Read KO E TOH TAPU KATOA TONGA KO ‘EKISOTO 9 Bible Online

KO ‘EKISOTO 9 - KO E TOH TAPU KATOA TONGA bible

KO ‘EKISOTO 9

¹PEA folofola ‘a Sihova kia Mōsese, Hū atu kia Felo, pea ke lea kiate ia ‘o pehē, Ko eni ‘a e lea ‘a Sihova ko e ‘Otua ‘o ha‘a Hepelū, Tukuange hoku kakai ke nau tauhi kiate au.

²He kapau te ke fakafisi ki hono tukuange, ka ke kei puke pē ki ai.

³Ko eni ‘e ala ‘e Sihova ki ho‘o fanga manu ‘a ia ‘oku ‘i he vao, ki he fanga hoosi, ki he fanga ‘asi, ki he fanga kāmeli, ki he pulu mo e sipi; ko e mahaki faka‘auha lahi ‘aupito.

⁴Pea ‘e vahe‘i ‘e Sihova ‘a e fanga manu ‘a ‘Isileli mei he fanga manu ‘a e kau ‘Isipite; ‘e ‘ikai mate ha momo‘i me‘a ‘i he koloa ‘a ha‘a ‘Isileli.

⁵Pea na‘e tu‘utu‘uni ‘e Sihova ha taimi he‘ene pehē, Ko e ‘apongipongi ‘e fai ‘e Sihova ‘a e me‘a ko ia ‘i he fonua ni.

⁶Pea na‘e fai ‘e Sihova ‘a e me‘a ko ia ‘i he ‘apongipongi, pea na‘e mate kotoa pē ‘a e fanga manu ‘i ‘Isipite; ka ‘i he fanga manu ‘a ha‘a ‘Isileli na‘e ‘ikai mate ai ha taha.

⁷Pea fekau atu ‘e Felo ke vakai, pea tā ‘i he fanga manu ‘a ‘Isileli kuo ‘ikai mate ha momo‘i toko taha. Pea na‘e fakafefeka ‘a e loto ‘o Felo, pea na‘e ‘ikai te ne tukuange ‘a e kakai ke ‘alu.

⁸Pea folofola ‘a Sihova kia Mōsese mo ‘Ēlone, Hanga ‘o to‘o ‘a e ngaahi falukunga efuefu ‘o e fōnise, pea ke fakapuna ia ki langi ‘e Mōsese ‘i he ‘ao ‘o Felo.

⁹Pea ‘e hoko ia ko e efu valevale, ‘o tō ki he feitu‘u kotoa pē ‘o ‘Isipite, pea ‘e tō ki he tangata mo e manu, ‘o hoko ko e hangatāmaki ‘oku fuhifuhi; ‘e pehē ‘i he fonua kotoa ‘o ‘Isipite.

¹⁰Pea na‘a na to‘o ‘a e efuefu ‘o e fōnise, ‘o na tutu‘u ‘i he ‘ao ‘o Felo; pea na‘e fakapuna ia ‘e Mōsese ki langi, pea na‘e hoko ia ko e hangatāmaki fuhifuhi na‘e fisiki mai ‘i he tangata mo e manu.

¹¹Pea na‘e ‘ikai lava ‘e he kau maki ke tu‘u ‘i he ‘ao ‘o Mōsese koe‘uhi ko e hangatāmaki; he na‘e mo‘ua ‘a e kau maki ‘i he hangatāmaki, mo e kau ‘Isipite kotoa.

¹²Pea na‘e fakafefeka ‘e Sihova ‘a e loto ‘o Felo, pea na‘e ‘ikai te ne tokanga kiate kinaua; ‘o hangē ko ia na‘e fakahā ‘e Sihova kia Mōsese.

¹³Pea folofola ‘a Sihova kia Mōsese, Ke ke tu‘u hengihengi hake, pea ‘alu ‘o tu‘u ‘i he ‘ao ‘o Felo, pea ke lea kiate ‘ia ‘o pehē, Ko eni ‘a e lea ‘a Sihova ko e ‘Otua ‘o ha‘a Hepelū, Tukuange hoku kakai ke nau tauhi kiate au.

¹⁴He ko e taimi ko eni te u ‘ai atu ‘eku ngaahi tā kotoa pē ki ho loto, mo ho‘o kau tamaio‘eiki pea mo ho kakai; koe‘uhi ke ke ‘ilo ‘oku ‘ikai ha taha hangē ko au ‘i māmani kātoa.

¹⁵He ko eni na‘a ku mei mafao atu hoku nima, ‘o u taa‘i koe mo ho kakai ‘aki ‘a e mahaki faka‘auha, kae tu‘usi koe mei māmani.

¹⁶Ka koe‘uhi na‘a ku fokotu‘u koe ki he me‘a ko eni, ke u fakahā ‘iate koe hoku ivi, pea koe‘uhi ke ongoongoa hoku hingoa ‘i māmani kātoa.

¹⁷Tā ‘oku ke kei fakamofuta mai ki hoku kakai, ‘o ‘ikai te ke tukuange?

