Read KO E TOH TAPU KATOA TONGA KO SIOPE 12 Bible Online

KO SIOPE 12 - KO E TOH TAPU KATOA TONGA bible

KO SIOPE 12

¹TOKI tali ‘a Siope, ‘o ne pehē,

²Ta ko ia! ko māmani pē kimoutolu! Pea ka mou ka pekia, ko hono ngata ia ‘o e poto.

³Ko au foki ‘oku ai hoku loto hangē ko kimoutolu; Tala‘ehai kuo u lalo‘aoa ‘iate kimoutolu: Seuke, ko hai ‘oku ‘ikai ‘ilo ‘a e ngaahi me‘a pehē!

⁴Kuo u hoko koā ko e luma‘anga ki hoku kaume‘a? ‘A au ko e taha na‘e tautapa kia ‘Elohā, ‘o ne tali? ‘A e faitotonu, ‘a e haohaoa — ko e luma‘anga!

⁵Ko e hoa ‘o e tu‘utāmaki ‘i he fakakaukau ‘a e tu‘umālie ko e kakae; ‘Oku tokonaki ‘e honau loto ke fai kiate kinautolu kuo kamata tāsipa.

⁶Nonga pē ‘a e ngaahi tēniti ‘o e kaiha‘akau, Nofo noa ‘a e kakai ‘oku luki kia ‘Ela; Ha taha ‘oku ‘alu mo ia ‘a hono ‘Elohā ‘i hono nima.

⁷‘Ā, fehu‘i mu‘a ki he fanga manu, pea te nau ako koe; Pea ki he manupuna ‘o e ‘atā, pea te nau fakahā atu:

⁸Tokanga ki he kelekele, pea te ne ako‘i koe; ‘Io, ‘e ‘a‘au atu ‘e he ika ‘o e tahi.

⁹Ko hai ‘oku ‘ikai ‘ilo ‘i he ngaahi me‘a ni kotoa, Ko e nima ‘o Sihova kuo ne fai ‘a e ngaahi me‘a ni?

¹⁰‘A ‘Ene ‘Afio ‘oku ‘i hono nima ‘a e mo‘ui ‘a e me‘a mo‘ui kotoa, Mo e laumālie ‘o e tangata fua pē.

¹¹‘O ‘ikai koā sivi ‘e ha telinga ‘a e me‘a ‘oku tala, ‘O hangē ‘oku kamata ma‘aku ‘e he ‘ao‘ingutu ‘a e me‘akai?

¹²‘E ma‘u nai ha poto mei he fa‘ahinga ‘oku hinā, Pea ko e mo‘ui fuoloa ‘oku fakatupu ‘ilo.

¹³Ka ‘oku fe‘ao mo e ‘Afio ‘a e poto mo e mafai; Ko e fakakaukau mo e ‘ilo ko ‘Ene me‘a ia.

¹⁴Vakai, ‘oku Ne holoki, pea ‘ikai toe langa; Ka loki ‘e ia ha taha, ‘e ‘ikai ha fakaava.

¹⁵Vakai, ‘oku ne ta‘ofi ‘a e vai, pea mātu‘u ia; Pea ‘oku ne tukuange, ‘o nau ta‘aki ‘a e fonua.

¹⁶‘Oku fe‘ao mo Ia ‘a e ivi mo e matelie; Ko e hē mo e fakahē ‘oku fakatou ‘a‘ana.

¹⁷‘Oku ne to‘o ‘a e pulupulu ‘o e kau fale‘i, ‘o taki pōpula; ‘O ne ngaohi ‘a e kau fakamaau ke hā ko e vale.

¹⁸‘Oku ne vete ‘a e ha‘i ‘a e ngaahi tu‘i, Pea ne ‘ai ha‘i ki he kongaloto ‘onautolu.

¹⁹‘Oku ne to‘o ‘a e pulupulu ‘o e kau taula‘eiki, ‘o taki pōpula; Pea ‘oku ne ha‘aki ‘a e kau mafi.

²⁰Ko e kau falala‘anga, fokifā ‘oku ne to‘o ‘enau mafai ke lea, ‘O ne fa‘ao mei he mātu‘a ‘enau ‘ilo‘ilo.

²¹‘Oku ne hua‘i ki hou‘eiki ‘a e manukia, ‘O ne fakahomo ‘a e no‘o ‘o ha‘a kaukaua.

²²‘Oku ne fakae‘a misiteli mei he po‘uli, ‘O ne ‘omi ki he maama ‘a e ‘ata-‘o-mate.

²³‘Oku ne hākeaki‘i ha kakai, ‘o toe faka‘auha; ‘Oku ne fakamafola ha kakai, ‘o toki taki pōpula.

²⁴‘Oku ne ‘ave ‘a e loto ‘o e kau tāimu‘a ‘o e fonua, ‘O ne ngaohi ke nau hē fano ‘i he lala ‘oku ‘ikai hano hala.

²⁵‘Oku nau tautaufā ‘i he po‘uli ta‘eha maama, ‘Io, ‘oku ne ngaohi ke nau tāsipa hangē ha konā.