Read KO E TOH TAPU KATOA TONGA KO ‘EKISOTO 8 Bible Online

KO ‘EKISOTO 8 - KO E TOH TAPU KATOA TONGA bible

KO ‘EKISOTO 8

¹PEA folofola ‘a Sihova kia Mōsese, Hū atu kia Felo, ‘o lea kiate ia, ‘o pehē, Ko eni ‘a e lea ‘a Sihova, Tukuange hoku kakai ke nau tauhi kiate au.

²Pea kapau te ke fakafisi ke tukuange, ko eni, te u taa‘i ho ngaahi feitu‘u kotoa pē ‘aki ‘a e fanga poto;

³pea ‘e nga‘uta ‘a e vaitafe ‘i he fanga poto, pea te nau ‘alu hake ‘o hū ki ho fale, mo ho fale mohe, pea ki ho mohenga, pea ki he fale ‘o ho‘o kau tamaio‘eiki, pea ki ho kakai, pea ki ho‘o ngaahi ngoto‘umu, pea ki ho ngaahi natu‘anga mā;

⁴‘io, ‘e ‘alu hake ‘a e fanga poto kiate koe mo ho kakai mo ho‘o kau tamaio‘eiki kotoa pē.

⁵Pea na‘e folofola ‘a Sihova kia Mōsese, Ke ke lea kia ‘Ēlone, ‘o pehē, Mafao atu ho nima mo ho tokotoko ki he ngaahi vaitafe, ki he ngaahi manga‘i vai pea mo e ngaahi ano, ‘o ‘ai ke ‘alu hake ‘a e fanga poto ki he fonua ‘o ‘Isipite.

⁶Pea na‘e mafao atu ‘e ‘Ēlone hono nima ki he ngaahi vaitafe ‘o ‘Isipite; pea na‘e ‘alu hake ‘a e fanga poto, ‘o ‘ufi‘ufi ‘a e fonua ‘o ‘Isipite.

⁷Pea na‘e fai pehē foki ‘e he kau maki ‘aki ‘enau ngaahi tō‘onga fakalou‘akau; pea na‘e ‘alu hake ‘a e fanga poto ki he funga fonua ‘o ‘Isipite.

⁸Pea ui mai ‘e Felo ‘a Mōsese mo ‘Ēlone, ‘o ne pehē, Mo hūfia kia Sihova ke ‘ave ‘a e fanga poto meiate au mo hoku kakai; pea te u tukuange ‘a e kakai ke nau feilaulau kia Sihova.

⁹Pea lea ‘a Mōsese kia Felo, Fa‘iteliha kiate au: ko e taimi fē te u hūfia ma‘au mo ho‘o kau tamaio‘eiki mo ho kakai, ke faka‘auha ‘a e fanga poto meiate koe mo ho ngaahi fale, ‘o nau toe ‘i he vaitafe pē?

¹⁰Pea folofola ‘e ia, ‘Apongipongi. Pea ne tali, ‘E fai pē ki ho‘o me‘a, koe‘uhi ke ke ‘ilo ‘oku ‘ikai ha taha ‘oku tatau mo Sihova ko homau ‘Otua.

¹¹Pea ‘e hiki ‘a e fanga poto meiate koe, pea mo ho ngaahi fale, pea mei ho‘o kau tamaio‘eiki, pea mei ho kakai; ngata pē ‘i he vaitafe te nau toe ki ai.

¹²Pea na‘e hū kitu‘a ‘a Mōsese mo ‘Ēlone meia Felo, pea na‘e tautapa ‘a Mōsese kia Sihova koe‘uhi ko e fanga poto, ‘a ia kuo ne ‘omi kia Felo.

¹³Pea na‘e fai ‘e Sihova ki he lea ‘a Mōsese, pea na‘e mate ‘a e fanga poto mei he ngaahi fale, mei he ngaahi vilisi, pea mei he ngaahi ngoue‘anga.

¹⁴Pea na‘a nau tānaki ‘o fokotu‘utu‘u; pea na‘e ‘elo ‘a e fonua.

¹⁵Ka ‘i he vakai ‘e Felo ‘oku nongononga, na‘a ne fakafefeka hono loto, pea na‘e ‘ikai te ne tokanga kiate kinaua; ‘o hangē ko e me‘a na‘e fakahā ‘e Sihova.

¹⁶Pea folofola ‘a Sihova kia Mōsese, Lea kia ‘Ēlone ‘o pehē, Ke ke ofa ho tokotoko, ‘o taa‘i ‘a e efu ‘o e fonua, pea ‘e hoko ia ko e namu[9] ‘i he ngaahi feitu‘u kotoa ‘o ‘Isipite.

¹⁷Pea na‘a na fai pehē, pea na‘e ofa ‘e ‘Ēlone hono nima mo e tokotoko, ‘o ne taa‘i ‘a e efu ‘o e fonua, pea na‘e hoko ‘a e namu ki he tangata mo e manu; na‘e hoko ‘a e efu kotoa ‘o e fonua ko e namu ‘i he feitu‘u kotoa pē ‘o ‘Isipite.

