Read KO E TOH TAPU KATOA TONGA KO ‘EKISOTO 7 Bible Online

KO ‘EKISOTO 7 - KO E TOH TAPU KATOA TONGA bible

KO ‘EKISOTO 7

¹PEA folofola ‘a Sihova kia Mōsese; Vakai, kuo u ngaohi koe ko e ‘Otua kia Felo, pea ko ‘Ēlone ko ho tokoua ko ho palōfita ia.

²Ko koe te ke tala ‘a e ngaahi me‘a kehekehe te u tu‘utu‘uni atu, pea ko ‘Ēlone ko ho tokoua te ne fakahā kia Felo ke ne tuku atu ‘a ha‘a ‘Isileli mei hono fonua.

³Pea ko au te u fakafefeka ‘a e loto ‘o Felo, pea te u ‘ai ke lahi ‘eku ngaahi faka‘ilonga mo ‘eku ngaahi mana ‘i he fonua ko ‘Isipite.

⁴Pea ‘e ‘ikai tokanga ‘a Felo kiate kimoua, pea te u ‘ai hoku nima ki ‘Isipite, pea u ‘omi kitu‘a ‘a e ngaahi kongakau ‘o hoku kakai ko ha‘a ‘Isileli ‘aki ‘a e ngaahi tautea lahi.

⁵Pea ‘e ‘ilo ‘e he kakai ‘Isipite ko Sihova au, ‘oka u ka hiki hoku nima ki ‘Isipite, ‘o ‘omi ‘a ha‘a ‘Isileli mei honau lotolotonga.

⁶Pea na‘e fai ‘e Mōsese mo ‘Ēlone ‘o hangē ko e tu‘utu‘uni ‘a Sihova kiate kinaua, na‘e pehē ‘ena fai.

⁷Pea kuo valungofulu ta‘u ‘a Mōsese, pea valungofulu mā tolu ta‘u ‘a ‘Ēlone, ‘i he‘ena fakatau folofola kia Felo.

⁸Pea folofola ‘a Sihova kia Mōsese mo ‘Ēlone, ‘o pehē,

⁹Ka lea mai ‘a Felo kiate kimoua ‘o pehē, Fai ha mana ma‘amoua; pea te ke pehē kia ‘Ēlone, To‘o ho tokotoko, ‘o sī atu ia ‘i he ‘ao ‘o Felo: ‘e hoko ia ko e ngata.

¹⁰Pea hū atu ‘a Mōsese mo ‘Ēlone kia Felo, pea na fai ‘o hangē ko e tu‘utu‘uni ‘a Sihova; pea na‘e sī atu ‘e ‘Ēlone hono tokotoko ‘i he ‘ao ‘o Felo mo ‘ene kau tamaio‘eiki, pea na‘e hoko ia ko e ngata.

¹¹Pea ui mai ‘e Felo foki ‘a e kau poto mo e kau fai tuki, pea na‘e lava ‘a e me‘a ko ia ‘e he kau maki ‘o ‘Isipite foki ‘aki ‘enau ngaahi tō‘onga fakalou‘akau.

¹²He na‘a nau takitaha sī atu hono tokotoko, ‘o nau hoko ko e ngaahi ngata: ka na‘e folo hifo ‘e he tokotoko ‘o ‘Ēlone ‘a e ngaahi tokotoko ‘onautolu.

¹³Ka na‘e fakafefeka ‘a e loto ‘o Felo, pea na‘e ‘ikai te ne tokanga kiate kinaua; ‘o hangē ko e me‘a na‘e fakahā ‘e Sihova.

¹⁴Pea folofola ‘a Sihova kia Mōsese, ‘o pehē, ‘Oku taiki ‘a e loto ‘o Felo ke tukuange ‘a e kakai.

¹⁵‘Alu kia Felo ‘apongipongi; vakai, ‘oku ne ‘alu atu ki he vai; pea te ke tu‘u ‘i he ngutu vaitafe ke fakafetaulaki kiate ia; pea ko e tokotoko na‘e liliu ko e ngata te ke ‘alu mo koe.

¹⁶Pea te ke lea kiate ia ‘o pehē, Ko Sihova ko e ‘Otua ‘o ha‘a Hepelū kuo ne fekau au kiate koe. Ko ‘ene folofola mai, Ke ke tukuange hoku kakai ke nau tauhi kiate au ‘i he Toafa: pea ko eni kuo te‘eki te ke tokanga ki ai.

¹⁷Ko e folofola eni ‘a Sihova, Ko e me‘a ko eni te ke ‘ilo ai ko Sihova au: vakai ko ‘eku taa‘i eni ‘aki ‘a e tokotoko ‘oku ‘i hoku nima ni ‘a e vai ‘o e vaitafe; pea ‘e liliu ke toto.

¹⁸Pea ‘e mate ‘a e ika ‘oku ‘i he vaitafe, pea ‘e ‘elo ‘a e vaitafe; pea ‘e ongosia ‘a e kakai ‘Isipite ‘i he fie inu ki he vai ‘o e vaitafe.

¹⁹Pea folofola ‘a Sihova kia Mōsese, Ke ke lea kia ‘Ēlone, ‘o pehē, To‘o ho tokotoko, pea mafao atu ho nima ki he ngaahi vai ‘o ‘Isipite, ki honau ngaahi vaitafe, ki honau ngaahi manga‘i vai mo e ngaahi anovai, mo honau ngaahi tokanga vai kotoa pē; pea te nau hoko ‘o toto; pea ‘e toto ‘a e vai ‘i he fonua kotoa ‘o ‘Isipite ‘i he ngaahi ipu ‘akau mo e ngaahi ipu maka.

²⁰Pea na‘e fai pehē ‘e Mōsese mo ‘Ēlone, ‘o hangē ko e tu‘utu‘uni ‘a Sihova; pea na‘a ne ofa‘aki ‘a e tokotoko, ‘o taa‘i ‘a e vai ‘o e vaitafe ‘i he ‘ao ‘o Felo pea mo ‘ene kau tamaio‘eiki, pea na‘e liliu kotoa ‘a e vai ‘o e vaitafe ke toto.

²¹Pea na‘e mate ai ‘a e ika na‘e ‘i ai, pea na‘e ‘elo ‘a e vaitafe, pea na‘e ‘ikai lava ‘a e kakai ‘Isipite ke inu mei he vaitafe, pea ko e toto ko ia na‘e ‘i he fonua kotoa ‘o ‘Isipite.

²²Pea na‘e fai pehē foki ‘a e kau maki ‘o ‘Isipite ‘aki ‘enau ngaahi tō‘onga fakalou‘akau; pea na‘e fakafefeka ‘a e loto ‘o Felo, pea na‘e ‘ikai te ne tokanga kiate kinaua, ‘o hangē ko e me‘a na‘e fakahā ‘e Sihova.

²³Pea tafoki ange ‘a Felo, ‘o hū ki hono fale, pea na‘e ‘ikai te ne ‘ai ki hono loto ‘a e me‘a ni foki.

²⁴Pea na‘e keli holo ‘e he kakai ‘Isipite kotoa pē ‘i he ve‘e vaitafe ke ma‘u ha vai ke inu; he na‘e ‘ikai te nau lava ke inu ‘a e vai ‘o e vaitafe.

²⁵Pea na‘e kakato ha ‘aho ‘e fitu hili hono taa‘i ‘o e vaitafe ‘e Sihova.