Read KO E TOH TAPU KATOA TONGA KO SIOPE 13 Bible Online

KO SIOPE 13 - KO E TOH TAPU KATOA TONGA bible

KO SIOPE 13

¹SEUKE, kuo sio ‘e hoku mata ki he ngaahi me‘a ni kotoa, Kuo fanongo ‘e hoku telinga, ‘o ma‘u.

²Hangē ko ho‘omou ‘ilo, ‘oku pehē mo ‘eku ‘ilo ‘a‘aku: ‘Oku ‘ikai te u lalo‘aoa ‘iate kimoutolu.

³Ka ko au eni te u lea kia Sātai; ‘Io, ‘oku ou holi ke ma veipā mo ‘Ela.

⁴Ka ko kimoutolu ko e fa‘ahinga ‘oku feau ‘aki ‘a e loi, Ko e kau fuavai nge‘esi kimoutolu kotoa.

⁵Taumaiā ke mou longo ‘aupito! Te mou toki ngali poto ai.

⁶Fanongo mu‘a ki he‘eku fakamo‘oni ma‘aku; ‘Io, tokanga ki he ngaahi tali ‘e tō mei hoku ngutu.

⁷Te mou lea hala koā ma‘a ‘Ela? ‘Io, te mou lea kākā ma‘a ‘Ene ‘Afio?

⁸Te mou lango koā ki he ‘Afio? Te mou hoko koā ko e taukapo ‘o ‘Ela?

⁹‘E lelei koā ‘oka ne ka sivi kimoutolu? Te mou hele kiate ia hangē ko ho‘omou hele ki ha tangata?

¹⁰‘E lahi ha tautea te ne hilifaki atu, ‘O kapau te mou fai fakakauvaka.

¹¹‘Ikai na‘a mou mei ilifia ki hono mā‘olunga? ‘O tō hono ngeia kiate kimoutolu?

¹²Ko ho‘omou lau fakaono‘aho ko e koto palōvepi efu pē; Ko ho‘omou ngaahi puke na kuo hoko koni puke ‘umea.

¹³Longo, ‘oua ‘e lea mai; ka u lea ‘e au: Pea ka hoko ha me‘a kiate au ko ia ai pē.

¹⁴Neongo pe ko e hā ‘e iku ki ai, Ko au te u fa‘opuku hoku kakano, ‘O ‘alu mo au ‘eku mo‘ui ‘i hoku nima.[29]

¹⁵Vakai, te ne tāmate‘i au[30] ‘oku ou tatali ki ai Kaekehe ke u fakamatala ‘i hono ‘ao hoku ngaahi ‘alunga.

¹⁶Pea ko e me‘a ko ia foki ‘e kau mōku taukapo‘i: He tala‘ehai ‘e fie a‘u ki he ‘ao ‘o e ‘Afiona ha mālualoi.

¹⁷Mou fanongo mu‘a ki he‘eku lea, Pea ke hū ‘eku fakamatala ki homou telinga.

¹⁸Vakai ā, kuo u hokohoko lelei ‘eku ngaahi me‘a: ‘Oku ou ‘ilo te u hā tonuhia.

¹⁹Ko hai tū ‘e hopo mo au? Ka ne ai ha taha, te u toki longo, ‘o hokotaki.

²⁰Ka ko e me‘a pē ‘e ua ke ‘oua ‘e fai ‘e he ‘Afiona kiate au; Ka lava ia, pea ‘e ‘ikai te u fufū au mei ho Fōtunga:

²¹To‘o ‘aupito ho nima meiate au; Pea ke ‘oua na‘a fakailifia‘i au ‘e ho ngeia.

²²Ka pehē, pea ke lea koe, ka u tali; Pe te u lea ‘e au, kae sivi ‘e he ‘Afiona.

²³Kuo fiha nai ‘eku faikovi, mo ‘eku ngaahi hala? Faka‘ilo mai ‘eku pau‘u mo ‘eku angahala.

²⁴Ko e hā ‘oku hanga kehe ai ‘a e ‘Afiona, Mo ke lau au ko ho fili?

²⁵Ko ho‘o tuli taupusia koā ha lou‘akau ‘oku vilingia? ‘Io, te ke fakapaua ha momo‘i veve?

²⁶He ‘oku ke tu‘u ‘i ho‘o tohi ha ngaahi me‘a kona ke hoko kiate au, Pea ‘oku ke ngaohi au ke u ‘ea ki he ngaahi kovi ‘o ‘eku talavou.

²⁷‘Oku ke ‘ai foki hoku va‘e ki he ‘akau kii‘i, Pea ‘oku ke lama hoku ngaahi ‘alunga kotoa; Seuke, kuo ke laine fakangatangata hoku ‘aofiva‘e:

²⁸‘Osi, ko e me‘a popo au ‘oku ‘aunga, Hangē ko e kofu kuo kai ‘e he ane.