Read KO E TOH TAPU KATOA TONGA KO SIOPE 11 Bible Online

KO SIOPE 11 - KO E TOH TAPU KATOA TONGA bible

KO SIOPE 11

¹TOKI fokotu‘u mai ‘e Sofa‘a mei Naama, ‘o ne pehē,

²‘E tuku ta‘etali koā ha fu‘ufu‘unga lea pehē? Pe tuku leva kuo tonuhia ha puha lau?

³‘E fakanoa kakai ‘e ho‘o ngaahi muna na? ‘O ke lava ai ke manuki ta‘efakamaa‘i ‘e ha taha?

⁴He ‘oku ke pehē, ‘Oku ma‘a ‘eku tokāteline, Pea ‘oku ou ‘ata‘atā ‘i ho‘o ‘afio mai.

⁵Kae taumaiā ke fai ‘e ‘Elohā ha‘ane folofola, ‘O fa‘ai hono fofonga ke tali koe!

⁶‘O ne tala kiate koe ‘a e ngaahi ‘uhinga fufū ‘o e poto — He ko ‘ene fakakaukau ko e kato ‘i he loto kato — Ka ke ‘ilo ‘oku fakangalo‘i ‘e ‘Elohā ha‘a kovi ni‘ihi.

⁷Te ke mahakulea ‘a e uho ‘o ‘Elohā? ‘Io, ‘e a‘u ho‘o hakule ki he takele ‘o Sātai?

⁸‘Oku hangē ko e ngaahi tumutumu ‘o langi, ko e hā te ke fai? ‘Oku taumama‘o hifo ‘i Hētesi, ko e hā te ke ‘ilo?

⁹Ko hono fua ‘oku lōloa ange ‘i māmani, Pea laulahi ange ‘i he ‘ōseni.

¹⁰Kapau te ne moulu mai, ‘o puke ha taha, Kapau te ne ‘ave ki he fakamaau, pe matali Ia ‘e hai?

¹¹He ko e ‘Afio ‘oku ne ‘ilo ‘a e ha‘a nge‘esi: Pea ‘oku e‘a kiate ia ‘a e kovi ta‘e te ne fakasio.

¹²Ka ko e tangata ‘oku nge‘esi te ne ma‘u loto ‘Oka fokifā kuo tangata mai ha ‘uhiki‘i ‘asi kaivao.

¹³Neongo ko koe, kapau te ke fakahangatonu ho loto, Pea fola nima ki He‘ene ‘Afio —

¹⁴Kapau ‘oku ai ha kovi ‘i ho nima, lī ke mama‘o, ‘O ‘oua ‘e tuku ha mamio ke nofo ‘i ho tēniti —

¹⁵Ka pehē te ke mālanga hake ta‘eha mele; Pea kuo ke haukafa, ‘o ‘ikai toe manavahē.

¹⁶Seuke, ‘e ngalo ‘iate koe ho‘o mamahi: Ko ho‘o manatu ki ai ‘e hangē ko ho‘o manatu ki he vai kuo mole:

¹⁷Pea ‘e hoko ha taimi ‘e maama ange ‘i he ho‘atā: Ka ai ha po‘uli, ko e po‘uli pē kae ‘aho.

¹⁸Pea te ke nofo nonga, he ‘oku ai ha tu‘amelie; ‘Io, te ke vakai holo, ‘o tokoto noa.

¹⁹Pea te ke mālōlō, ‘o ‘ikai fakahoha‘a ‘e ha taha; Pea ‘e ‘omi holo kiate koe ‘e ha tokolahi.

²⁰Ka ko e mata ‘o e pau‘u ‘e ka‘anga ‘i he holi, Pea ‘e ‘auha meiate kinautolu honau hūfanga, Pea ko ‘enau ‘amanaki ko e tau‘aki pē ke pekia.