Read KO E TOH TAPU KATOA TONGA KO SIOPE 1 Bible Online

KO SIOPE 1 - KO E TOH TAPU KATOA TONGA bible

KO SIOPE 1

¹NA‘E ai ha tangata ‘i he fonua ko ‘Usa[1] na‘e hingoa ko Siope; pea na‘e haohaoa ‘a e tangata ko ia mo angatonu, pea na‘e ‘apasia ki he ‘Otua mo afe mei he kovi.

²Pea na‘e fanau‘i kiate ia ha foha ‘e toko fitu mo ha ‘ōfefine ‘e toko tolu.

³Pea ko ‘ene monumanu ko e sipi ‘e fitu afe, mo e kāmeli ‘e tolu afe, mo e taulua‘i pulu ‘e nimangeau, mo e ‘asi fefine ‘e toko nimangeau, pea ai mo ha kau nofo‘anga tokolahi; ko ia na‘e tomo hake ia ‘i he kakai ‘o Hahake kātoa.

⁴Pea hanga hono ngaahi foha ‘o fai ha kātoanga ‘i honau ngaahi fale, takitaha ‘i hono ‘aho; ‘o nau fekau atu hono tala ki honau tuofāfine ‘e toko tolu, ke ha‘u ‘o kai mo inu mo kinautolu.

⁵Pea ‘i he faifai pea kuo foki tu‘o taha honau ‘aho kātoanga, pea fekau ‘e Siope ke fai honau fakatāpui, ‘o ne tu‘u hengihengi hake, ‘o ne feia ‘a e ngaahi feilaulau-mōifua, ‘o fakatatau ki honau tokolahi; he na‘e pehē ‘e Siope, Na‘a kuo angahala ‘eku fānau, ‘o nau tafuli loto mei he ‘Otua. Na‘e pehē ‘a e fai ‘a Siope ‘i he ngaahi ‘aho ko ia kotoa.

⁶Pea faifai pea hoko ‘a e ‘aho na‘e omi ai ‘a e ngaahi foha ‘o e ‘Otua[2] ke hā kia Sihova, pea ha‘u ‘a Sētane[3] foki ‘i honau lotolotonga.

⁷Pea folofola ‘a Sihova kia Sētane, Ko ho‘o ha‘u mei fē? Pea tali ‘e Sētane kia Sihova, ‘o pehē, Mei he ‘alu fano ‘i māmani, mo ‘a‘ahi holo ai.

⁸Pea folofola ‘a Sihova kia Sētane, Kuo ke tokanga‘i ‘a ‘eku tamaio‘eiki ko Siope? ‘a e ‘ikai ha taha ‘i māmani ‘oku tatau mo ia? He ko e tangata haohaoa mo angatonu, ‘oku ‘apasia ki he ‘Otua mo afe mei he kovi.

⁹Pea tali ‘e Sētane kia Sihova, ‘o ne pehē, He ‘oku ‘apasia ‘a Siope ki he ‘Afiona tu‘unga‘a pē?

¹⁰‘Ikai kuo ke ‘aa‘i takai ia mo hono fale, mo e me‘a kotoa ‘oku ne ma‘u? Kuo ke tāpuaki‘i ‘a e ngāue ‘a hono nima, pea ko ‘ene monumanu ‘oku nau ‘ufi‘ufi ‘a e fonua.

¹¹Ka ko eni, ala atu mu‘a ki he‘ene ngaahi me‘a; pea tala atu te ne mātu‘aki tafuli meiate koe.

¹²Pea folofola ‘a Sihova kia Sētane; Vakai, te ke fa‘iteliha ki he‘ene ngaahi me‘a kotoa; kae ‘ikai te ke ala kiate ia. Pea hū kitu‘a ‘a Sētane mei he ‘ao ‘o Sihova.

¹³Pea ‘iloange ko e ‘aho ‘e taha ‘oku fai ‘e he‘ene fānau tangata mo fefine ‘enau kai mo inu kava ‘i he fale ‘o honau ta‘okete lele,

¹⁴mo e ha‘u ha talafekau kia Siope, ‘o ne pehē, Na‘e fai ‘e he fanga pulu ‘enau toho palau, pea kaikai ‘a e fanga ‘asi ofi ki ai:

¹⁵pea hifo mai ‘a e kau Sipa,[4] ‘o ‘ave kinautolu; pea ko e kau ngāue kuo nau tāmate‘i ‘aki ‘a e mata ‘o e heletā: pea ko au toko taha tofu pē kuo u hao mai ke fakahā kiate koe.

¹⁶Lolotonga ‘oku kei lea ‘a ē mo e ha‘u ē, ‘o ne pehē, Ne tō mei langi ‘a e afi ‘a e ‘Otua, ‘o fakamomofi ‘a e fanga sipi mo e kau ngāue, pea kuo nau ‘osi ai: pea ko au toko taha tofu pē kuo u hao mai ke fakahā kiate koe.

¹⁷Lolotonga ‘oku kei lea ‘a ē mo e ha‘u ē, ‘o ne pehē, Ko e kau Kalitia[5] na‘e fakamatatolu mai, pea nau ‘ohofia ‘a e fanga kāmeli, ‘o ‘ave, pea ko e kau ngāue kuo nau tāmate‘i ‘aki ‘a e mata ‘o e heletā: pea ko au toko taha tofu pē kuo u hao mai ke fakahā kiate koe.

¹⁸‘I he kei lea ‘a ē na‘e ha‘u ē ‘o ne pehē, Ko ho‘o fānau tangata mo fānau fefine na‘e fai ‘enau kai mo inu kava ‘i he fale ‘o honau ta‘okete lele,

¹⁹mo e ‘iloange na‘e tō mai ha matangi lahi mei he tu‘a toafa, ‘o ne taa‘i ‘a e tuliki ‘e fā ‘o e fale; pea na‘e hinga ia ki he fānau, pea kuo nau pekia: pea ko au toko taha tofu pē kuo u hao mai ke fakahā kiate koe.

²⁰Pea tu‘u ‘a Siope, ‘o ne hae hifo hono kofu, ‘o ne fakatekefua, ‘o ne tō lafalafa ‘o hū, ‘o ne pehē,

²¹Na‘a ku hū telefua mai mei he manava ‘o ‘eku fa‘ē, pea te u foki telefua ki ai. Ko Sihova na‘a ne foaki, pea ko Sihova kuo ne to‘o atu; kae mālō‘ia ai pē ‘a e huafa ‘o Sihova.

²²‘I he ngaahi me‘a kotoa ko ia na‘e ‘ikai fai hala ‘a Siope, pea na‘e ‘ikai te ne tuku ha kovi ki he ‘Otua.