Read KO E TOH TAPU KATOA TONGA KO SIOPE 10 Bible Online

KO SIOPE 10 - KO E TOH TAPU KATOA TONGA bible

KO SIOPE 10

¹‘OKU fiu hoku laumālie ‘i he‘eku mo‘ui; Te u laku atu ‘eku lāunga: Te u lea ‘i he mamahi hoku laumālie.

²Te u fakatau folofola kia ‘Elohā, ‘Oua ‘e lau au ko e angahala: Faka‘ilo mai pe ko e hā ‘oku ke fakakikihi ai mo au.

³‘Oku lelei kiate koe ke fai fakamālohi? Ke va‘inga‘aki ‘a e me‘a na‘e ongosia ho nima na hono ngaohi, Ka ke hāngai malimali mai ki he tu‘utu‘uni ‘a e kakai kovi?

⁴‘Oku fakakakano pē ho ongo fo‘i fofonga? Pe ‘oku hangē ko e sio ‘a e tangata me‘a vaivai ‘a ho‘o sio?

⁵‘Oku tatau ho ngaahi ‘aho mo e ‘aho ‘o e me‘a vaivai ni? Pe tatau ho ngaahi ta‘u mo e taimi ‘o e tangata?

⁶‘A ē ‘oku ke ‘eke ai ki ha‘aku kovi, Mo fakatotolo ki ha‘aku angahala,

⁷‘Osi, ‘oku ke ‘ilo ‘oku ‘ikai ko e angahala au; Pea ‘oku ‘ikai ha taha te ne ala fakahaofi mei ho nima.

⁸Ko ho nima na na‘e fakafuofua mo ngaohi au, Hoko kotoa, ‘o takatakai: Pea ko eni[26] kuo ke faka‘auha!

⁹Manatu mu‘a, kuo ke ngaohi au hangē ko e ‘umea:[27] Pea te ke fakafoki au ke u efu.

¹⁰‘Ikai na‘a ke lingi au hangē ko e hu‘akau, ‘O ke fakafatu au hangē ko e ngaohi ‘o e siisi?

¹¹Ko e kili mo e kakano kuo fakakofu ‘aki au ‘e he ‘Afiona, Mo lalanga au ‘aki ‘a e hui mo e uoua.

¹²Ko ho‘o ngāue ma‘aku ko e mo‘ui mo e ‘ofa, Pea ko ho‘o ‘a‘ahi tu‘u mai ‘oku matauhi ai ‘eku manava.

¹³Tā ko eni pē ‘a e me‘a na‘a ke longo mo koe; ‘Oku ou ‘ilo na‘e pehē ho‘o sio:

¹⁴Kapau te u angahala te ke tauhi ia, ‘O ‘ikai te ke tuku ke u hao mei ha‘aku kovi.

¹⁵Ka ai ha‘ate pau‘u, hoto fakapō! Pea neongo ha‘ate faitotonu, tala‘ehai te u mahiki hoku ‘ulu, Ko e ongo‘i ‘eku mā, mo e sio ki he‘eku kovi.[28]

¹⁶‘Io, ka ne mahiki, te ke tuli au hangē ha laione fekai, ‘O toe fakahā ‘iate au ho ivi fakaofo na.

¹⁷Te ke ‘omi ai pē ha kau fakamo‘oni fo‘ou kiate au, ‘O fakalahi ho‘o lili kiate au; ‘O tautaufetongi ‘a e tau ‘e fai mo au.

¹⁸Pea ko e hā ē, na‘a ke ‘omi au mei he mānava? Pehē na‘a ku mate ta‘esio kiate au ha taha.

¹⁹Na‘a ku tatau mo e te‘eki ke u mo‘ui; Na‘e fata au mei he mānava ki he fa‘itoka.

²⁰‘Ikai ‘oku si‘i hoku taimi? Ma‘u ā mu‘a, Hanga kehe meiate au ke u ki‘i mānava hake,

²¹Te‘eki ke u ‘alu ke ‘oua ‘e foki, Ki he fonua ‘o e Po‘uli mo e ‘Ata-‘o-mate:

²²Ko e fonua po‘uli lōlō, ko e po‘uli; Ko e ‘ata ‘o e mate, ‘o koto maveuveu, Pea ko hono maama ko e po‘uli ‘atā.