read KO E TOH TAPU KATOA TONGA KO ‘EKISOTO 6 Bible Online

KO ‘EKISOTO 6 - KO E TOH TAPU KATOA TONGA bible

KO ‘EKISOTO 6

¹PEA folofola ‘a Sihova kia Mōsese, Ko eni te ke mamata ki he me‘a te u fai kia Felo; he ko e tā mamafa ‘e tuku atu ai kimoutolu; ‘io, ‘i he tā mamafa te ne kapusi mei he fonua.

²Pea folofola ‘a e ‘Otua kia Mōsese, ‘o ne pehē kiate ia, Ko Sihova au.

³Na‘a ku hā kia ‘Epalahame mo ‘Aisake mo Sēkope ko e ‘Otua ko SĀTAI, ka ‘i hoku hingoa ko SIHOVA na‘e ‘ikai te nau maheni mo au.[8]

⁴Pea ne u fokotu‘u foki ‘eku fuakava mo kinautolu, ke ‘ange kiate kinautolu ‘a e fonua ko Kēnani, ‘a e fonua ‘o ‘enau nofo pilikimi, ‘a ia na‘a nau nofo ‘āunofo ai.

⁵Kae‘uma‘ā foki kuo u ongo‘i ‘a e to‘e ‘a ha‘a ‘Isileli, ‘a ia ‘oku fakapōpula‘i ‘e he kau ‘Isipite; pea kuo u manatu ‘eku fuakava.

⁶Ko ia ke ke lea ki ha‘a ‘Isileli, ‘o pehē, Ko Sihova au, pea te u hamusi kimoutolu mei he ngaahi kavenga ‘a e kau ‘Isipite, pea te u fakahaofi kimoutolu mei he‘enau fakapōpula‘i, pea te u huhu‘i kimoutolu ‘aki ‘a e nima kuo hiki tā, mo e ngaahi tautea lahi:

⁷pea te u to‘o kimoutolu mo‘oku kakai, pea te u nofo ko homou ‘Otua: pea te mou ‘ilo ko Sihova au ko homou ‘Otua, ‘a ia ‘oku ne hamusi kimoutolu mei he ngaahi kavenga ‘a e kakai ‘Isipite.

⁸Pea te u ‘ohake kimoutolu ki he fonua, ‘a ia na‘a ku hiki ai hoku nima ke ‘ange ia kia ‘Epalahame mo ‘Aisake mo Sēkope; pea te u foaki ia mo‘omou tofi‘a: ko Sihova au.

⁹Pea na‘e lea pehē ‘a Mōsese ki ha‘a ‘Isileli, ka na‘e ‘ikai te nau tokanga kia Mōsese ko ‘enau lotosi‘i, pea mo e ongosia ‘i he fatongia.

¹⁰Pea folofola ‘a Sihova kia Mōsese, ‘o pehē,

¹¹‘Alu ‘o lea kia Felo ko e Tu‘i ‘Isipite, ke ne tukuange ‘a ha‘a ‘Isileli mei hono fonua.

¹²Pea fakatau folofola ‘e Mōsese kia Sihova ‘o pehē; Vakai, kuo ‘ikai tokanga kiate au ‘e ha‘a ‘Isileli; pea fēfē ‘a e tokanga ‘a Felo kiate au, ‘a au ko e loungutu ta‘ekamu?

¹³Pea folofola ‘a Sihova kia Mōsese mo ‘Ēlone, ‘o ne ‘ange ha tu‘utu‘uni ki ha‘a ‘Isileli, pea mo Felo ko e Tu‘i ‘Isipite, ke ‘omi kitu‘a ‘a ha‘a ‘Isileli mei ‘Isipite.

¹⁴Ko eni ‘a e ngaahi ‘ulumotu‘a ‘o hona tupu‘anga: Ko e ngaahi foha ‘o Lūpeni ko e ‘uluaki foha ‘o ‘Isileli, ko ‘Īnoke, mo Falu, ko Heseloni mo Kālimi: ko eni ia ‘a e ngaahi fāmili ‘o Lūpeni.

