Read KO E TOH TAPU KATOA TONGA KO SIOPE 15 Bible Online

KO SIOPE 15 - KO E TOH TAPU KATOA TONGA bible

KO SIOPE 15

¹PEA na‘e tali ‘e ‘Elifasi mei Tīmani, ‘o pehē,

²He ko e anga ‘o e poto ke ‘a‘au ha ‘ata‘i ‘ilo, Pea ke fakafonu hono kete ‘i he matangi hahake?

³Ke fakakikihi ‘aki ‘a e ngaahi lea ‘oku ‘ikai sia‘a, Mo e ngaahi malanga ‘oku ‘ikai hano ‘aonga?

⁴Kae‘uma‘ā ‘oku ke fakaka‘anga ‘a e lotu, Pea ke fakasi‘isi‘i ki he‘ete fie hū ki he ‘ao ‘o ‘Ela.

⁵Seuke, ‘oku fakamatala ho‘o kovi ‘e ho ngutu ‘o‘ou, Neongo ho‘o fie fai‘aki ‘a e ‘elelo ‘o e fiemu‘a.

⁶‘Oku fakahalaia‘i koe ‘e ho ngutu ‘o‘ou, ‘o ‘ikai ko au; ‘Io, ko ho‘ou loungutu na ‘oku fakamo‘oni ki ho‘o kovi.

⁷Ko e ‘uluaki tangata koā koe na‘e fanau‘i? Pe na‘e fā‘ele‘i koe ki mu‘a atu ‘i he ngaahi mā‘olunga?

⁸Na‘a ke ‘i he kāpineti ‘a ‘Ela koā, ‘o fanongo? Pe ne ke fakatae ‘a e poto ma‘a u?

⁹Ko e hā ‘a e me‘a kuo ke ‘ilo ki ai kuo te‘eki ke mau ‘ilo? Ha me‘a ‘oku mahino kiate koe, ka ‘oku ‘ikai ‘iate kimautolu foki?

¹⁰Ko e fotufotu hinā mo e sialea ‘oku fakatou ‘iate kimautolu, Motu‘a ange noa ‘i ho‘o tamai.

¹¹‘O ‘ikai koā te ke āfeitaulalo ki he ngaahi lea ‘ofa ‘a ‘Ela? Mo e lea momole ‘oku fai atu?

¹²Ko e hā ‘oku ‘oho pehē ai ho loto? Pea ko e hā ‘oku teteka ai ho mata?

¹³‘Ā, ‘oku ke mio‘i ho‘o mānava ke fana kia ‘Ela, Pea ‘oku ke pu‘aki mei ho ngutu ha koto lau.

¹⁴Ko e hā ‘a e tangata me‘a vaivai ke ne ma‘a? Mo e me‘a fanau‘i ‘e he fefine ke ne mā‘oni‘oni?

¹⁵Vakai, na‘a mo Hono holonga tapu, Ka ‘oku ‘ikai ke falala ki ai ‘a ‘Ene ‘Afio; Pea na‘a mo e ngaahi langi, Ka ‘oku ‘ikai ma‘a ‘i he‘ene fofonga ki ai.

¹⁶Kae huanoa ‘a e me‘a fakalielia mo pua‘a, ‘A e tangata ‘oku inu kovi hangē ko e inu vai.

¹⁷Te u hīnoi‘i koe, fanongo kiate au; Pea ko e me‘a kuo u mamata ki ai te u ‘a‘au;

¹⁸‘A e me‘a na‘e fakahā ‘e he kau poto, ‘O ‘ikai te nau fufū ‘a e me‘a na‘e tuku fakaholo mei he‘enau ngaahi kui.

¹⁹Ko e fa‘ahinga na‘e ma‘u fakapalataha ‘a e fonua, ‘O ‘ikai ha muli ‘e ‘alu ‘i honau loto fonua.

²⁰Ko e faikovi ‘oku ne fakamamahi‘i ia ‘e ia ‘i he ‘aho kotoa pē, ‘Io, lolotonga kuo te‘eki ‘osi ‘a e ngaahi ta‘u kuo tuku tauhi ki he tūlano.[33]

²¹‘Oku ne ongo‘i ma‘u ‘a e mumuhu ‘ani me‘a fakailifia; Lolotonga ‘a e tu‘umālie, ‘oku a‘u mai ‘a e tama faka‘auha;

²²‘Oku ‘ikai ha‘ane falala ki ha foki mei he po‘uli na, Ka ko e toko taha ia ‘oku lama ke tui‘i ‘aki ‘a e heletā.

²³Ko e toko taha ia ‘oku hē holo ko e kumi me‘akai — “‘E ma‘u mei fē?”[34] — ‘Oku ne ‘ilo kuo tu‘utu‘uni ofi mai ‘a e ‘aho fakapo‘uli.

²⁴‘Oku fakailifia‘i ia ‘e he fakamamahi mo e tu‘utāmaki; ‘Oku na puke ia hangē ha tu‘i kuo ‘osi teu ke ha‘o:

²⁵Koe‘uhi ā na‘a ne mafao atu hono nima kia ‘Ela, Mo ne luki kia Sātai;

²⁶Na‘a ne ‘ohofi ‘a e ‘Afio kuo fakamaneke hono kia, Kuo fakamatolu ‘a e fakakaho ‘o hono ngaahi pā.

²⁷Koe‘uhi ā na‘a ne ‘ufi‘ufi hono mata ‘aki ‘a e ngako, Pea ne ‘ai ke nge‘enge‘e hono kongaloto,

²⁸Pea ne nofo‘ia ‘a e ngaahi kolo lala, Ko e ngaahi fale ‘e ‘ikai fie nofo ai ha taha, Kuo tu‘utu‘uni ke tu‘unga ‘oto‘ota.

²⁹‘E ‘ikai te ne koloa‘ia, pea ‘e ‘ikai ma‘u hono nima, Pea ‘e ‘ikai mafesifesi va‘a ‘a e me‘a ‘oku nau lava.[35]

³⁰‘E ‘ikai te ne hiki mei he po‘uli; ‘E fakamae hono ngaahi muka ‘e he afi, Pea te ne hiki ‘i he hō ‘a ‘Ene ‘Afio.[36]

³¹Ke ‘oua te ne falala ki he muna — Ko ‘ene mūnoa ia — He te ne ma‘u ‘a e muna ma‘ane totongi.

³²Te‘eki ‘osi hono ‘aho ‘e fakaai,[37] Pea ko ‘ene muka‘i paame ‘Oku ‘ikai kei mata.

³³Te ne maumau hono fua kei moto hangē ko e vaine, Pea lieliaki hono fisi hangē ko e ‘ōlive.

³⁴Pea ko e ‘api ‘o e mālualoi ‘e lala, Pea ‘e keina ‘e he afi ‘a e ‘ū tēniti ‘o e tuku pa‘anga fufū.

³⁵Kuo nau feitama ‘i he fakamamahi, ‘O nau fā‘ele‘i ‘a e kovi, Pea ko honau kete ‘onautolu ‘Oku teu ai ‘a e tūkia‘anga.