¹⁸Vakai, ‘i he taimi ni ‘apongipongi ‘e lolo hifo ha ‘uha maka mamafa ‘aupito, ‘a ia kuo te‘eki ha‘ane pehē ‘i ‘Isipite talu hono fokotu‘u ‘o a‘u mai.

¹⁹Pea ko ia ke ke fekau atu ke fakahū ho‘o fanga manu mo ho‘o me‘a kātoa ‘oku ‘i he vao; ‘ilonga ‘a e tangata mo e manu ‘e ‘iloa ‘i he vao, ‘o ‘ikai ‘omi ki ‘api, ‘e ‘alu hifo ki ai ‘a e ‘uha maka, pea te nau mate.

²⁰‘Ilonga ‘a ia ‘i he kau tamaio‘eiki ‘a Felo na‘a ne toka‘i ‘a e folofola ‘a Sihova na‘a ne fekau ke hola ki fale ‘ene kau tamaio‘eiki mo ‘ene fanga manu;

²¹pea ‘ilonga ‘a ia na‘e ‘ikai mamafa ki hono loto ‘a e folofola ‘a Sihova na‘a ne tuku ‘ene kau tamaio‘eiki mo ‘ene fanga manu ‘i he vao.

²²Pea folofola ‘a Sihova kia Mōsese, Mafao ho nima ki langi, pea ‘e hoko ha ‘uha maka ‘i he fonua kotoa ‘o ‘Isipite, ‘o tō ki he kelekele mo e manu mo e mohuku kotoa ‘o e vao ‘i he fonua kotoa ‘o ‘Isipite.

²³Pea mafao atu ‘e Mōsese hono tokotoko ki he langi; pea na‘e tuku mai ‘e Sihova ha fa‘a mana mo e ‘uha maka, pea lele holo ‘a e afi ‘i he kelekele; ‘io, na‘e faka‘uha hifo ‘e Sihova ‘a e ‘uha maka ki he fonua ko ‘Isipite.

²⁴Pea na‘e hoko mai ‘a e ‘uha maka, pea fiofio takainga afi ‘a e ‘uha maka, ko e me‘a lahi ‘aupito, te‘eki hano tatau ‘i ha feitu‘u ‘e taha ‘o ‘Isipite talu ‘ene hoko ko e kakai.

²⁵Pea na‘e taa‘i ‘e he ‘uha maka, ‘i he ngaahi feitu‘u ‘o ‘Isipite, ‘a e me‘a kātoa na‘e ‘i he vao, ‘o fai mei he tangata ki he manu; pea ko e mohuku kotoa pē ‘o e vao na‘e te‘ia ‘e he ‘uha maka, ‘o ne fesi‘i ‘a e ‘akau kotoa ‘o e vao.

²⁶Ngata pē ‘i he fonua ko Kōseni, ‘a ia na‘e ‘i ai ‘a ha‘a ‘Isileli, na‘e ‘ikai ai ha ‘uha maka.

²⁷Pea fekau atu ‘e Felo ke ui mai ‘a Mōsese mo ‘Ēlone, ‘o ne pehē kiate kinaua, Tā kuo u angahala mo‘oni eni: tonuhia ‘a Sihova, ka ko au mo hoku kakai kuo hia.

²⁸Mo hūfia kia Sihova ke ma‘u ā ‘a e le‘o ‘o ‘Elohimi mo e ‘uha maka, pea te u tuku atu kimoutolu, pea ‘e ‘ikai te mau toe tatali.

²⁹Pea tali ki ai ‘e Mōsese, Ka u ka ‘alu ki tua‘ā kolo, te u fola hoku nima ni kia Sihova: ko e fa‘a mana ‘e tuku, pea ko e ‘uha maka ‘e ‘ikai kei ‘i ai; koe‘uhi ke ke mea‘i ‘oku ‘ia Sihova ‘a e fonua.

³⁰Ka ko e me‘a kiate koe mo ho‘o kau tamaio‘eiki, ‘oku ou ‘ilo ‘e ‘ikai te mou ‘apasia leva kia Sihova ‘Otua.

³¹Pea na‘e te‘ia ‘a e falākisi mo e pa‘ale, he kuo fua ‘a e pa‘ale,

³²pea kuo moto ‘a e falākisi; ka ko e uite mo e kusemi na‘e ‘ikai te‘ia, he na‘e tokamui.

³³Pea ‘alu atu ‘a Mōsese meia Felo kitua‘ā, ‘o ne folahi hono nima kia Sihova: pea na‘e tuku ‘a e fa‘a mana, mo e ‘uha maka, pea na‘e ‘ikai kei tō ‘a e ‘uha ki he kelekele.

³⁴Pea ‘i he vakai ‘e Felo kuo tuku ‘a e ‘uha mo e ‘uha maka mo e fa‘a mana, na‘a ne toe angahala, ‘o ne fakapepe‘e hono loto, ‘e ia mo ‘ene kau tamaio‘eiki.

³⁵Pea na‘e fakafefeka ‘a e loto ‘o Felo, pea na‘e ‘ikai te ne tukuange ‘a ha‘a ‘Isileli, ‘o hangē ko e folofola ‘a Sihova na‘e fakafai ‘ia Mōsese.