¹⁵Pea ko e ngaahi foha ‘o Simione; ko ‘Iemueli, mo Siamini, mo ‘Ōhati, mo Siakini, mo Soha‘a, pea mo Saula ko e tama ‘a ha fefine Kēnani: ko eni ia ‘a e ngaahi fāmili ‘o Simione.

¹⁶Pea ko eni ‘a e ngaahi hingoa ‘o e ngaahi foha ‘o Līvai, ‘o fakatatau ki honau tohi hohoko; ko Kēsoni, mo Kōhate, mo Mēlali. Pea ko e ngaahi ta‘u ‘o e mo‘ui ‘a Līvai ko e ta‘u e teau mo e ta‘u ‘e tolungofulu mā fitu.

¹⁷Ko e ngaahi foha ‘o Kēsoni; ko Līpini, mo Simi ‘i he lau fāmili.

¹⁸Pea ko e ngaahi foha ‘o Kōhate; ko ‘Amilami, mo ‘Īsa‘a, mo Hepeloni, mo ‘Osieli: pea ko e ngaahi ta‘u ‘o e mo‘ui ‘a Kōhate ko e ta‘u ‘e teau mo e ta‘u ‘e tolungofulu mā tolu.

¹⁹Pea ko e ngaahi foha ‘o Mēlali; ko Māhali mo Musi: ko eni ia ‘a e ngaahi fāmili ‘o ha‘a Līvai, ‘o fakatatau ki honau tohi hohoko.

²⁰Pea mali ‘a ‘Amilami mo Siokapesi ko e tuofefine ‘o ‘ene tamai, pea ne fanau‘i kiate ia ‘a ‘Ēlone mo Mōsese; pea ko e ngaahi ta‘u ‘o e mo‘ui ‘a ‘Amilami ko e ta‘u ‘e teau mo e ta‘u ‘e tolungofulu mā fitu.

²¹Pea ko e ngaahi foha ‘o ‘Īsa‘a ko Kola, mo Nēfeki, mo Sikeli.

²²Pea ko e ngaahi foha ‘o ‘Osieli; ko Misaeli, mo ‘Elisafani mo Sīteli.

²³Pea mali ‘a ‘Ēlone mo ‘Elisepa ko e ‘ōfefine ‘o ‘Aminatape ko e tuofefine ‘o Na‘asoni, pea ne fanau‘i kiate ia ‘a Nātapi mo ‘Āpiu, ‘a ‘Eliesa mo ‘Ītama.

²⁴Pea ko e ngaahi foha ‘o Kola: ko ‘Āsili mo ‘Elikena mo ‘Apiesafe: ko eni ia ‘a e ngaahi fāmili ‘o ha‘a Kola.

²⁵Pea ko ‘Eliesa ko e foha ‘o ‘Ēlone na‘a ne ma‘u uaifi mei he fānau fefine ‘a Putieli; pea ne fanau‘i kiate ia ‘a Finiasi: ko eni ia ‘a e ngaahi ‘ulumotu‘a ‘o ha‘a Līvai ‘i he lau fa‘ahinga.

²⁶Ko eni ‘a e Mōsese mo ‘Ēlone ko ia, ‘a ia na‘e folofola ki ai ‘a Sihova ‘o pehē, Mo ‘omi kitu‘a ‘a ha‘a ‘Isileli mei he fonua ko ‘Isipite ‘i honau ngaahi matatau.

²⁷Ko kinaua ia na‘e lea kia Felo ko e Tu‘i ‘Isipite, ke tuku atu ‘a ha‘a ‘Isileli mei ‘Isipite; ko Mōsese mo ‘Ēlone ia.

²⁸Pea ko eni, ‘i he ‘aho na‘e folofola ai ‘a Sihova kia Mōsese ‘i he fonua ‘o ‘Isipite,

²⁹tokua na‘e folofola ‘e Sihova kiate ia ‘o pehē, Ko Sihova au, ke ke lea kia Felo koe Tu‘i ‘Isipite ‘a e me‘a kotoa pē te u fakahā kiate koe.

³⁰Pea fakatau folofola ‘e Mōsese kia Sihova ‘o pehē; Vakai, ko e loungutu ta‘ekamu au, pea ‘e fakaongo fēfē ‘a Felo kiate au?