¹⁸Pea na‘e fai pehē ‘e he kau maki ‘aki ‘enau ngaahi tō‘onga fakalou‘akau ke ‘omi ‘a e namu, ka na‘e ‘ikai te nau lava; pea na‘e tō ‘a e namu ki he tangata mo e manu.

¹⁹Pea na‘e pehē ‘a e kau maki kia Felo, Ko e tuhu ‘o e ‘Otua eni: ka na‘e fakafefeka ‘a e loto ‘o Felo, pea na‘e ‘ikai te ne tokanga kiate kinaua, ‘o tatau mo e me‘a na‘e fakahā ‘e Sihova.

²⁰Pea folofola ‘a Sihova kia Mōsese, Te ke ‘ā hengihengi, ‘o ke ‘alu ‘o tu‘u ‘i he ‘ao ‘o Felo; he vakai ‘oku ne teu hā‘ele atu ki he vai; pea te ke lea kiate ia ‘o pehē, Ko eni ‘a e folofola ‘a Sihova, Tukuange hoku kakai ke nau tauhi kiate au.

²¹He kapau ‘e ‘ikai te ke tukuange hoku kakai, ko eni, te u tuku atu kiate koe, pea ki ho‘o kau tamaio‘eiki, pea ki ho kakai, pea ki ho ngaahi fale, ‘a e mongomonga:[10] pea ‘e fonu ‘a e ngaahi fale ‘o e kau ‘Isipite ‘i he mongomonga, kae‘uma‘ā ‘a e kelekele ‘oku nau ‘i ai.

²²Ka te u vahe‘i ‘i he ‘aho ko ia ‘a e fonua ‘o Kōseni, ‘a ia ‘oku nofo ai hoku kakai, ke ‘oua na‘a ‘i ai ha mongomonga; koe‘uhi ke ke ‘ilo ko Sihova ai pē au ‘i he loto fonua ni.

²³Pea te u ‘ai ‘a e fakamo‘ui[11] ‘i he vaha‘a ‘o hoku kakai mo ho kakai: ko e ‘apongipongi ‘e hoko ‘a e faka‘ilonga ni.

²⁴Pea na‘e fai pehē ‘e Sihova, pea na‘e ha‘u ha fu‘u fanga mongomonga e ki he fale ‘o Felo, mo e fale ‘o ‘ene kau tamaio‘eiki, ki he ngaahi feitu‘u kotoa pē ‘o ‘Isipite; na‘e maumau ‘a e fonua ‘i he mongomonga.

²⁵Pea ui ange ‘e Felo ‘a Mōsese mo ‘Ēlone, ‘o ne pehē, ‘Alu pē ‘o feilaulau ki homou ‘Otua ‘i he fonua.

²⁶Pea pehē ‘e Mōsese, ‘Oku ‘ikai ko ia kuo tu‘utu‘uni, he ko e me‘a tapu ‘a e kakai ‘Isipite te mau feilaulau ‘aki kia Sihova ko homau ‘Otua. Te mau feilaulau ‘aki koā ‘a e me‘a tapu ‘a e kakai ‘Isipite ‘i honau ‘ao? ‘ikai te nau tolongi kimautolu?

²⁷Te mau ‘alu ki he Toafa ko e vā‘ihala ‘o e ‘aho ‘e tolu, pea mau feilaulau ai kia Sihova ko homau ‘Otua, ‘o hangē ko ia te ne toki folofola mai.

²⁸Pea tali ‘e Felo, Te u tuku kimoutolu ke ‘alu ‘o feilaulau kia Sihova ko homou ‘Otua ‘i he Toafa; ka ‘e ‘ikai te mau loko ‘alu mama‘o: mou hūfia au.

²⁹Pea tali ‘e Mōsese, Ko ‘eku ‘alu leva meiate koe, pea te u hū kia Sihova ke ne ‘ave ‘a e mongomonga mei he ‘Afiona, mei ho‘o kau tamaio‘eiki, pea mei ho kakai, ‘apongipongi: kae ‘oua na‘a toe fai kākā ‘e he ‘Afiona, ‘o ta‘etukuange ‘a e kakai ke ‘alu ‘o feilaulau kia Sihova.

³⁰Pea hū kitu‘a ‘a Mōsese meia Felo, ‘o ne lotu kia Sihova.

³¹Pea na‘e fai ‘e Sihova ki he lea ‘a Mōsese; ‘o ne ‘ave ‘a e mongomonga meia Felo mo ‘ene kau tamaio‘eiki mo hono kakai;

³²na‘e ‘ikai ke toe ha taha, ka ka fakafefeka ‘e Felo hono loto ‘i he taimi ko ia foki, pea na‘e ‘ikai te ne tukuange ‘a e kakai.